[Raksmey News] - រដ្ឋមន្ត្រីក្តៅស្លឹកត្រចៀកពេលឃើញផ្លូវជួសជុលមិនត្រូវតាមស្តង់ដា
2019-06-14
ទៅកាន់ទំព័រចុះផ្សាយក្នុង Raksmey News
ដោយមូលសម្បត្តិ/ភ្នំពេញ:លោកស៊ុនចាន់ថុលរដ្ឋមន្ត្រីក្រសួងសាធារណការនិងដឹកជញ្ជូនបានលាន់មាត់ប្រតិកម្មទៅនឹងក្រុមហ៊ុនមួយជួសជុលកំណាត់ផ្លូវជាតិលេខ៣មិនជាប់ល្អធ្វើហើយខូចវិញដោយលើកឡើងថា”ឈប់ទទួលយកផ្លូវធ្វើជាប់ទៀតហើយ តែយកផ្លូវធ្វើមាំ”។
លោករដ្ឋមន្ត្រីកំណត់ឱ្យក្រុមហ៊ុនជួសជុលនិងសាងសង់កំណាត់ផ្លូវជាតិលេខ៣ពីទីរួមខេត្តកំពតទៅរង្វង់មូលវាលរេញពិនិត្យនិងកែតម្រូវឡើងវិញឱ្យបានត្រឹមត្រូវតាមបទដ្ឋានបច្ចេកទេសទើបក្រសួងអាចទទួលយកបាន។
លោករដ្ឋមន្ត្រីនិងក្រុមការងារបច្ចេកទេសបានឃើញជាក់ស្តែងពេលចុះត្រួតពិនិត្យគុណភាពកំណាត់ផ្លូវជាតិលេខ៣ចាប់ពីទីរួមខេត្តកំពតទៅរង្វង់មូលវាលរេញដែលកំពុងជួសជុលស្ថិតក្នុងភូមិសាស្ត្រខេត្តកំពត និងខេត្តព្រះសីហនុកាលពីពេលថ្មីៗនេះ។កំណាត់ផ្លូវជាតិលេខ៣ពីទីរួមខេត្តកំពតទៅរង្វង់មូលវាលរេញ(ចំណុចប្រសព្វផ្លូវជាតិលេខ៤និងលេខ៣)មានប្រវែងសរុប៥៤,៣០គមស្ថិតក្រោមគម្រោងជួសជុលនិងសាងសង់ឡើងវិញជាប្រភេទផ្លូវបេតុងកៅស៊ូ(AC)។
កំណាត់ផ្លូវនេះត្រូវបានចាប់ផ្ដើមជួសជុលនិងសាងសង់ចាប់ពីខែកុម្ភៈឆ្នាំ២០១៨ដោយប្រើប្រាស់រយៈពេល៥៤ខែអនុវត្តគម្រោងមានរយៈពេល១៨ខែនិងថែទាំប្រចាំរយៈពេល៣៦ខែចំណាយថវិកាប្រមាណ១២,០៦១លានដុល្លារសហរដ្ឋអាមេរិកក្រោមគម្រោងឥណទានធនាគារពិភពលោក។បច្ចុប្បន្នគម្រោងផ្លូវនេះអនុវត្តការជួសជុលនិងសាងសង់សម្រេចបាន៦៧,៥០ភាគរយហើយនិងគ្រោងនឹងបញ្ចប់នៅខែសីហា ឆ្នាំ២០១៩ ខាងមុខនេះ។
ការចុះត្រួតពិនិត្យនេះក្រសួងបានរកឃើញថា៖ផ្នែកខ្លះនៃកំណាត់ផ្លូវនេះសាងសង់មិនទាន់ស្របតាមលក្ខណៈបច្ចេកទេសដោយត្រង់ចំណុចដែលបានជួសជុលរួចមានស្នាមបែកប្រេះនិងសំបុកមាន់ដែលត្រូវចាត់វិធានការដោះស្រាយឲ្យបានទាន់ពេលវេលា។ជាមួយគ្នានេះផងដែរលោករដ្ឋមន្ត្រីបានដាក់កំហិតឲ្យក្រុមហ៊ុនពិនិត្យនិងកែតម្រូវឡើងវិញឲ្យបានត្រឹមត្រូវតាមបទដ្ឋានបច្ចេកទេសទើបក្រសួងអាចទទួលយកបាន។
ទន្ទឹមនឹងនេះលោកក៏បានបញ្ជាក់ពីគោលជំហរក្នុងការពង្រឹងការគ្រប់គ្រងលើការសាងសង់ឱ្យបានម៉ឺងម៉ាត់ដើម្បីធានាគុណភាពផ្លូវប្រើប្រាស់ជាប់បានយូរអង្វែងជាផលប្រយោជន៍សម្រាប់សេដ្ឋកិច្ចជាតិនិងសម្រាប់បម្រើដល់ភាពងាយស្រួលក្នុងជីវភាពរស់នៅនិងការធ្វើដំណើរទៅមកព្រមទាំងប្រកបអាជីកម្មផ្សេងៗផងដែរ។
លោកបានសង្កត់ធ្ងន់ថា៖ ក្រសួងសាធារណការ និងដឹកជញ្ជូន ក៏ដូចជារាជរដ្ឋាភិបាលកម្ពុជា ប្រកាន់នូវគោលជំហរយើង “ឈប់ទទួលយកផ្លូវធ្វើជាប់ទៀតហើយ តែយកផ្លូវធ្វើមាំ”៕S/
