[Cambodia Police] - សម្ដេចក្រឡាហោម ស ខេង អញ្ជើញជាអធិបតីក្នុងទិវាសប្ដាហ៍ជាតិសុវត្ថិភាពចរាចរណ៍លើកទី១២ នៅស្រុកពញាក្រែក
2019-06-11
ទៅកាន់ទំព័រចុះផ្សាយក្នុង Cambodia Police
ត្បូងឃ្មុំ ៖ នៅព្រឹកថ្ងៃអង្គារ ៩កើត ខែជេស្ឋ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃ ទី១១ ខែមិថុនា ឆ្នាំ២០១៩នេះ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក បានអញ្ជើញជាអធិបតីក្នុងទិវាសប្ដាហ៍ជាតិសុវត្ថិភាពចរាចរណ៍លើកទី១២ ប្រារព្ធនៅស្រុកពញាក្រែក ខេត្តត្បូងឃ្មុំ ។
ក្រោមអធិបតីភាព សម្ដេចក្រឡាហោម ស ខេង ទិវាសប្ដាហ៍ជាតិសុវត្ថិភាពចរាចរណ៍លើកទី១២ នាឱកាសនេះ មានការអញ្ជើញចូលរូមពីភាគីពាក់ព័ន្ធជាង៤ពាន់នាក់ ដោយជាកិច្ចចាប់ផ្ដើមអភិបាល នៃគណៈអភិបាលខេត្តត្បូងឃ្មុំ បានអញ្ជើញថ្លែងរបាយការណ៍ស្វាគមន៍ ជូនអង្គពិធី មុននឹងសម្ដេចអញ្ជើញថ្លែងសុន្ទរកថា និងផ្ដល់អនុសាសន៍ពាក់ព័ន្ធនឹងការងារចរាចរណ៍។
ក្នុងនាមរាជរដ្ឋាភិបាល សម្ដេចក្រឡាហោម ស ខេង បានថ្លែងអំណរគុណចំពោះអង្គពិធី ដែលបានអញ្ជើញចូលរួមក្នុងទិវាសប្ដាហ៍ជាតិសុវត្ថិភាពចរាចរណ៍នាថ្ងៃនេះ ដោយសម្ដេចចាត់ទុកពិធីនេះថា ជាការសម្ដែងឆន្ទៈនយោបាយ និងសកម្មភាពចូលរួមជាមួយសហគមន៍អន្តរជាតិ ក្នុងការអនុវត្តឲ្យបានជោគជ័យនូវផែនការសុវត្ថិភាពចរាចរណ៍របស់អង្គការសហប្រជាជាតិ។
សម្ដេចក្រឡាហោមបានមានប្រសាសន៍ថាស្ថានភាពគ្រោះថ្នាក់ចរាចរណ៍នៅកម្ពុជា ភាគច្រើនតែងតែកើតមាននៅក្នុងឱកាសបុណ្យប្រពៃណីជាតិធំៗ ពិសេសបុណ្យចូលឆ្នាំខ្មែរ និងភ្ជុំបិណ្ឌ ព្រោះតែដូច្នេះហើយទើបរាជរដ្ឋាភិបាល បានកំណត់ កាលបរិច្ឆេទ ដើម្បីប្រារព្ធទិវាសប្ដាហ៍ជាតិ សុវត្ថិភាពចរាចរណ៍ផ្លូវគោក ដើម្បីកាត់បន្ថយគ្រោះថ្នាក់ចរាចរណ៍។
សម្ដេចបានគូសបញ្ជាក់ថា កំណើនសេដ្ឋកិច្ច និងការអភិវឌ្ឍផ្ដល់លទ្ធភាពឲ្យពលរដ្ឋទិញមធ្យោបាយធ្វើដំណើរកាន់តែច្រើននាំឲ្យចរាចរណ៍កាន់តែស្មុគស្មាញ និងមានគ្រោះថ្នាក់ច្រើន ព្រោះតែការបើកបរលើសល្បឿន មិនគោរពសិទ្ធអាទិភាព សញ្ញាចរាចរណ៍ វ៉ាជែងប្រថុយប្រថាន ក្រោមឥទ្ធិពលគ្រឿងស្រវឹង គ្រឿងញៀន និងមិនពាក់ខ្សែក្រវ៉ាត់សុវត្ថិភាពជាដើម។
សម្ដេចបន្តថាបញ្ហានេះ បានធ្វើឲ្យបាត់បង់ជីវិតមនុស្សកាន់តែច្រើន ធ្វើឲ្យខូចខាតទ្រព្យសម្បត្តិសាធារណៈ និងឯកជន បន្សល់ទុកកូនកំព្រា ស្ត្រីមេម៉ាយ ជនមានពិការភាព និងផលវិបាកជាច្រើនក្នុងសង្គម ។ សម្ដេចថាត្រឹមតែរយៈពេល៣ខែ ឆ្នាំ២០១៩នេះ គ្រោះថ្នាក់ចរាចរណ៍បានកើនឡើងជាង៣១ភាគរយ មានអ្នកស្លាប់៥១៣នាក់ និងរបួសជាង១៥០០នាក់។
ត្រង់ចំណុចនេះ សម្ដេចបានគូសបញ្ជាក់ថា មកដល់ជិតពាក់កណ្ដាលឆ្នាំ២០១៩នេះ គ្រោះថ្នាក់ចរាចរណ៍មិនមានការធ្លាក់ចុះនោះទេ ដែលនេះជាការបង្ហាញថាការគោរពច្បាប់ក្នុងការធ្វើដំណើរនៅតែមានការធ្លាក់ចុះ បូកផ្សុំនឹងកំណើនយានយន្ត ដោយសម្ដេចបានស្នើឲ្យគ្រប់ភាគីកត់សំគាល់ចំពោះបញ្ហានេះ ហើយរួមគ្នាមានវិធានការ និងអនុវត្តឲ្យមានប្រសិទ្ធភាព។
សម្ដេចបានអំពាវនាវអ្នកប្រើប្រាស់ផ្លូវទាំងអស់យកចិត្តទុកដាក់គោរពច្បាប់ បង្កើនការប្រុងប្រយ័ត្ន មានសីលធម៌ និងយោគយល់អធ្យាស្រ័យ ដែលប្រការនេះជាឱសថបំបាត់គ្រោះថ្នាក់ចរាចរណ៍ដ៏មានប្រសិត្ធភាព ហើយសមាសភាពគណៈកម្មាធិការ និងអនុគណៈកម្មការជាតិសុវត្ថិភាពចរាចរណ៍ទាំងអស់ ត្រូវបង្កើនសកម្មភាពកាត់បន្ថយគ្រោះថ្នាក់ចរាចរណ៍ឲ្យបាន ។
ពីវេទិការអធិបតីនេះដែរ សម្ដេចក្រឡាហោម ស ខេង បានក្រើនរំលឹកឲ្យអាជ្ញាធរខេត្តទប់ស្កាត់ការនាំចូលយានយន្ត ពិសេសម៉ូតូគេចពន្ធពីប្រទេសជិតខាង និងត្រូវផ្ដល់សេវាជូនពលរដ្ឋ ពាក់ព័ន្ធនឹងយានយន្តឲ្យបានត្រឹមត្រូវ ហើយក្រុមហ៊ុន ដឹកជញ្ជូនទាំងអស់ត្រូវបង្កើនការយកចិត្តទុកដាក់ ដើម្បីធានាថាអ្នកបើកបររបស់ខ្លួន នឹងមិនបានប្រើប្រាស់គ្រឿងញៀន និងគ្រឿងស្រវឹងជាដាច់ខាត ៕
