ភ្នំពេញ ៖ លោក ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន បានបញ្ជាក់ថា ភស្តុភារកម្ម ជាសសរស្តម្ភដ៏សំខាន់មួយ ក្នុងការនាំឲ្យប្រទេសកម្ពុជា ពីប្រទេស ដែលមានប្រាក់ចំណូលទាប ទៅប្រទេស ដែលមានប្រាក់ចំណូលមធ្យម និងខ្ពស់នៅ ឆ្នាំ២០៣០ និងឆ្នាំ២០៥០ខាងមុខ។ យោងតាមហ្វេសប៊ុករបស់ក្រសួង សាធារណការ នៅថ្ងៃទី១៣ ខែកម្ភៈ ឆ្នាំ២០១៨ បានដក ស្រងប្រសាសន៍របស់ លោក ស៊ុន ចាន់ថុល មកបញ្ជាក់ថា “ខ្ញុំបានចង្អុលបង្ហាញថាភស្តុភារកម្ម គឺជាសសរស្តម្ភដ៏សំខាន់មួយ ក្នុងចំណោមសសរស្តម្ភ សំខាន់ៗជាច្រើន ដែលនឹងនាំកម្ពុជា ពីប្រទេសមានប្រាក់ចំណូលទាប ទៅជាប្រទេសមានប្រាក់ចំណូលមធ្យម នៅឆ្នាំ២០៣០ និងប្រទេសមានប្រាក់ ចំណូលខ្ពស់នៅឆ្នាំ២០៥០”។ លោក ស៊ុន ចាន់ថុល បានឲ្យដឹងទៀតថា ការបញ្ចប់ ការចរចារកិច្ចព្រមព្រៀងសម្បទាន ផ្លូវក្រវ៉ាត់ក្រុងទី៣ លើការសាងសង់ផ្លូវ នឹងចាប់ផ្តើមនៅឆ្នាំ២០១៨។ ក្នុងនោះសម្រាប់ ការសាងសង់ផ្លូវ ពីបាត់ដំបងទៅកោះកុង និងខេត្តព្រះសីហនុ ក្រសួងនឹងប្ដេជ្ញាបញ្ចប់ការ ស្តារផ្លូវរថភ្លើងភាគខាងជើងភ្នំពេញ-ប៉ោយប៉ែតនៅឆ្នាំ២០១៨ ហើយនឹងដាក់ឲ្យដំណើរការ សេវារថភ្លើងដឹកអ្នកដំណើរ (មុនចូលឆ្នាំខ្មែរ) រវាងប៉ោយប៉ែត-ស៊ីសូផុន និងរហូតដល់ បាត់ដំបង។ ព្រមជាមួយគ្នានេះ នឹងបើកដំណើរការសេវាផ្លូវដែក ពីភ្នំពេញទៅអាកាសយានដ្ឋាន អន្តរជាតិភ្នំពេញ និងការអភិវឌ្ឍគំនិតផ្តួចផ្តើមសេវាដឹកជញ្ជូន អ្នកដំណើរតាមផ្លូវទឹកផងដែរ៕