កណ្តាល ៖ ផ្លូវជាតិលេខ២ ចាប់ពីស្ពានព្រែកហូរ ក្រុងតាខ្មៅ ខេត្តកណ្តាល រហូតដល់រង្វង់មូលកួរស្រូវ ខណ្ឌដង្កោ បើជៀសបានជៀសទៅ កុំធ្វើដំណើរល្អជាង ពិសេសអ្នកជិះម៉ូតូតែម្តង ព្រោះផ្លូវមួយនេះ ហុយខ្លាំងណាស់ ប៉ះពាល់សុខភាពណាស់ ដោយគ្មានការបាញ់ទឹក អ្វីទេ ។ ជាងនេះទៅទៀត ផ្លូវនេះ មានជង្ហុកធំៗ និង ខ្ទេចខ្ទីខ្លាំងណាស់ ខណៈមិនដឹងថ្ងៃណា មានការស្ថាបនា សាជាថ្មី នោះទេ ។ អ្នកមីងលក់លតឆារម្នាក់ ថ្លែងប្រាប់ CPC NEWS នៅថ្ងៃទី១០ ខែវិច្ឆិកា ឆ្នាំ២០២០ នេះ ថា រាល់ថ្ងៃគាត់លក់ដូរ ក្បែរផ្លូវនេះ ពិបាកខ្លាំងណាស់ សុទ្ធតែដី និង ខ្សាច់ ហុយចូលកន្លែងលក់របស់គាត់ រកតែភ្ញៀវចូលមកហូបមួយគ្មាន ផង ។ និយាយពីឡានដឹកដី វិញ បើកលឿនៗ ចុចស៊ីផ្លេរលាន់ឮខ្លាំងៗ មិនខ្វល់ពីអ្នកដទៃសោះ ឡើយ ។ ដោយឡែក បងស្រីម្នាក់ទៀតរស់នៅក្បែរនោះ ថ្លែងដោយទឹកមុខមិនសប្បាយចិត្តថា គាត់ហួសចិត្តណាស់រាល់ថ្ងៃ និយាយក៏និយាយមិនចង់ចេញដែរ អាជ្ញាធរ និង អ្នករកស៊ីដឹកដី ដឹកខ្សាច់ គិតតែប្រយោជន៍ផ្ទាល់ខ្លួន មិនគិតពីសុខភាពប្រជាពលរដ្ឋ សោះ ។ បងស្រី សង្កេតឃើញថា ឡានដឹកមួយថ្ងៃៗរាប់រយគ្រឿង អត់គ្រប ហុយឡើង ងងឹតមេឃ ពេលហូបបាយម្តងៗ ដូចហូបបាយជាមួយខ្សាច់ និង ដី ដូច្នេះ ដែរ ។ បើនិយាយពីសុខភាពវិញ មិនដឹងថា រស់បានប៉ុន្មានទេ បើដកដង្ហើមមកសុទ្ធតែដី បែបនេះ ។ ចំពោះក្តីកង្វល់របស់ប្រជាពលរដ្ឋ នេះ CPC NEWS នៅរសៀលថ្ងៃទី១០ ខែវិច្ឆិកា ឆ្នាំ២០២០ នេះ បានទំនាក់ទំនងទៅលោក ម៉ឹង យូឡេង ប្រធានមន្ទីរសាធារណការនិងដឹកជញ្ជូនខេត្តកណ្តាល ដើម្បីសុំការឆ្លើយតប តែពេលទូរស័ព្ទចូលហើយ លោកបានចុចបិទវិញ ។ ដោយឡែក លោកឧត្តមសេនីយ៍ត្រី វ៉ែន សាវិន ស្នងការរងនគរបាលខេត្តកណ្តាលទទួលផែនសណ្តាប់ធ្នាប់និងចរាចរណ៍ ថ្លែងប្រាប់ CPC NEWS ថា ចំពោះបញ្ហាដែលសមត្ថកិច្ចដាក់គោលដៅ គឺ សម្រាប់ការពារ សម្រួលក្បួនថ្នាក់ដឹកនាំ និង ចរាចរណ៍ ។ ដោយឡែករថយន្តដឹកអត់គ្រប បើកបរក្នុងល្បឿនលៀន និង ដឹកខុសបច្ចេកទេស នេះ គឺ កាលពីថ្ងៃទី៥ ខែវិច្ឆិកា ឆ្នាំ២០២០ កន្លងទៅ នៅសាលាខេត្តកណ្តាល ដឹកនាំដោយលោក គង់ សោភ័ណ្ឌ អភិបាលខេត្តកណ្តាល បានប្រជុំបញ្ហានេះ ផងដែរ ។ ក្នុងកិច្ចប្រជុំ នេះ លោក គង់ សោភ័ណ្ឌ អភិបាលខេត្តកណ្តាល បានថ្លែងជុំវិញបញ្ហាដែលប្រជាពលរដ្ឋប្រតិកម្មរឿងរថយន្តដឹកដី ដឹកខ្សាច់ ដឹកអត់គ្រប និង ដឹកខុសបច្ចេកទេស បង្កផលប៉ះពាល់ដល់ការខូចខាតផ្លូវ និង សុខភាពរបស់ពលរដ្ឋ ថា គាត់បានអោយមន្ទីរសាធារណការខេត្តកណ្តាល លើកគោលការណ៍នោះមក ដើម្បីលោកមានវិធានការជាមួយក្រសួងរ៉ែ ថាមពល និង សមត្ថកិច្ច ពាក់ព័ន្ធ ។ សូមបញ្ជាក់ថា បញ្ហាទាំងនេះ មិនមែនទើបតែកើតមានឡើងនោះទេ ពោលគឺកើតមានយូរណាស់មកហើយ តែចំណាត់ការ វិញ ហាក់គ្មានប្រសិទ្ធភាព ទាល់តែសោះ ។ សរុបខ្លី ប្រជាពលរដ្ឋ នៅតែជួបការលំបាកក្នុងការធ្វើដំណើរ និង បញ្ហាសុខភាព ដដែល ៕