ខេត្តពោធិ៍សាត់៖ បណ្តុះបណ្តាល និងផ្សព្វផ្សាយពីបច្ចេកទេសជួសជុលថែទាំផ្លូវ និងកម្មវិធីថែទាំផ្លូវ (ROAD CARE Mobile App) ដល់មន្ត្រីជំនាញ និងប្រជាពលរដ្ឋ ដើម្បីចូលរួមពង្រឹងគុណភាពផ្លូវថ្នល់ឱ្យមានភាពរឹងមាំជាប់យូរអង្វែង និងបង្កើនសុវត្ថិភាពចរាចរណ៍ក្នុងការប្រើប្រាស់ផ្លូវថ្នល់ --- ថ្ងៃពុធ ៩រោច ខែកត្តិក ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី២០ ខែវិច្ឆិកា ឆ្នាំ២០១៩ នៅមន្ទីរសាធារណការ និងដឹកជញ្ជូនខេត្តពោធិ៍សាត់ បានបន្តធ្វើយុទ្ធនាការបណ្តុះបណ្តាល និងផ្សព្វផ្សាយស្តីពីបច្ចេកទេសជួសជុលថែទាំផ្លូវ និងកម្មវិធីថែទាំផ្លូវ (ROAD CARE Mobile App) ក្រោមអធិបតីភាព លោក សំរ៉ង ឌីណាម៉ូ អគ្គនាយករងបច្ចេកទេស នៃអគ្គនាយកដ្ឋានបច្ចេកទេស។ កម្មវិធីយុទ្ធនាការបណ្តុះបណ្តាល និងផ្សព្វផ្សាយនេះ មានការចូលរួមពីតំណាងអាជ្ញាធរដែនដី សិស្ស និស្សិត និងមន្ត្រីរាជការនៃមន្ទីរសាធារណការ និងដឹកជញ្ជូនខេត្ត សរុប ១៤០នាក់។ កម្មវិធីនេះ រៀបចំដោយអគ្គនាយកដ្ឋានបច្ចេកទេស និងនាយកដ្ឋានព័ត៌មានវិទ្យា និងទំនាក់ទំនងសាធារណៈ សហការជាមួយមន្ទីរសាធារណការ និងដឹកជញ្ជូនខេត្តពោធិ៍សាត់ ក្រោមកិច្ចសហការគាំទ្រពីកម្មវិធីអភិវឌ្ឍន៍សហប្រជាជាតិ ប្រចាំព្រះរាជាណាចក្រកម្ពុជា (UNDP)។ កម្មវិធីយុទ្ធនាការនេះមានគោលបំណងសំខាន់ជួយឱ្យមន្រ្តីបច្ចេកទេស នៃមន្ទីរសាធារណការ និងដឹកជញ្ជូនខេត្តពោធិ៍សាត់ បានយល់ដឹងបន្ថែមពីបច្ចេកទេសសំខាន់ៗនៃការសាងសង់ និងការជួសជុលថែទាំផ្លូវថ្នល់ ឱ្យមានលក្ខណៈល្អប្រសើរ មានអាយុកាលយូរអង្វែង និងការប្រើប្រាស់កម្មវិធីថែទាំផ្លូវ (ROAD CARE Mobile App) ដែលផ្ដល់ភាពងាយស្រួលក្នុងការឆ្លើយតប និងទំនាក់ទំនងទៅកាន់បងប្អូនប្រជាពលរដ្ឋ ព្រមទាំងផ្សព្វផ្សាយបន្តដល់បងប្អូនប្រជាពលរដ្ឋក្នុងតំបន់ឱ្យយល់ដឹងពីអត្ថប្រយោជន៍ និងវិធីប្រើប្រាស់កម្មវិធីថែទាំផ្លូវ (ROAD CARE Mobile App) ដើម្បីរាយការណ៍ផ្ទាល់ពីស្ថានភាពផ្លូវជង្ហុកសំបុកមាន់តាមដងផ្លូវនានាក្នុងរាជធានី-ខេត្ត នៅទូទាំងប្រទេស ដើម្បីឱ្យក្រុមការងារបច្ចេកទេសធ្វើការជួសជុលបានទាន់ពេលវេលា កាត់បន្ថយការចំណាយថវិកាជាតិច្រើន និងកាត់បន្ថយគ្រោះថ្នាក់ចរាចរណ៍ ព្រមទាំងបង្កើនសុវត្ថិភាពចរាចរណ៍ជូនអ្នកប្រើប្រាស់ផ្លូវថ្នល់ និងអភិវឌ្ឍប្រព័ន្ធហេដ្ឋារចនាសម្ព័ន្ធដឹកជញ្ជូនក្នុងប្រទេសកម្ពុជាផងដែរ។ សូមបញ្ជាក់ផងដែរថា៖ ខេត្តពោធិ៍សាត់ គឺជាខេត្តទី១៣ នៃយុទ្ធនាការបណ្តុះបណ្តាល និងផ្សព្វផ្សាយអំពីបច្ចេកទេសជួសជុលថែទាំផ្លូវ និងកម្មវិធីថែទាំផ្លូវ (ROAD CARE Mobile App) ហើយយុទ្ធនាការនេះ នឹងបន្ដបេសកកម្មបណ្តុះបណ្តាល និងផ្សព្វផ្សាយដល់មន្ទីរសាធារណការ និងដឹកជញ្ជូនខេត្តចំនួន១២ខេត្តបន្តទៀត ក្នុងគោលដៅបណ្តុះបណ្តាល និងផ្សព្វផ្សាយឱ្យបានគ្រប់ទាំង២៥រាជធានី ខេត្ត ទូទាំងប្រទេស៕ ទាញយកកម្មវិធីថែទាំផ្លូវ (ROAD CARE Mobile App)៖ - App Store: roadcare.mpwt.gov.kh/ios - Play Store: roadcare.mpwt.gov.kh/android ::: សម្រាប់ព័ត៌មានបន្ថែម សូមទំនាក់ទំនងមកកាន់លេខ៖ 085 92 90 90 / 015 92 90 90 / 067 92 90 90