សិស្សដែលកំពុងសិក្សាថ្នាក់ទី១២ នៅវិទ្យាល័យចំនួន៤ ក្នុងស្រុកកោះធំ ខេត្តកណ្ដាល ប្រមាណជាង៧០០នាក់ ទទួលបានការបំពាក់បំប៉ន ដើម្បីត្រៀមប្រឡងសញ្ញាបត្រមធ្យម សិក្សាទុតិយភូមិ ដែលនឹងត្រូវធ្វើឡើងនៅថ្ងៃទី១៩ ខែសីហា ឆ្នាំ២០១៩ខាងមុខនេះ។ ក្នុងពិធីសំណេះសំណាល និងបើវគ្គតម្រង់ទិស កាលពីរសៀលថ្ងៃទី៣ ខែកក្កដា ឆ្នាំ២០១៩ ឯកឧត្តម ឯក រ័ត្ន អនុប្រធានក្រុមការងារចុះជួយស្រុកកោះធំ បានបញ្ជាក់ថា វគ្គបំប៉នតម្រង់ ទិសនេះធ្វើឡើងក្រោមការយកចិត្តទុកដាក់ពី ឯកឧត្តម ស៊ុន ចាន់ថុល ប្រធានក្រុមការងារ ថ្នាក់ជាតិចុះជួយស្រុកកោះធំផ្ទាល់តែម្ដង។ ឯកឧត្តម ឯក រ័ត្ន បានលើកឡើងថា ការរៀបចំវគ្គតម្រង់ទិសនេះឡើង ក្នុងគោលបំណងដើម្បី ផ្ដល់ជូនសិស្សានុសិស្សថ្នាក់ទី១២ ក្នុងស្រុកកោះធំ ដែលនឹងត្រូវចូលរួមប្រឡងនាពេលខាងមុខ ឲ្យបានយល់ដឹង និងស្វែងយល់បន្ថែម អំពីគន្លឹះសំខាន់ៗមួយចំនួន ដែលត្រូវយកចិត្តទុក ដាក់ដើម្បីទទួលបានជោគជ័យ និងសម្រាប់ត្រៀមខ្លួន ឈានទៅចាប់យកមុខវិជ្ជា និងជំនាញ ដើម្បីបន្ដការសិក្សានៅតាមគ្រឹះស្ថានសិក្សានានា។