ថ្ងៃពុធ ០១រោច ខែអាសាឍ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១៧ ខែកក្កដា ឆ្នាំ២០១៩ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួង​ សាធារណការ និងដឹកជញ្ជូន បានជួបពិភាក្សាការងារ ជាមួយគណៈប្រតិភូនៃវិទ្យាស្ថាន KICT ដោយមានការចូលរួម មន្ត្រីជាន់ខ្ពស់ក្រសួង និងភាគីពាក់ព័ន្ធផងដែរ។ ថ្លែងទៅកាន់ក្រុម គណៈប្រតិភូវិទ្យាស្ថាន KICT នាឱកាសនោះ ឯកឧត្តម ទេសរដ្ឋមន្ត្រី បានគូសបញ្ជាក់ពីភាព មិនប្រក្រតីមួយចំនួន ទាក់ទងនឹងគុណភាព ផ្លូវជាតិលេខ២១ បន្ទាប់ពីបានសាងសង់រួចរាល់ និងបានណែនាំ ឱ្យក្រុមហ៊ុនសាងសង់ ក្រុមហ៊ុនទីប្រឹក្សាបច្ចេកទេស និងមន្ត្រីបច្ចេកទេស របស់ក្រសួងត្រូវតែធ្វើការ ដោយផ្ដោតលើគុណភាពជាចម្បង មុននឹងសម្ពោធដាក់ ឱ្យប្រើប្រាស់ជាផ្លូវការ។ ឆ្លៀតក្នុងឱកាសនោះដែរ ឯកឧត្តម ទេសរដ្ឋមន្ត្រី បានស្នើឱ្យភាគីពាក់ព័ន្ធ លើកឡើងពីបញ្ហាកង្វល់របស់ខ្លួន និងផ្តល់ធាតុចូលទាក់ទង នឹងភាពមិនប្រក្រតី ទាំងនោះ ដើម្បីធ្វើផែនការសកម្មភាព ក្នុងការជួសជុល កែតម្រូវផ្លូវនេះ ឱ្យមានគុណភាពទទួលយកបាន និងរឹងមាំ ប្រើប្រាស់ជាប់បានយូរអង្វែង។ ឯកឧត្តមទេសរដ្ឋមន្ត្រី បានបញ្ជាក់ថា៖ ក្រសួងនឹងបង្កើត ក្រុមការងារមួយ ដើម្បីតាមដានការអនុវត្ត ការជួសជុលផ្នែកខ្លះ នៃកំណាត់ ផ្លូវជាតិលេខ២១ ដែលសាងសង់ មិនស្របតាមលក្ខណៈបច្ចេកទេស ដោយត្រង់ចំណុច ដែលបានជួសជុលរួចមានស្នាមបែក ប្រេះ និងសំបុកមាន់ ជាច្រើនកន្លែង និងបានកំពុងទទួលរង ការខូចខាតបណ្តើរៗ។ សូមជម្រាបជូនថា៖ កាលពីថ្ងៃទី០៦ ខែកក្កដា ឆ្នាំ២០១៩ ឯកឧត្តម ទេសរដ្ឋមន្ត្រី បានអញ្ជើញជិះកង់ ចុះពិនិត្យមើលគុណភាព ស្ថានភាពសាងសង់ ផ្លូវជាតិលេខ២១ ចាប់ពីពហុកីឡដ្ឋានស្រុកកោះធំ រហូតដល់ភូមិជ្រៃធំ ឃុំសំពៅពូន (ព្រំប្រទល់ប្រទេសវៀតណាម) ស្ថិតក្នុងស្រុកកោះធំ ខេត្តកណ្ដាល ហើយបានពិនិត្យឃើញ ផ្នែកខ្លះនៃកំណាត់ផ្លូវជាតិ លេខ២១ មានស្នាមបែក ប្រេះ និងសំបុកមាន់ ជាច្រើនកន្លែង។ជាមួយគ្នានេះផងដែរ ឯកឧត្តមទេសរដ្ឋមន្ត្រីបានស្នើឱ្យ KICT ពិនិត្យលទ្ធភាព ជួយផ្តល់ជញ្ជីងថ្លឹង រថយន្តចល័ត ដើម្បីថ្លឹងរថយន្តដឹកទំនិញ លើសកម្រិតកំណត់ ពិសេសថ្លឹងរថយន្ត ដែលធ្វើដំណើរ ក្នុងទិសដៅចរាចរណ៍ចេញ ពីប្រទេសវៀតណាម ចូលមកកាន់ទឹកដីកម្ពុជា ដោយសាផ្លូវនេះមានលក្ខណៈតូចចង្អៀត មិនអាចសាងសង់ស្ថានីយថ្លឹងរថយន្តនៅម្ខាងផ្លូវ ជាប់ទន្លេបាសាក់បាន៕