[ANN] - រយៈពេល១១ថ្ងៃ អាជ្ញាធរខេត្តក្រចេះ ឃាត់រថយន្តធន់ធំកែច្នៃខុសបច្ចេកទេស ៣៣គ្រឿង
2018-02-23
ទៅកាន់ទំព័រចុះផ្សាយក្នុង ANN
ខេត្តក្រចេះ ៖ គិតត្រឹមរយៈពេល១១ថ្ងៃ ចាប់តាំងពីថ្ងៃទី១០ រហូតដល់ថ្ងៃទី២១ ខែកុម្ភៈ ឆ្នាំ២០១៨ អាជ្ញាធរខេត្តក្រចេះ ត្រួតពិនិត្យរថយន្តធន់ធំសរុបចំនួន១៨៦៦គ្រឿង ក្នុងនោះខុសលក្ខណៈបច្ចេកទេស និងកែច្នៃចំនួន៣៣គ្រឿង។
លោក ស្រេង ស្រស់ ប្រធានមន្ទីរសារធារណៈការ និងដឹកជញ្ជូនខេត្ត បានឲ្យដឹងនៅព្រឹកថ្ងៃទី២២ ខែកុម្ភៈ នេះថា មានរថយន្តធន់ធំចំនួន១៨៦៦គ្រឿង ត្រូវបានត្រួតពិនិត្យក្នុងនោះមាន ១៨១៥គ្រឿង គឺត្រឹមត្រូវតាមលក្ខណៈស្តង់ដា ក្រៅពីនោះមាន ៣៣គ្រឿង ត្រូវបានរកឃើញថា ខុសលក្ខណៈបច្ចេកទេស និង១៦គ្រឿងទៀតគឺបានកែច្នៃ។
លោកប្រធានមន្ទីរ បានបញ្ជាក់ថា យុទ្ឋនាការដែលបានធ្វើឡើងពីក្រុមគណៈកម្មាធិការចម្រុះក្នុង អំឡុងរយៈពេល១០ថ្ងៃមកនេះ ការអនុវត្តគឺបានធ្វើឡើងនៅគ្រប់ច្រកល្ហកនៅតាមបណ្តារ ស្រុក-ក្រុង ដើម្បីទប់ស្កាត់រថយន្តធន់ធំខុសលក្ខណៈបច្ចេកទេសទាំងអស់នេះ ខណៈដែលកន្លងមក គឺការចុះអនុវត្តបានធ្វើឡើងតែមួយគោលដៅរបស់ខេត្តនោះទេ។
លោកប្រធានមន្ទីរ ក៏បានអះអាងទៀតថា រាល់ប្រភេទរថយន្តធន់ធំដែលមន្ត្រីជំនាញបានរកឃើញពីភាពមិនប្រក្រតីទាំងចំនួនជាង៣៣គ្រឿងនោះ គឺត្រូវបានអាជ្ញាធរតម្រូវឲ្យធ្វើការកាត់ទ្រុង ឲ្យត្រឹមត្រូវតាមលក្ខណៈបច្ចេកទេស និងធ្វើកិច្ចសន្យាឲ្យបញ្ឃប់ការកែច្នៃ ដល់ម្ចាស់យានយន្ត។
លោក ស្រេង ស្រស់ ក៏បានអះអាងទៀតថា សកម្មភាពរបស់គណៈបញ្ជាការឯកភាពខេត្ត ដែលបានចុះអនុវត្តកន្លងមក ទៅតាមអនុសាសន៍របស់សម្តចអគ្គមហាសេនាបតី តេជោ ហ៊ុន សែន នាយករដ្ឋមន្ត្រី គឺវិធានការរបស់អាជ្ញាធរ ក៏និងត្រូវបន្តធ្វើឡើងយ៉ាងតឹងរឹង បន្ថែមទៀត
