AKP ភ្នំពេញ ថ្ងៃទី១២ ខែឧសភា ឆ្នាំ២០២០ -- ឯកឧត្ដម នាយឧត្ដមសេនីយ៍ ហ៊ឹម យ៉ាន អគ្គស្នងការរងនគរបាលជាតិ បានគូសបញ្ជាក់ថា លទ្ធផលនៃការរឹតបន្ដឹងច្បាប់ចរាចរណ៍ផ្លូវគោកនៅទូទាំងប្រទេស ក្នុងរយៈពេល១១ថ្ងៃ ចាប់ពីថ្ងៃទី០១ ដល់ថ្ងៃទី១១ ខែឧសភា ឆ្នាំ២០២០នេះ គឺបានត្រួតពិនិត្យរកឃើញករណី​ល្មើសមាន​ដល់១៩,០០៤ករណី ក្នុងនោះ ករណីល្មើសដោយម៉ូតូមានចំនួន១៤,២៧១​ករណី ស្មើនឹង៧៥ភាគរយ នៃចំនួនបទល្មើសសរុប។ ថ្លែងក្នុងសន្និសីទសារព័ត៌មានស្ដីពីការរឹតបន្ដឹងច្បាប់ចរាចរណ៍ផ្លូវគោកនៅទូទាំងប្រទេស នារសៀលថ្ងៃទី១២ ខែឧសភា ឆ្នាំ២០២០ នៅទីស្ដីការក្រសួងសាធារណការ និង​ដឹកជញ្ជូន ឯកឧត្ដម នាយឧត្ដមសេនីយ៍ ហ៊ឹម យ៉ាន បានលើកឡើងថា ចំពោះករណី​ល្មើស​ ​លើរថយន្ដ ឬយានយន្ដគ្រប់ប្រភេទមានចំនួន៤,៧៣៣ករណី ស្មើនឹង២៥ភាគរយ។ ឯកឧត្ដម នាយឧត្ដមសេនីយ៍បានបន្ដថា បញ្ហាដែលត្រូវយកចិត្ដទុកដាក់ និងចង់ផ្សព្វ​ផ្សាយ​ដល់សាធារណជនក៏ដូចជាប្រជាពលរដ្ឋឱ្យបានដឹងនោះគឺបញ្ហាមិនពាក់មួកសុវត្ថិភាពក្នុងការបើកបរម៉ូតូគឺជារឿងសំខាន់ដែលពួកគាត់នៅតែមិនព្រមពាក់មួក ហើយបង្កឱ្យមាន​គ្រោះ​​ថ្នាក់ និងប្រឈមនឹងការបាត់បង់ជីវិត បង្កជាគ្រោះថ្នាក់ធ្ងន់ធ្ងរណាស់ ក្នុងនោះ​មាន​ប្រមាណ៧៦ភាគរយ ក្នុងចំណោមអ្នកជិះម៉ូតូទាំងអស់។ ករណីយានយន្ដអត់ស្លាកលេខ​មានចំនួន១០ភាគរយ និងករណីល្មើសភ្លើងសញ្ញា ស្លាកសញ្ញាចរាចរណ៍មានចំនួន៨​ភាគរយ។ ក្រៅពីនេះ មានករណីទូរស័ព្ទពេលកំពុងបើកបរ ការដឹកលើសចំណុះ និងបញ្ហា​ស្រវឹងមានចំនួនសរុប២ភាគរយ។ ឯកឧត្ដម នាយឧត្ដមសេនីយ៍បានបន្ដថា​ចំពោះរថយន្ដវិញបទល្មើសដែល​ច្រើនជាង​គេ​គឺការមិនពាក់ខ្សែក្រវ៉ាត់គឺមានរហូតដល់៤៨ភាគរយ និងល្បឿនមាន២៦ភាគរយ ល្មើស​សញ្ញាចរាចរណ៍មាន៦ភាគរយ ដឹកលើសចំណុះ៦ភាគរយ ទូរស័ព្ទក្នុងពេលបើក​បរមាន​ចំនួន​៦ភាគរយ។ ដោយឡែកករណីគ្មានប័ណ្ណបើកបរមានចំនួន៤ភាគរយ អត់ស្លាកលេខ និងប្រើប្រាស់គ្រឿងស្រវឹងមានចំនួន៣ភាគរយ។ ឯកឧត្ដម នាយកឧត្ដមសេនីយ៍បានអះអាងថា ការរឹតបន្ដឹងច្បាប់ចរាចរណ៍នេះគឺ​នៅ​តែបន្ដធ្វើជារៀងរហូត ដែលរាជរដ្ឋាភិបាលក៏ដូចជាគណៈកម្មាធិការជាតិសុវត្ថិភាព​ចរា​ចរ​ណ៍ផ្លូវគោក​បាន​កំណត់ថា ក្នុងឆ្នាំ២០២០នេះគឺជាឆ្នាំដែលត្រូវរឹតបន្ដច្បាប់ចរាចរណ៍​ផ្លូវ​គោក និង​បានប្រកាសផ្សព្វផ្សាយចាប់តាំងពីដើមឆ្នាំ២០២០មក ដើម្បីឱ្យប្រជាពល​រដ្ឋបាន​ជ្រាប និង​ត្រៀមខ្លួនជាមុនដើម្បីបំពេញកាតព្វកិច្ចតាមច្បាប់កំណត់។ ឯកឧត្ដម នាយឧត្ដម​សេនីយ៍​បានបន្ថែមថា មុននឹងសមត្ថកិច្ចរឹតបន្ដឹងការអនុវត្ដច្បាប់ចរាចរណ៍ថ្មីនេះ គឺយើង​បាន​​ទុក​ពេល​វេលារយៈពេល៤ខែ ដើម្បីឱ្យពួកគាត់រៀបចំខ្លួន និងត្រៀមលក្ខណៈសម្បត្ដិ​ឱ្យ​បាន​រួចរាល់ ហើយការអនុវត្ដផ្ទាល់ចាប់ផ្ដើមពីថ្ងៃទី០១ ខែឧសភា ឆ្នាំ២០២០​នេះ។ ជាមួយ​គ្នា​នេះ ឯកឧត្ដម នាយឧត្ដមសេនីយ៍ក៏បានសម្ដែងនូវការសោកស្ដាយចំពោះ​ប្រជា​ពលរដ្ឋមួយ​ចំនួនដែលមានការធ្វេសប្រហែស ខណៈពេលដែលសមត្ថកិច្ចចាប់​ផ្ដើម​រឹត​បន្ដឹងច្បាប់ចរា​ចរណ៍ ទើបទៅធ្វើប័ណ្ណបើកបរ ការធ្វើឆៀក ឬត្រួតពិនិត្យលក្ខណៈ​បច្ចេក​ទេស ឬធ្វើឯក​សារ​ផ្សេងៗ​ដោយទុករង់ចាំដល់ហួសពេល និងផុតសុពលភាព។ ឯកឧត្ដម នាយឧត្ដមសេនីយ៍ ហ៊ឹម យ៉ាន បានកត់សម្គាល់ឃើញថា ក្នុងរយៈពេល នៃការរឹតបន្ដឹងរបស់សមត្ថកិច្ចនេះ គ្រោះថ្នាក់ចរាចរណ៍មានការថយចុះ បើប្រៀបធៀបតែ ក្នុង១សប្ដាហ៍ក្នុងខែឧសភា ឆ្នាំ២០២០ និង១សប្ដាហ៍ដូចគ្នាក្នុងខែឧសភា ឆ្នាំ២០១៩ ឃើញថា បានកាត់បន្ថយគ្រោះថ្នាក់បានចំនួន៥៤ភាគរយ គឺស្មើនឹង៥២លើក អ្នកស្លាប់ ថយដល់១៦នាក់ ស្មើនឹង៤០ភាគរយ និងអ្នករងរបួសថយដល់៥៩នាក់​ ស្មើនឹង៥១ ភាគរយ៕ ដោយ អ៊ុន រិទ្ធី