ថ្ងៃពុធ ៤កើត ខែអស្សុជ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី០២ ខែតុលា ឆ្នាំ២០១៩ ឯកឧត្តម តូច ចាន់កុសល រដ្ឋលេខាធិការ ក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ ឯកឧត្ដមទេសរដ្ឋមន្ត្រី ស៊ុន ចាន់ថុល បានទទួលជួបពិភាក្សាការងារជាមួយគណៈប្រតិភូមូលនិធិរូបិយវត្ថុអន្តរជាតិ ដឹកនាំដោយលោកស្រី ALEKSANDRA ZDZIENICKA សេដ្ឋកិច្ចវិទូខាងប្រតិបត្តិការសារពើពន្ធ នៃនាយកដ្ឋានកិច្ចការសារពើពន្ធ របស់មូលនិធិរូបិយវត្ថុអន្តរជាតិ ដោយមានការចូលរួមពីថ្នាក់ដឹកនាំជាន់ខ្ពស់ក្រសួងផងដែរ។ កិច្ចប្រជុំពិភាក្សានេះផ្ដោតសំខាន់លើ វិស័យហេដ្ឋារចនាសម្ព័ន្ធដឹកជញ្ជូន គម្រោងអភិវឌ្ឍន៍ដើម្បីសម្រេចឱ្យបានតាមទិសដៅអភិវឌ្ឍប្រកបដោយចីរភាព និងការប្រើប្រាស់ហិរញ្ញប្បទាន (ហិរញ្ញប្បទានជាតិ និងហិរញ្ញប្បទានអន្តរជាតិ)។ ថ្លែងក្នុងឱកាសនោះ ឯកឧត្ដមរដ្ឋលេខាធិការបានជម្រាបជូនគណៈប្រតិភូពីការរីកចម្រើនខាងហេដ្ឋារចនាសម្ព័ន្ធដឹកជញ្ជូនទាំងផ្លូវគោក ផ្លូវដែក និងផ្លូវទឹក ការសាងសង់ផ្លូវល្បឿនលឿនភ្នំពេញទៅខេត្តព្រះសីហនុ ការពង្រីកនិងលើកកម្ពស់គុណភាពផ្លូវ ការតភ្ជាប់ពីរាជធានីទៅតាមបណ្ដាខេត្ត ការតភ្ជាប់ជាមួយប្រទេសជិតខាង គម្រោងសាងសង់ផ្លូវ ស្ពាន និងកំពង់ផែទឹកជ្រៅ ផែនការមេឡូជីស្ទិក និងប្រភពថវិកាក្នុងការសាងសង់ជាដើម សំដៅលើកកម្ពស់ និងបង្កើនការដឹកជញ្ជូនផលិតផលរបស់បងប្អូនប្រជាពលរដ្ឋទៅកាន់ទីផ្សារឱ្យបានលឿន និងចំណាយតិច ដើម្បីជំរុញកំណើនសេដ្ឋកិច្ចគ្រួសារ សេដ្ឋកិច្ចជាតិ និងកាត់បន្ថយភាពក្រីក្រ ស្របតាមគោលនយោបាយរបស់រាជរដ្ឋាភិបាល៕