លោក ហ៊ាង សុទ្ធាយុត្តិ អ្នកនាំពាក្យក្រសួងសាធារណការ និងដឹកជញ្ជូននៃប្រទេសកម្ពុជាបានប្រាប់វិទ្យុមិត្តភាពកម្ពុជា-ចិន នាព្រឹកថ្ងៃទី១៤ សីហា ២០២១ថា បើទោះបីជាស្ថិតក្នុងបរិបទជំងឺកូវីដ១៩ក៏ដោយ ក៏គម្រោងសាងសង់ផ្លូវល្បឿនលឿនភ្នំពេញ-ក្រុងព្រះសីហនុនៅតែបន្តដំណើរការទៅមុខ តាមផែនការដែលបានកំណត់ និងសម្រេចលទ្ធផលលឿនទៀតផង។ លោកបានគូសបញ្ជាក់ថា ការពន្លឿនការសាងសង់ផ្លូវល្បឿនលឿនភ្នំពេញ-ក្រុងព្រះសីហនុ ដែលសម្រេចលទ្ធផលលឿនជាងការរំពឹងទុក និងប្រកបដោយគុណភាពខ្ពស់បែបនេះ គឺបានបង្ហាញឲ្យឃើញកាន់តែច្បាស់អំពីកិច្ចសហប្រតិបត្តិការយ៉ាងស្អិតរមួត រវាងប្រទេសទាំងពីរ កម្ពុជានិងចិន។ លោក ហ៊ាង សុទ្ធាយុត្តិ បានមានប្រសាសន៍ប្រាប់តាមទូរស័ព្ទថា កត្តាប្រឈមដោយសារតែកូវីដ១៩ មិនមែនទើបតែកើតឡើងថ្មីៗទេ ពោលគឺប្រមាណ២ឆ្នាំមកហើយ ប៉ុន្តែតាមការណែនាំ និងយកចិត្តទុកដាក់ខ្ពស់ពីរាជរដ្ឋាភិបាល ឯកឧត្តម ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន ក្រុមការងារសាងសង់តែងតែអនុវត្តវិធានការសុខាភិបាលនានា ការចាក់វ៉ាក់សាំងបង្ការជំងឺកូវីដ១៩ ជាពិសេស គោលការណ៍សុវត្ថិភាព ដែលជាអនុសាសន៍របស់ប្រមុខរាជរដ្ឋាភិបាល ៣កុំ ៣ការពារ ដើម្បីរៀនទម្លាប់រស់នៅជាមួយនឹងជំងឺនេះ ធ្វើការប្រកបដោយការប្រុងប្រយ័ត្នខ្ពស់។ ជារួម កិច្ចការងារសាងសង់ផ្លូវល្បឿនលឿននេះនៅតែដំណើរការទៅមុខ តាមផែនការ ហើយទទួលបានលទ្ធផលលើសពីការរំពឹងទុកទៅទៀត ភាគីពាក់ព័ន្ធនៅតែខិតខំប្រឹងប្រែង ដោយយើងមិនអាចឲ្យវិបត្តិជំងឺនេះ ប៉ះពាល់ដល់ការអភិវឌ្ឍសង្គមជាតិទេ ព្រោះថា វិស័យហេដ្ឋារចនាសម្ព័ន្ធគឺសំខាន់ណាស់ សម្រាប់ការអភិវឌ្ឍសេដ្ឋកិច្ចជាតិ។ លោកបានបញ្ជាក់ដែរថា ជាមួយនឹងលទ្ធផលសម្រេចបាន៦៤ភាគរយ គិតត្រឹមចុងខែកក្កដា កន្លងទៅនេះ ក្រសួងសាធារណការរំពឹងទុកថា នៅចុងឆ្នាំ២០២១ អាចនឹងសម្រេចការសាងសង់បានពី៧០ទៅ៨០ភាគរយ ប៉ុន្តែជាទស្សនផ្ទាល់របស់លោក ដែលតែងតែបានអញ្ជើញទៅពិនិត្យការអនុវត្តជាក់ស្តែង លទ្ធផលសាងសង់អាចសម្រេចជាង៨០ភាគរយ ត្រឹមចុងឆ្នាំនេះ។ លោកបានបន្តថា ជាមួយនឹងការសាងសង់ដែលមានដំណើរការលឿនជាងការរំពឹងទុក រីឯគុណភាពនៃការសាងសង់វិញ ហាក់បីដូចជាមានស្តង់ដាខ្ពស់ លេចធ្លោជាងគម្រោងសាងសង់ហេដ្ឋារចនាសម្ព័ន្ធផ្សេងៗទៀត ហើយគម្រោងនេះគឺល្អណាស់ ដែលនឹងជួយដល់សេដ្ឋកិច្ចជាតិ ការដឹកជញ្ជូន និងការធ្វើដំណើររបស់ប្រជាពលរដ្ឋធានាសុវត្ថិភាព ជាមួយនឹងគ្រឹះសំណង់រឹងមាំល្អ មានគុណតម្លៃសាកសមនឹងតម្លៃវិនិយោគរាប់ពាន់លានដុល្លារអាមេរិក។ ក្នុងនាមក្រសួងសាធារណការនិងដឹកជញ្ជូន និងក្នុងនាមលោកផ្ទាល់ លោកសង្កេតឃើញថា ការសាងសង់ផ្លូវល្បឿនលឿននេះបង្ហាញពីកិច្ចសហប្រតិបត្តិការ ពិតជាស្អិតរមួតរវាងប្រទេសទាំងពីរ កម្ពុជានិងចិន។ លោកពិតជាកោតសរសើរចំពោះស្មារតីរបស់ភាគីចិន ក្នុងការជួយអភិវឌ្ឍន៍សេដ្ឋកិច្ចកម្ពុជា ជាពិសេស លើវិស័យហេដ្ឋារចនាសម្ព័ន្ធនេះ ដោយបាន យកថវិការាប់ពាន់លានដុល្លារអាមេរិក មកវិនិយោគ ជាការវិនិយោគព្រោះតែការជឿទុកចិត្ត ហើយកម្ពុជាក៏មានឳកាសជំរុញការអភិវឌ្ឍសេដ្ឋកិច្ចរបស់ខ្លួនឲ្យកាន់តែល្អប្រសើរ។ លោកសូមថ្លែងអំណរគុណដល់ភាគីចិន ដែលបានធ្វើការវិនិយោគប្រកបដោយគុណតម្លៃនេះ ដែលពិតជានឹងជួយលើកស្ទួយសេដ្ឋកិច្ចជាតិ ព្រោះថា ខេត្តព្រះសីហនុគឺជាខេត្តប៉ូលសេដ្ឋកិច្ច ភ្ជាប់មករាជធានីភ្នំពេញ ដែលជាបេះដូងនៃប្រទេសកម្ពុជា។ សូមបញ្ជាក់ថា គម្រោងសាងសង់ផ្លូវល្បឿនលឿនភ្នំពេញ-ក្រុងព្រះសីហនុ មានប្រវែងសរុបជាង ១៩០គីឡូម៉ែត្រ។ ផ្លូវនេះឆ្លងកាត់រាជធានីភ្នំពេញប្រវែង ៨.៣០គីឡូម៉ែត្រ ខេត្តកណ្តាល ប្រវែង ៩.១០គីឡូម៉ែត្រ ខេត្តកំពង់ស្ពឺប្រវែង ៨០.៨០គីឡូម៉ែត្រ ខេត្តកោះកុងប្រវែង ១.៩២គីឡូម៉ែត្រ និងខេត្តព្រះសីហនុប្រវែង ៨៩.៨៩គីឡូម៉ែត្រ ដែលចំណាយថវិកាសាងសង់សរុបប្រមាណ ២,០០០លានដុល្លារអាមេរិក ជាទុនវិនិយោគរបស់ក្រុមហ៊ុនសាជីវកម្មស្ពាន និងថ្នល់ចិន (CRBC) តាមរយៈក្រុមហ៊ុន Cambodian PPSHV Expressway Co., Ltd។ គម្រោងនេះប្រើប្រាស់ពេលវេលាសាងសង់៤៨ខែ ដោយចាប់ផ្តើម កាលពីដើមឆ្នាំ២០១៩ គ្រោងនឹងបញ្ចប់ជាស្ថាពរ នៅដើមឆ្នាំ២០២៣ ឬចុងឆ្នាំ២០២២ ដែលអាចនឹងបញ្ចប់ការសាងសង់មុនផែនការកំណត់ ហើយភាគីកម្ពុជាគ្រោងនឹងចរចាជាមួយភាគីចិន ក្នុងការដាក់ឲ្យដំណើរការសាកល្បងឲ្យប្រើប្រាស់ ដោយមិនគិតថ្លៃ នាពេលខាងមុខនេះទៀតផង នេះបើតាម លោក ហ៊ាង សុទ្ធាយុត្តិ៕