(ភ្នំពេញ)៖ លោកទេសរដ្ឋមន្រ្តី ស៊ុន ចាន់ថុល រដ្ឋមន្ត្រីក្រសួងសារធារណការ និងដឹកជញ្ជូន បានស្នើឱ្យក្រុមហ៊ុន 4PX Express Co. Ltd. ពិចារណាក្នុងការធ្វើពាណិជ្ជកម្មតាមប្រព័ន្ធអេឡិចត្រូនិក លើព្រលានយន្តហោះនៅខេត្តកំពង់ឆ្នាំង ដែលកន្លងមកត្រូវបានប្រើប្រាស់ ជាមជ្ឈមណ្ឌលដឹកជញ្ជូនទំនិញរបស់ខ្លួន ដោយសារតែខេត្តនេះ ជាទីតាំងឋិតនៅចំណុចកណ្តាល សម្រាប់ការតភ្ជាប់ តាមផ្លូវដែក ផ្លូវទឹក ផ្លូវហាយវេ និងផ្លូវជាតិផងដែរ។ លោកទេសរដ្ឋមន្ត្រី បានស្នើយ៉ាងដូចនេះ នាថ្ងៃទី១៨ ខែមីនា ឆ្នាំ២០១៩ ក្នុងឱកាសដែលលោកបានជួបពិភាក្សាការងារ ជាមួយលោក Kevin Li ប្រធានគ្រប់គ្រងទូទៅនៃក្រុមការងារបណ្តាញ Global Parcel Network Team របស់ក្រុមហ៊ុន 4PX Express Co. , Ltd. មុនពេលចុះហត្ថលេខាលើអនុស្សរណៈនៃការយោគយល់ ស្តីពីភាពជាដៃគូរដ្ឋ និងឯកជន រវាងក្រសួងសាធារណការ និងដឹកជញ្ជូន(MPWT) អង្គការUNDP និងក្រុមហ៊ុន 4PX Express Co. Ltd. នៅទីស្តីការក្រសួងសាធារណការ និងដឹកជញ្ជូន ។ ថ្លែងក្នុងឱកាសជួយពិភាក្សាការងារនោះ លោកទេសរដ្ឋមន្ត្រី ស៊ុន ចាន់ថុល បានលើកឡើងយ៉ាងដូចនេះថា «ខ្ញុំសូមសម្តែងនូវការកោតសរសើរ និងការគាំទ្រយ៉ាងពេញទំហឹងចំពោះ ដំណោះស្រាយឡូជីស្ទីក ក្នុងការធ្វើពាណិជ្ជកម្មតាមប្រព័ន្ធអេឡិចត្រូនិកនៅកម្ពុជា។ លោកទេសរដ្ឋមន្រ្តី បានស្នើបន្ថែមឱ្យក្រុមហ៊ុនពិចារណា លើព្រលានយន្តហោះនៅកំពង់ឆ្នាំង ដែលកន្លងមកត្រូវបានប្រើប្រាស់ជាមជ្ឈមណ្ឌលដឹកជញ្ជូនទំនិញរបស់ខ្លួន ដោយសារតែខេត្តនេះជាទីតាំងឋិតនៅចំចំណុចកណ្តាល សម្រាប់ការតភ្ជាប់ តាមផ្លូវដែក ផ្លូវទឹក ផ្លូវហាយវេ និងផ្លូវជាតិផងដែរ»។ សូមបញ្ជាក់ដែរថា ជំនួបពិភាក្សារវាងលោកទេសរដ្ឋមន្រ្តី ស៊ុន ចាន់ថុល និងតំណាងក្រុមហ៊ុន 4PX Express Co. , Ltd. នេះ មានគោលបំណងលើកកម្ពស់ ការធ្វើពាណិជ្ជកម្មតាមប្រព័ន្ធអេឡិចត្រូនិក ឆ្លងកាត់ព្រំដែនក្នុងទីផ្សារកម្ពុជា ក៏ដូចជាកសាងសមត្ថភាព ដល់សហគ្រាសខ្នាតតូច និងមធ្យមក្នុងស្រុក ដើម្បីបង្ហាញផលិតផលរបស់ខ្លួន ក្នុងវេទិកានៃការធ្វើពាណិជ្ជកម្មតាមប្រព័ន្ធអេឡិចត្រូនិក ទូទាំងសកលលោក ដែលជាបុត្រសម្ព័ន្ធរបស់ក្រុមហ៊ុន 4PX Express៕