ភ្នំពេញ ៖ រដ្ឋមន្រ្តីក្រសួងសាធារណការ និងដឹកជញ្ជូន បានថ្លែងថា ក្រសួងនឹងបន្តអនុវត្តច្បាប់ លើរថយន្តធុនធំ ដឹកលើសទម្ងន់ ដើម្បីថែរក្សាផ្លូវថ្នល់ ឱ្យបានយូអង្វែង។ ការថ្លែងអះអាងនេះ បានធ្វើឡើងក្នុងពិធីបើកឱ្យដំណើរការជាផ្លូវជាការ មណ្ឌលផ្តល់សេវាសាធារណៈ ទី០៥ របស់ក្រសួងសាធារណការ និងដឹកជញ្ជូន នៅផ្សារទំនើប ហេរីថេក វ៉ក ខេត្តសៀមរាប នាថ្ងៃទី ២១ ខែកក្កដា ឆ្នាំ២០២១ ។ លោក ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានបញ្ជក់ថា ដើម្បីឱ្យផ្លូវថ្នល់ប្រើបានយូអង្វែង លុះត្រាមិនមានការដឹកជញ្ជូនលើសទម្ងន់ ហើយត្រូវមានការចូលរួមថែរក្សាទាំងអស់គ្នា។ លោក ទេសរដ្ឋមន្ត្រី បានព្រមានថា ក្រសួងសាធារណការ និងដឹកជញ្ជូន នឹងបន្តចាត់វិធានការ ដូចភ្លៀងរលឹម លើរថយន្តដឹកលើសទម្ងន់ ដែលច្បាប់បានហាមឃាត់។ កាលពីថ្ងៃទី២០ ខែកក្កដា ឆ្នាំ២០២១ ក្រុមអ្នកបើកយានយន្តដឹកជញ្ជូន ធុនធំ បានតវ៉ានៅផ្លូវក្រវ៉ាត់ក្រុងទី២ ដើម្បីសុំការយោគយល់ និងបន្ឋូរបន្ថយ ដល់ពួកគេ។ តំណាងរបស់យានយន្តដឹកជញ្ជូនចំនួប៥រូប បានស្នើសុំដំណោះស្រាយ ៣ចំណុច ដែលខុសពីច្បាប់ និងឯកសារគតិយុត្តិ រួមមាន៖ ១. ស្នើសុំផ្ទុកទម្ងន់សរុបដល់ ៥៥តោន (បន្ថែម១៥តោន) ចំពោះប្រភេទយានយន្តភ្លៅ៥ (V1) ដែលក្នុងច្បាប់កំណត់ត្រឹមតែ៤០តោន ស្នើសុំផ្ទុកទម្ងន់សរុបដល់ ៤៥តោន (បន្ថែម១៥តោន) ចំពោះប្រភេទយានយន្តភ្លៅ៤ ដែលក្នុងច្បាប់កំណត់ត្រឹមតែ៣០តោន ស្នើសុំផ្ទុកទម្ងន់សរុបដល់ ៣៥តោន (បន្ថែម១០តោន) ចំពោះប្រភេទយានយន្តភ្លៅ៣ ដែលក្នុងច្បាប់កំណត់ត្រឹមតែ២៥តោន និងស្នើសុំផ្ទុកទម្ងន់សរុបដល់ ២៥តោន (បន្ថែម៩តោន) ចំពោះប្រភេទយានយន្តភ្លៅ២ ដែលក្នុងច្បាប់កំណត់ត្រឹមតែ ១៦តោន។ ២. ស្នើសុំត្រឹមកុំឱ្យមានឃាត់យានយន្តចំនួនមួយឆ្នាំដោយសុំត្រឹមតែពិន័យជាថវិកា ៣. ស្នើសុំដោះលែងយានយន្តទាំងឡាយណាដែលកំពុងឃាត់ទុកមួយឆ្នាំឱ្យចរាចរណ៍ដឹកជញ្ជូនបាន។ គួរបញ្ជាក់ថា នាពេលថ្មីៗនេះ គណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ បានឃាត់យានយន្តចំនួន១៧៣គ្រឿង រក្សាទុកចំនួនមួយឆ្នាំ ដោយអនុវត្តយ៉ាងតឹងរឹងបំផុតដោយគ្មានការលើកលែង តាមច្បាប់ស្តីពីផ្លូវថ្នល់មាត្រា៦០ និងសេចក្ដីជូនដំណឹង លេខ០៤៩ សជណ សក. គតលទ ស្តីពីការពង្រឹងវិធានការយ៉ាងតឹងរ៉ឹងបន្ថែមចំពោះយានយន្តដឹកជញ្ជូនធុនធ្ងន់ ដែលបើកបរលើបណ្តាញផ្លូវថ្នល់៕