ថ្ងៃអង្គារ ១១កើត ខែអស្សុជ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី០៩ ខែតុលា ឆ្នាំ២០១៩ នៅទីស្ដីការក្រសួង ឯកឧត្ដម ប៉ាល់ ចន្ទ តារា រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានគណៈកម្មការប្រឡងក្របខណ្ឌ បានអញ្ជើញដឹកនាំកិច្ចប្រជុំស្ដីពីការណែនាំអំពីភារកិច្ចអនុរក្សក្នុងដំណើរការប្រឡងក្របខណ្ឌថ្មី ឆ្នាំ២០១៩ ដោយមានការចូលរួមពីតំណាងមកពីអង្គភាពប្រឆាំងអំពើពុករលួយ ថ្នាក់ដឹកនាំ មន្ត្រីទទួលបន្ទុក និងអនុរក្សក្រសួងសាធារណការ និងដឹកជញ្ជូនផងដែរ។ កិច្ចប្រជុំនេះធ្វើឡើងក្នុងគោលបំណងណែនាំអំពីភារកិច្ចមន្ត្រីទទួលបន្ទុក និងអនុរក្សទាំងអស់ពីនីតិវិធី បទបញ្ញត្តិ ដោយត្រូវអនុវត្តដោយប្រយ័ត្នប្រយែង និងមានទំនួលខុសត្រូវខ្ពស់ និងជាពិសេសនោះគឺមានទំនុកចិត្តខ្ពស់ដោយបានការសហការយ៉ាងជិតស្និទ្ធ និងម៉ឺងម៉ាត់បំផុតពីអង្គភាពប្រឆាំងអំពើពុករលួយនូវគ្រប់ដំណាក់កាលទាំងអស់ក្នុងដំណើរការប្រឡងក្របខណ្ឌថ្មី ឆ្នាំ២០១៩ ដែលនឹងប្រព្រឹត្តទៅនៅថ្ងៃទី១៣ ខែតុលា ឆ្នាំ២០១៩ ខាងមុខនេះ នៅវិទ្យាល័យជាស៊ីមសន្ធរម៉ុក ។ ថ្លែងនៅក្នុងកិច្ចប្រជុំនេះដែរ ឯកឧត្ដមរដ្ឋលេខាធិការបានមានប្រសាសន៍ថា៖ ក្រសួងសាធារណការ និងដឹកជញ្ជូន បាននិងខិតខំប្រឹងប្រែងគ្រប់បែបយ៉ាងសំដៅធានាឱ្យដំណើរការប្រឡងមានភាពរលូន សុក្រិត្យភាព ប្រសិទ្ធភាព និងតម្លាភាពខ្ពស់ ដោយចម្រាញ់យកនូវមន្ត្រីដែលមានសមត្ថភាពពិតប្រាកដ ដោយបានរៀបចំបទបញ្ញត្តិ ការសហការ និងសកម្មភាពផ្សេងៗក្នុងការផ្តល់ភាពយុត្តិធម៌ដល់បេក្ខជនដែលប្រឹងប្រែង និងមានឆន្ទៈពិតប្រាកដក្នុងការបម្រើដល់ក្រសួង និងសង្គមជាតិ ។ ឯកឧត្ដមរដ្ឋលេខាធិការ បានថ្លែងអំណរគុណយ៉ាងជ្រាលជ្រៅដល់មន្ត្រីក្រសួង អនុរក្សទាំងអស់ ដែលបានខិតខំប្រឹងប្រែងអស់ពីកម្លាំងកាយចិត្ត និងពេលវេលា ដើម្បីរៀបចំបទបញ្ញត្តិ និងនីតិវិធីនៃដំណើរការប្រឡង និងថ្លែងអំណរគុណចំពោះអង្គភាពប្រឆាំងអំពើពុករលួយ ដែលបានសហការយ៉ាងជិតស្និទ្ធ និងជួយតាមដានរាល់ដំណាក់កាល ដើម្បីឱ្យដំណើរការនៃការប្រឡងប្រព្រឹត្តទៅប្រកបដោយតម្លាភាព ៕