ភ្នំពេញៈ រដ្ឋលេខាធិការក្រសួងសាធារណការ និងដឹកជញ្ជូន លោកស្រី កុយ សុដានី បានថ្លែងថា គិតត្រឹមរយៈពេល៩ខែ ឆ្នាំ២០១៩នេះ ការផ្ដល់សេវាសាធារណៈ ក្នុងវិស័យដឹកជញ្ជូន មានប្រមាណ ជា១លានប្រតិបត្តិការ ដោយក្រសួងប្រមូល ចំណូលសរុបជាង ១១៤ពាន់លានរៀល (២៨លានដុល្លារ)។ ក្នុងឱកាសអញ្ជើញ ជួបពិភាក្សាការងារជាមួយថ្នាក់ដឹកនាំ នៃគ្រឹះស្ថានធនាគារ និងហិរញ្ញវត្ថុ កាលពីពេលថ្មីៗនេះ លោកស្រី កុយ សុដានី បានថ្លែងថា ការយកចិត្តទុកដាក់ របស់រាជរដ្ឋាភិបាល លោកស៊ុន ចាន់ថុល ទេសរដ្ឋមន្ត្រី រដ្ឋមន្រ្តីក្រសួងសាធារណការ បានបង្កើតប្រព័ន្ធបច្ចេកវិទ្យា ផ្ដល់សេវាសាធារណៈ ឲ្យប្រជាពលរដ្ឋ ដើម្បីសម្រួលដល់ការកាត់ បន្ថយពេលវេលាផ្តល់សេវា កាត់បន្ថយចំណាយក្រៅផ្លូវការ ក៏ដូចជាបង្ខិតសេវាកាន់តែជិតដល់ពួកគាត់ ។ លោកស្រីបន្តថា “វឌ្ឍនភាពការងារផ្តល់សេវារយៈពេល ៩ខែ ឆ្នាំ២០១៩ មានប្រមាណជា១លានប្រតិបត្តិការ និងប្រមូលចំណូល បានសរុបប្រមាណជាង១១៤ពាន់លានរៀល ខណៈបច្ចុប្បន្នមានគ្រឹះស្ថានដៃគូរចំនួន៦ បានចាប់ដៃគូជាមួយក្រសួង” ។ លោកស្រី រដ្ឋលេខាធិការ ឲ្យដឹងទៀតថា គំនិតផ្តួចផ្តើមថ្មីរបស់ក្រសួងផ្តល់សេវាលេខពិសេសផ្ទាល់ខ្លួន ដែលជាបង្គំ អក្សរ និងលេខឡាតាំងមិនលើសពី៨ខ្ទង់ ដើម្បីបំពេញតម្រូវការពលរដ្ឋ ។ ក្នុងនោះក្រសួងក៏មានបំណង ផ្ដល់ជម្រើសបង់ប្រាក់បញ្ជាទិញ និងការចូលរួមដេញថ្លៃ ដោយប្រើប្រាស់បច្ចេកវិទ្យាទំនើប ។ គំនិតផ្តួចផ្តើមទាំងនេះអាចដំណើរការទៅបាន លុះត្រាតែមានការសហការពីគ្រឹះស្ថានហិរញ្ញវត្ថុ ដែលកំពុងប្រើប្រាស់បច្ចេកវិទ្យា ក្នុងការចរាចរណ៍ សាច់ប្រាក់នៅកម្ពុជា ៕