ភ្នំពេញ ៖ ស្របពេលកម្ពុជា កំពុងតែមានសុខសន្តិភាព ពេញលេញ លោក ស៊ុន ចាន់ថុល ទេសរដ្ឋមន្ដ្រី រដ្ឋមន្ដ្រីសាធារណការ និងដឹកជញ្ជូន បានថ្លែងថា បច្ចុប្បន្នវិនិយោគិនជប៉ុន កំពុងហូរ ចូលមកកម្ពុជាបណ្តើរៗហើយ ដើម្បីដាក់ទុនរយៈពេលវែង ជាពិសេស វិនិយោគលើផ្នែកបច្ចេកវិទ្យាកម្រិតខ្ពស់។ ក្នុងពិធីជួបសំណេះសំណាល ជាមួយក្រុមនិស្សិតជ័យលាភី អាហារូបករណ៍ ដែលត្រូវទៅសិក្សានៅជប៉ុន ២៤រូប ក្រោមជំនួយឧបត្ថម្ភពីរដ្ឋាភិបាលជប៉ុន នៅថ្ងៃទី៣០ ខែកក្កដា ឆ្នាំ២០១៩ លោក ស៊ុន ចាន់ថុល មានប្រសាសន៍ថា “បច្ចុប្បន្នវិនិយោគិនជប៉ុន កំពុងហូរចូលកម្ពុជាជាបណ្តើរៗ ជាការដាក់ទុនរយៈពេលវែង ជាការវិនិយោគនាំនូវបច្ចេកវិទ្យាកម្រិតខ្ពស់ របៀបដឹកនាំរបស់ក្រុមហ៊ុនល្អ និងបានសំណូមពរឲ្យក្រុមនិស្សិតជួយទាក់ទាញវិនិយោគិនជប៉ុនមកវិនិយោគនៅកម្ពុជា ជួយផ្សព្វផ្សាយផលិតផលកម្ពុជា និងលើកឡើងអំពីកំណែទម្រង់ស៊ីជម្រៅ ដើម្បីកាត់បន្ថយចំណាយផ្លូវការ និងលុបបំបាត់ចំណាយក្រៅផ្លូវការ ដើម្បីទាក់ទាញវិនិយោគិនបន្ថែមទៀត”។ លោកបន្ដថា សុខសន្តិភាព និងស្ថិរភាពនយោបាយដ៏រឹងមាំនៅកម្ពុជា អាចរក្សាស្ថិរភាពម៉ាក្រូសេដ្ឋកិច្ច ស្ថិរភាពអត្រាប្តូរប្រាក់ សិទ្ធិស្មើភាពគ្នាក្នុងការវិនិយោគ លំហូរទេសចរណ៍បរទេសបង្កើតការងារធ្វើ ប្រាក់ចំណូលប្រជាពលរដ្ឋ និងឱកាសកសាងហេដ្ឋារចនាសម្ព័ន្ធរូបវន្ត។ ឆ្លៀតឱកាសនោះដែរ រដ្ឋមន្ដ្រីសាធារណការ គូសបញ្ជាក់ថា ការខិតខំប្រឹងប្រែងរបស់ក្រសួង ក្នុងការបំពេញការងារបម្រើសេវាចាំបាច់ឲ្យបានល្អជូនប្រជាពលរដ្ឋប្រកបដោយភាពជឿជាក់ ធ្វើបានលឿន មានប្រសិទ្ធភាព និងតម្លាភាព ។ ក្នុងនោះរួមមាន ការបង្កើតមណ្ឌលប្តូរ និងពន្យារបណ្ណបើកបរ ការផ្តល់សេវាត្រួតពិនិត្យលក្ខណៈបច្ចេកទេសយានយន្តនៅទូទាំងប្រទេស ដើម្បីបង្ខិតសេវាឲ្យកៀកទៅនឹងប្រជាពលរដ្ឋ៕