ថ្ងៃព្រហស្បតិ៍ ១២កើត ខែអស្សុជ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី១០ ខែតុលា ឆ្នាំ២០១៩ នៅសាលាខេត្តមណ្ឌលគិរី ឯកឧត្ដមស៊ុយ សាន រដ្ឋលេខាធិការ ក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ឯកឧត្តមទេរដ្ឋមន្ត្រី ស៊ុន ចាន់ថុល បានអញ្ជើញជាអធិបតីក្នុងពិធីប្រកាសសុពលភាពចូលកាន់មុខតំណែងប្រធានមន្ទីរថ្មី នៃមន្ទីរសាធារណការ និងដឹកជញ្ជូន ខេត្តមណ្ឌលគិរី ដោយមានការចូលរួមពីសំណាក់ថ្នាក់ដឹកនាំក្រសួង ឯកឧត្ដមប្រធានក្រុមប្រឹក្សាខេត្ត ឯកឧត្ដមអភិបាលនៃគណៈអភិបាលខេត្ត ថ្នាក់ដឹកនាំនៃមន្ទីរពាក់ព័ន្ធជុំវិញខេត្ត និងមន្ត្រីរាជការនៃមន្ទីរសាធារណការ និងដឹកជញ្ជូន សរុបទាំងអស់ប្រមាណ៣០០នាក់។ ការតែងតាំងប្រធានមន្ទីរថ្មីនេះគឺធ្វើឡើងដើម្បីជំនួសលោកប្រធានមន្ទីរចាស់ គឺ លោក ម៉ៅ ធនារក្ស ដែលលោកនឹងត្រូវរង់ចាំទទួលភារកិច្ចថ្មី។ ថ្លែងក្នុងពិធីនោះ ឯកឧត្ដមរដ្ឋលេខាធិការបានមានប្រសាសន៍ថា ការផ្លាស់ប្ដូរនេះមិនមែនមានន័យថាប្រធានមន្ទីរចាស់បានប្រព្រឹត្តខុសឆ្គង ឬខ្វះសមត្ថភាព ក្នុងការគ្រប់គ្រង និងដឹកនាំវិស័យសាធារណការ និងដឹកជញ្ជូនក្នុងខេត្តនេះឡើយ ពោលគឺធ្វើឡើងដើម្បីបណ្ដុះស្មារតី និងវប្បធម៌ចែករំលែកចំណេះដឹង និងបទពិសោធន៍ ជំរុញគំនិតផ្ដួចផ្ដើមថ្មីៗជាដើម សាបព្រោះពហុជំនាញដល់មន្ត្រី ស្របតាមកំណែទម្រង់ស៊ីជម្រៅរដ្ឋបាលសាធារណៈ និងគោលនយោបាយរបស់រាជរដ្ឋាភិបាលក្នុងការអភិវឌ្ឍសមត្ថភាពវិជ្ជាជីវៈដល់មន្ត្រីរាជការ សំដៅបង្កើនប្រសិទ្ធភាពក្នុងការបម្រើជាតិមាតុភូមិឱ្យមានកាន់តែរីកចម្រើនថែមទៀត។ លើសពីនេះទៀត ឯកឧត្ដមរដ្ឋលេខាធិការ បានវាយតម្លៃខ្ពស់ និងកោតសរសើរ ចំពោះសមិទ្ធផលដ៏ត្រចះត្រចង់ខាងវិស័យសាធារណការ និងដឹកជញ្ជូន ដែលកើតចេញពីស្នាដៃប្រកបដោយទំនួលខុសត្រូវ និងកិច្ចសហការខ្ពស់រវាងមន្ត្រីក្នុងអង្គភាព មន្ទីរជុំវិញខេត្ត ជាពិសេសកិច្ចសហការស្អិតរមួតជាមួយរដ្ឋបាលខេត្ត។ ជាមួយគ្នានោះដែរ ឯកឧត្ដមរដ្ឋលេខាធិការក៏បានផ្ដាំផ្ញើអោយលោករស់ គឹមធន ដែលជាប្រធានមន្ទីរថ្មីខិតខំបំពេញការងារឱ្យអស់ពីកម្លាំងកាយ កម្លាំងចិត្ត និងពេលវេលា ដើម្បីបន្តដឹកនាំមន្ទីរសាធារណការ និងដឹកជញ្ជូនឱ្យមានការរីកចម្រើនទាំងវិស័យសាធារណការ និងវិស័យដឹកជញ្ជូន ព្រមទាំងបន្ត និងរក្សានូវវប្បធម៌សហការ ចែករំលែក រួមសុខរួមទុក្ខ ជាមួយមន្ត្រីក្រោមឱវាទ ជាពិសេសត្រូវចងចាំ និងអនុវត្តឱ្យបានដាច់ខាតនូវគោលការណ៍ទាំង១១ចំណុចរបស់សម្ដេចតេជោនាយករដ្ឋមន្ត្រី។ ជាការឆ្លើយតប លោករស់ គឹមធន បានប្ដេជ្ញាអនុវត្តឱ្យបានជាដាច់ខាតនូវផែនការយុទ្ធសាស្ត្រចតុកោណដំណាក់កាលទី៤ ផែនការអភិវឌ្ឍនានារបស់រាជរដ្ឋាភិបាល ចូលរួមយ៉ាងសកម្មក្នុងការថែរក្សាសណ្ដាប់ធ្នាប់សាធារណៈ ភូមិឃុំមានសុវត្ថិភាព អភិវឌ្ឍហេដ្ឋារចនាសម្ព័ន្ធដឹកជញ្ជូន ការផ្ដល់សេវាសាធារណៈ និងសកម្មភាពផ្សេងៗទៀត ឱ្យអស់ពីកម្លាំងកាយចិត្ត និងពេលវេលាដោយប្រើគ្រប់មធ្យោបាយ និងនីតិវិធី បន្តកិច្ចសហការជាមួយមន្ទីរអង្គភាពជុំវិញខេត្តយ៉ាងស្អិតរមួត ក្នុងគោលបំណងតែមួយគត់គឺការអភិវឌ្ឍ និងអនុវត្តនូវរាល់ភារកិច្ចដែលរដ្ឋបាលខេត្ត ក៏ដូចជាក្រសួងដាក់ជូន អនុវត្តនូវរាល់បទបញ្ញត្តិដែលក្រសួងដាក់ជូន ជាពិសេសគោលការណ៍ទាំង១១ចំណុចរបស់សម្ដេចតេជោនាយករដ្ឋមន្ត្រី ៕