[Koh Santepheap] - យុទ្ធនាការជិះកង់ពិនិត្យមើលផ្លូវជាតិលេខ ដើម្បីជួសជុលជាបន្ទាន់
2019-08-21
ទៅកាន់ទំព័រចុះផ្សាយក្នុង Koh Santepheap
ខេត្តកំពង់ឆ្នាំង ៖ លោកអៀង វុធ អភិបាលរងខេត្តកំពង់ឆ្នាំង បានអំពាវនាវប្រជាពលរដ្ឋអ្នកប្រើប្រាស់
រថយន្តធុនធ្ងន់ទាំងអស់ សូមមេត្តាកុំដឹកលើសចំណុះ ដែលនាំឱ្យខូចខាតផ្លូវរបស់រាជរដ្ឋាភិបាលដែលខំ កសាងកន្លងមក ។ មានប្រសាសន៍បែបនេះ នៅក្នុងឱកាសយុទ្ធនាការជិះកង់ត្រួតពិនិត្យមើលស្ថានភាព ផ្លូវជាតិលេខ៥៣ ចម្ងាយ២៧គីឡូម៉ែត្រ ចេញពីទីរួមខេត្តកំពង់ឆ្នាំង ឆ្ពោះទៅស្រុកទឹកផុស កាលពីព្រឹកថ្ងៃទី ២០ ដែលរៀបចំឡើងដោយមន្ទីរសាធារណការ និងដឹកជញ្ជូនខេត្តកំពង់ឆ្នាំង ដោយមានមន្ត្រីរាជការរបស់មន្ទីរប្រមាណជាង៥០នាក់ចូលរួមផងដែរ ។
លោកអភិបាលរងខេត្តបានបន្តថា កំណាត់ផ្លូវជាតិលេខ៥៣ ចេញពីទីរួមខេត្តកំពង់ឆ្នាំង ទៅស្រុកទឹកផុសមានចម្ងាយជាង៣០គីឡូម៉ែត្រ ប៉ុន្តែនៅព្រឹកនេះ យើងជិះកង់ដើម្បីត្រួតពិនិត្យមើលស្ថាននៅផ្លូវខូចខាត ត្រឹមចម្ងាយ២៧គីម៉ែត្រប៉ុណ្ណោះ ដោយបានមើលឃើញថា ផ្លូវខូចខាត ដោយការដឹកធ្ងន់លើសចំណុះនិងដោយគ្រោះធម្មជាតិផ្សេងៗ ដូចជាក្រឡុកនិងប្រេះស្រាំ បែកជា២ មានតិចតួច ហើយការងារបន្ត គឺ មន្ទីរសាធារណៈការ ជាអ្នកជុសជុលបន្ត ។
ក្នុងឱកាសនោះ លោក កែវ ពៅ ប្រធានមន្ទីរសាធារណការ និងដឹកជញ្ជូនខេត្តកំពង់ឆ្នាំងអោយដឹងថា ការបើកយុទ្ធនាការជិះកង់នេះ មានមន្ត្រីរាជការក្នុងមន្ទីរជាង៥០នាក់និងកង់ជាង៥០គ្រឿង ដោយមកជួបជុំគ្នានៅមន្ទីរសាធារណៈការនិងដឹកជញ្ជូន ខេត្តកំពង់ឆ្នាំង ដោយចាប់ផ្តើមជិះកង់ចេញដំណើរពិនិត្យមើលកំណាត់ផ្លូវជាតិលេខ៥៣នេះ ដើម្បីអោយដឹងថាផ្លូវនេះមានប្រេះស្រការនាគ មានជង្ហុកដែរឬទេ ហើយបើឃើញមាន មន្ទីរមានវិធានការជួសជុល ជាបន្ទាន់កុំអោយខូចខាតកាន់តែធ្ងន់ធ្ងរ។យុទ្ធនាការជិះកង់មើលផ្លូវជាតិជាក់ស្តែងនេះគឺ អនុវត្តតាម អនុសាសន៍ដ៍ខ្ពង់ខ្ពស់របស់ឯកឧត្តម ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន។ សំរាប់យុទ្ធនាការនេះខេត្តកំពង់ឆ្នាំងបានធ្វើចំនួន៤លើករួចមកហើយ គិតទាំងថ្ងៃនេះផងដែរ ។
