[Angrut] - រថយន្តដឹងដំឡូងមីតែមួយ ចូលថ្លឹងស្ថានីយជញ្ជីង២កន្លែង ទម្ងន់ខុសគ្នា២តោន
2017-10-13
ទៅកាន់ទំព័រចុះផ្សាយក្នុង Angrut
កំពង់ធំ ៖ រឿងរ៉ាវកើតទុកមិនសុខក្នុងចិត្ត ហើយកាន់តែមិនអស់ចិត្តទៀតព្រោះខាតលុយខាតកាក់ចូលដើម ធ្វើអោយអ្នកស៊ីឈ្នួលដឹកដំឡូងមីម្នាក់ ទូរស័ព្ទចូលទៅសារព័ត៌មានក្នុងស្រុកមួយ(Fresh News) នៅថ្ងៃទី១៣ តុលា ២០១៧នេះ ដើម្បីសូមអំពាវនាវទៅកាន់លោកទេសរដ្ឋមន្ដ្រី ស៊ុន ចាន់ថុល ឲ្យជួយរកខុសត្រូវ និងវែកញែកមន្ដ្រីខិលខូច នៅតាមស្ថានីយ៍ជញ្ជីង លើដងផ្លូវជាតិផង ។
លោក សុភាស់ ដែលជាម្ចាស់រថយន្ដហ៊ីយ៉ាន់ដាយ កង់១០មួយគ្រឿង ត្រូវបានគេជួលអោយដឹកដំឡូងមីពីស្រុកគូលែន ខេត្តសៀមរាប ដើម្បីនាំចេញទៅកាន់ប្រទេសវៀតណាម ដោយបានប្រាក់ឈ្នួល១លានរៀល ក្នុងមួយជើង ហើយបើគិតពីថ្លៃចំណេញវិញ គឺនៅសល់តែប្រមាណ៤០ម៉ឺនរៀលប៉ុណ្ណោះ សល់ពីការចំណាយទៅលើថ្លៃប្រេង ការហូបចុក និងការស្នាក់នៅតាមផ្លូវ ។
ការដឹកដំឡូងមីមួយជើងនេះ ស្រាប់តែខាតឡុងចុងលើសដើម ដោយសារតែត្រូវបានមន្ដ្រីនៅស្ថានីយ៍ជញ្ជីង ក្នុងស្រុកសន្ទុក ខេត្តកំពង់ធំ លើផ្លូវជាតិលេខ៦ ចាប់ផាកពិន័យដោយអះអាងថា ការដឹកជញ្ជូននេះលើសទម្ងន់រហូតដល់ជាង៥តោន ដូច្នេះគឺតម្រូវអោយបង់ពិន័យចំនួន១លានរៀល តែដោយការសុំអង្វរករពីម្ចាស់រថយន្ដតាំងពីវេលាម៉ោង៨យប់ថ្ងៃទី១២ ខែតុលា រហូតដល់វេលាម៉ោង២និង៣០នាទីរសៀល ថ្ងៃទី១៣ ខែតុលា នេះ ទើបអាចបន្ដដំណើរទៅមុខបាន បន្ទាប់ពីមន្ដ្រីនៅស្ថានីយ៍ជញ្ជីងមួយនេះ សុខចិត្តបញ្ចុះឲ្យត្រឹម៧០ម៉ឺនរៀល ។តម្លៃ៧០ម៉ឺនរៀល ដែលបង់ជូនទៅមន្ដ្រីស្ថានីយ៍ជញ្ជីង គឺពួកគេមិនចេញវិក្កិយបត្រឲ្យនោះឡើយ ពោលទាល់តែបង់គ្រប់១លានរៀល ទើបអាចចេញវិក្ក័យបត្រជូន ។
លោក សុភាស់ បញ្ជាក់ថា នៅពេលដែលរថយន្ដរបស់លោកធ្វើដំណើរដល់ស្ថានីយ៍ជញ្ជីង ដើម្បីចូលថ្លឹងស្រាប់តែពេលនោះ ក្រុមមន្ដ្រីអះអាងថា លើសរហូតដល់៥តោនជាង ពេលនោះលោកក៏បានតបទៅមន្ដ្រី និងចង់ឲ្យចូលថ្លឹងម្ដងទៀត ដោយសារតែពេលចូលថ្លឹងនៅស្ថានីយ៍ស្រុកពួក គឺមន្ដ្រីនៅទីនោះអះអាងថា លើសតែជាង៣តោនប៉ុណ្ណោះ ប៉ុន្ដែត្រូវបានក្រុមមន្ដ្រីបដិសេធ និងមិនឲ្យចូលថ្លឹងទៀតឡើយ ។
លោក សុភាស់ បានដាក់ជាចម្ងល់ទៅកាន់ថ្នាក់ដឹកនាំក្រសួងសាធារណការ និងដឹកជញ្ជូន ដោយហេតុថា លោកទទួលស្គាល់ពីកំហុសរបស់ខ្លួន ដែលដឹកដំឡូងមីលើសទម្ងន់ ព្រោះចង់បានផលចំណេញរៀងច្រើនបន្ដិច ប៉ុន្ដែនៅពេលចូលថ្លឹងនៅស្ថានីយ៍ជញ្ជីងក្នុងស្រុកពួក ខេត្តសៀមរាប ត្រូវបានមន្ដ្រីនៅទីតាំងជញ្ជីងនោះ អះអាងថា លើសតែជាង៣តោនប៉ុណ្ណោះ ផ្ទុយទៅវិញ ពេលរថយន្ដរបស់លោកតម្រូវចូលទៅថ្លឹងនៅស្ថានីយ៍ជញ្ជីង ក្នុងស្រុកសន្ទុក ស្រាប់តែក្រុមមន្ដ្រីអះអាងថា លើសរហូតដល់ចំនួន៥តោន ដែលតម្រូវឲ្យបង់ពិន័យដល់១លានរៀលជាកំហិត ៕
