[Rasmei Kampuchea Daily News] - កម្ពុជាធ្វើជាប្រធានប្តូរវេននៃកិច្ចប្រជុំក្រុមការងារសម្របសម្រួលការដឹកជញ្ជូនអាស៊ានលើកទី៤០ តាមប្រព័ន្ធវីដេរអូ
ភ្នំពេញ: កម្ពុជាធ្វើជាម្ចាស់ផ្ទះ នៃការរៀបចំកិច្ចប្រជុំក្រុមការងារសម្របសម្រួលការដឹកជញ្ជូនអាស៊ានលើកទី៤០ តាមប្រព័ន្ធវីដេរអូ រយៈពេល២ថ្ងៃ។ លោក គង់ សុផល អគ្គនាយករង នៃអគ្គនាយកដ្ឋានដឹកជញ្ជូនផ្លូវគោក និងជាប្រធានប្តូរវេន នៃក្រុមការងារសម្របសម្រួលការដឹកជញ្ជូនអាស៊ាន បានអញ្ជើញដឹកនាំកិច្ចប្រជុំក្រុមការងារសម្របសម្រួលការដឹកជញ្ជូនអាស៊ានលើកទី៤០នេះ។
កិច្ចប្រជុំនេះបានប្រព្រឹត្តទៅរយៈពេលពីរថ្ងៃចាប់ពីថ្ងៃទី២៣ ដល់ ថ្ងៃទី២៤ ខែមីនា ឆ្នាំ២០២១ តាមប្រព័ន្ធវីដេអូពីចម្ងាយ ដោយកម្ពុជាធ្វើជាម្ចាស់ផ្ទះ សហការ ជាមួយលេខាធិការដ្ឋានអាស៊ាន និងមានការអញ្ជើញចូលរួមដោយផ្ទាល់ពីថ្នាក់ដឹកនាំក្រសួងនិងមន្ត្រីជំនាញពាក់ព័ន្ធក្រោមឱវាទក្រសួងសាធារណការ និងដឹកជញ្ជូនកម្ពុជា និងការចូលរួមពីចម្ងាយពីតំណាងក្រសួង-ស្ថាប័នពាក់ព័ន្ធកម្ពុជា តំណាងប្រទេសនៃរដ្ឋជាសមាជិកអាស៊ាន និងដៃគូអភិវឌ្ឍន៍នានាផងដែរ។
អង្គប្រជុំនេះបានពិភាក្សាដោយផ្តោតជាសំខាន់លើបច្ចុប្បន្នភាពនៃការដឹកជញ្ជូនឆ្លងកាត់ព្រំដែនរវាងប្រទេសក្នុងតំបន់ ការស្តារឡើងវិញនូវការដឹកជញ្ជូនក្នុងតំបន់នៃរដ្ឋជាសមាជិកអាស៊ានឱ្យមានប្រសិទ្ធភាព ការពិនិត្យមើលអនុសាសន៍និងសកម្មភាពតាមដាននៃកិច្ចប្រជុំកន្លងមក ស្ថានភាពនៃការឱ្យសច្ចាប័នលើ កិច្ចព្រមព្រៀងសម្របសម្រួលដឹកជញ្ជូនអាស៊ាន ការបង្កើតនិងអនុវត្តនីតិវិធីពាក់ព័ន្ធក្នុងកិច្ចសម្រួល ការដឹកជញ្ជូនរបស់អាស៊ាន និងការគាំទ្រប្រតិបត្តិការនៃគណៈកម្មាធិការសម្របសម្រួលដឹកជញ្ជូនឆ្លងកាត់។
អង្គប្រជុំក៏បានពិភាក្សាផងដែរលើរបាយការណ៍ស្ដីពីបញ្ហាពាក់ព័ន្ធនឹងគយ របាយការណ៍ស្តីពីបញ្ហាពាក់ព័ន្ធការធានារ៉ាប់រង លិខិតអនុញ្ញាតរថយន្តដឹកជញ្ជូនទំនិញឆ្លងកាត់ព្រំដែនអាស៊ាន ប្រព័ន្ធតាមដានដឹកជញ្ជូន ការអភិវឌ្ឍក្របខណ្ឌច្បាប់ដើម្បីគាំទ្រការដឹកជញ្ជូនពហុមធ្យោបាយ ការពង្រឹងកិច្ចសម្របសម្រួលជាមួយគំនិតផ្តួចផ្តើមអនុតំបន់លើការអនុវត្តកិច្ចព្រមព្រៀងដឹកជញ្ជូននានា និងការផ្លាស់ប្តូរព័ត៌មានទៅវិញទៅមកទាក់ទងនឹងប្រតិបត្តិការដឹកជញ្ជូនទំនិញនិងអ្នកដំណើរតាមផ្លូវគោកក្រោមកិច្ចព្រមព្រៀងឆ្លងកាត់ព្រំដែនទ្វេភាគី ត្រីភាគីក្នុងក្របខណ្ឌអនុតំបន់ ក្នុងអំឡុងពេលនៃការរីករាលដាលជាសាកលនៃជំងឺកូវីដ-១៩ និងបញ្ហាសំខាន់ៗជាច្រើន។
យោងតាមរបាយការណ៍ពីបណ្តាប្រទេសក្នុងតំបន់អាស៊ានបានឱ្យដឹងថា៖ ការដឹកជញ្ជូនឆ្លងកាត់តាមតំបន់នីមួយៗត្រូវបាន និងកំពុងសិក្សាលម្អិតបន្ថែមទៀត ដើម្បីរិះរកវិធីសាស្ត្រដោះស្រាយបញ្ហាបន្ទាន់ទាក់ទងនឹងវិបត្តិនៃជំងឺកូវីដ-១៩ ដែលកំពុងធ្វើឱ្យប៉ះពាល់យ៉ាងធ្ងន់ធ្ងរដល់វិស័យដឹកជញ្ជូននៅក្នុងតំបន់អាស៊ាន ជាពិសេសសកម្មភាពទេសចរណ៍ និងពាណិជ្ជកម្មនានានៅក្នុងតំបន់ និងសកលលោក។
គួរកត់សម្គាល់ផងដែរថា៖ តាមកម្មវិធីប្រធានប្តូរវេន ព្រះរាជាណាចក្រកម្ពុជា ត្រូវធ្វើជាម្ចាស់ផ្ទះនៃការរៀបចំកិច្ចប្រជុំក្រុមការងារសម្របសម្រួលការដឹកជញ្ជូនអាស៊ានលើកទី៤០ នៅក្នុងទឹកដីខេត្តសៀមរាប ប៉ុន្តែដោយសារវិបត្តិនៃការឆ្លងរីករាលដាលជាសាកលនៃជំងឺកូវីដ-១៩ កិច្ចប្រជុំនេះត្រូវបានប្តូរទៅជាការរៀបចំតាមប្រព័ន្ធវីដេអូពីចម្ងាយដើម្បីកាត់បន្ថយហានិភ័យនៃការឆ្លងជំងឺដ៏កាចសាហាវនេះ៕
