កិច្ចប្រជុំលើកទី៤ នៃគណៈកម្មការសេដ្ឋកិច្ចចម្រុះកម្ពុជា-តួកគីយ៉េ និងកិច្ចប្រជុំលើកទី១ នៃក្រុមការងាររួម កម្ពុជា-តួកគីយ៉េ សម្រាប់អនុវត្ត MOU ស្តីពីកិច្ចសហប្រតិបត្តិការលើការប្រើប្រាស់របៀងដឹកជញ្ជូនអន្តរជាតិ ទីក្រុងអង់ការ៉ា សាធារណរដ្ឋតួកគីយ៉េ៖ កាលពីថ្ងៃទី៣-៤ ខែវិច្ឆិកា ឆ្នាំ២០២៥ ឯកឧត្តម ឡេង ធនយុទ្ធា រដ្ឋលេខាធិការ និងប្រតិភូនៃក្រសួងសាធារណការ និងដឹកជញ្ជូន បានចូលរួមជាមួយគណៈប្រតិភូអន្តរក្រសួង-ស្ថាប័ននៃព្រះរាជាណាចក្រកម្ពុជា ដឹកនាំដោយលោកជំទាវរដ្ឋមន្រ្តីពាណិជ្ជកម្ម ទៅចូលរួមកិច្ចប្រជុំលើកទី៤ នៃគណៈកម្មការសេដ្ឋកិច្ចចម្រុះកម្ពុជា-តួកគីយ៉េ ដើម្បីពិភាក្សា និងផ្លាស់ប្តូរយោបល់លើកិច្ចសហប្រតិបត្តិការទ្វេភាគីនៃប្រទេសទាំងពីរ លើវិស័យ និងអនុវិស័យអាទិភាពមួយចំនួនមានដូចជា ពាណិជ្ជកម្ម, កសិកម្ម, អាកាសចរណ៍ស៊ីវិល, ការដឹកជញ្ជូន និងហេដ្ឋារចនាសម្ព័ន្ធ, អប់រំ, សុខាភិបាល, វិនិយោគ, ឧស្សាហកម្ម, ទេសចរណ៍, ហាឡាល់, ធនធានទឹក, ការងារ និងវិស័យពាក់ព័ន្ធដទៃទៀត ក្នុងគោលបំណងដើម្បីជំរុញ និងទាញអត្ថប្រយោជន៍អតិបរមាពីកិច្ចសហប្រតិបត្តិការទ្វេភាគីកម្ពុជា-តួកគីយ៉េ។ ឆ្លៀតក្នុងឱកាសនេះផងដែរ ឯកឧត្តមរដ្ឋលេខាធិការ ក៏បានដឹកនាំប្រតិភូក្រសួងចូលរួមកិច្ចប្រជុំលើកទី១ នៃក្រុមការងាររួមកម្ពុជា-តួកគីយ៉េ សម្រាប់អនុវត្ត MOU ស្តីពីកិច្ចសហប្រតិបត្តិការកម្ពុជា-តួកគីយ៉េ លើការប្រើប្រាស់របៀងដឹកជញ្ជូនអន្តរជាតិ ដែលបានចុះហត្ថលេខាកាលថ្ងៃទី៩ តុលា ឆ្នាំ ២០២៥ កន្លងទៅ ដែលភាគីតួកគីយ៉េ ដឹកនាំផ្ទាល់ដោយឯកឧត្តម Burak AYKAN អគ្គនាយកទទួលបន្ទុកកិច្ចការទំនាក់ទំនងអឺរ៉ុប និងការបរទេស ។ កិច្ចប្រជុំនេះបានលើកឡើងអំពីរបៀបរបបការងាររបស់ក្រុមការងាររួម និងការកំណត់នូវផែនការសកម្មភាពដើម្បីអនុវត្ត MOU ព្រមទាំងបានពិភាក្សា និងផ្លាស់ប្តូរយោបល់គ្នាទៅវិញទៅមក អំពីខ្សែផ្លូវឆ្លងកាត់របៀងតភ្ជាប់រវាងប្រទេសទាំង២ ដែលមានសក្តានុពលសម្រាប់រយៈមធ្យម (ការតភ្ជាប់តាមផ្លូវគោក និងផ្លូវសមុទ្រ) និងរយៈវែង (តាមផ្លូវរថភ្លើង) ដើម្បីជំរុញអនុវត្តការតភ្ជាប់ការដឹកជញ្ជូនរវាងប្រទេសទាំង២ តាមរបៀងអន្តរជាតិ និងសក្តានុពលនៃការវិនិយោគលើវិស័យឡូជីស្ទីក នៅកម្ពុជា។ តាមរយៈនៃកិច្ចប្រជុំនេះ ភាគីតួកគី ក៏បានបង្ហាញនូវឆន្ទៈផ្តល់នូវជំនួយបច្ចេកទេស និងការបណ្តុះបណ្តាលលើវិស័យផ្លូវដែក និងការកៀគរវិនិយោគលើសេវានាវាជំនួញសមុទ្រ (ជួសជុល ថែទាំ និងដំឡើងនាវា) នៅកម្ពុជាផងដែរ៕