រាជធានីភ្នំពេញ៖ ​រដ្ឋមន្ត្រីក្រសួងសាធារណៈការ និងប្រធាន​កម្មវិធី​អភិវឌ្ឍន៍​របស់អង្គការសហប្រជាជាតិ (UNDP) លោក​ Nick Beresford កាលពី​ចុងសប្ដាហ៍កន្លងទៅ បានជួប​គ្នា​ ដើម្បី​ស្វែងរកគន្លិៈ​ ឈានទៅលើក​កម្ពស់​ ការដឹកជញ្ជូន ក្នុងក្រុង ប្រកប​ដោយនិរន្តរភាព​។​ នៅចំពោះមុខ​ លោក Beresford បានសម្តែងការកោតសរសើរ ចំពោះការដាក់ឱ្យដំណើររថយន្តតាក់ស៊ីដឹកជញ្ជូនអ្នកដំណើរ របស់ក្រុមហ៊ុន GRAB នៅកម្ពុជាកាលពីខែធ្នូ ឆ្នាំកន្លងទៅ ក៏ដូចជាកម្មវិធីធ្វើដំណើរ ចែករំលែកផ្សេងទៀត ដូចជា៖ កម្មវិធីUber និងកម្មវិធីPassapp ជាដើម។ ជាមួយគ្នា បើតាមលោក Beresford ឲ្យ​ដឹងថា ពេលនេះ​អង្គការ UNDP កំពុងតែសហការក្នុងភាពជាដៃគូ ជាមួយក្រុមហ៊ុន តាក់ស៊ី GRAB ដើម្បីលើកកម្ពស់វិធានការ ដឹកជញ្ជូនក្នុងទីក្រុង បច្ចេកវិជ្ជា និងប្រព័ន្ធដឹកជញ្ជូននៅតាមទីក្រុង ដែលមាននិរន្តរ ភាពនៅកម្ពុជា ក្នុងគោលដៅកាត់បន្ថយ ការចំណាយលើការធ្វើចរាចរណ៍ក្នុងទីក្រុង។ ចំណែក ឯកឧត្តម ស៊ុន ចាន់​ថុល រដ្ឋមន្ត្រីក្រសួងសាធារណៈការ និងដឹកជញ្ជូន ក៏បានគូសបញ្ជាក់ផងដែរ អំពីគំនិតផ្តួច ផ្តើមផ្សេងៗរបស់ក្រសួង ពាក់ព័ន្ធនឹងការពង្រីកផ្លូវថ្នល់ ការស្តារផ្លូវដែក និងផ្លូវទឹកឡើងវិញ ដែលជួយកាត់បន្ថយដល់ ការកកស្ទះចរាចរណ៍ និងចំណាយលើការដឹកជញ្ជូន។ ក្នុងនោះឯកឧត្តមទេសរដ្ឋមន្រ្តី ក៏បានស្នើទៅកាន់ UNDP ឲ្យពិនិត្យលទ្ធភាពក្នុងការចូលរួមយ៉ា​ង​សកម្ម ជាមួយរដ្ឋាភិបាល ក្នុងយុទ្ធនាការបិតចំណាំងផ្លាតសុវត្ថិភាព និងពាក់មួកសុវត្ថិភាព ផងដែរ៕