ផ្លូវជាតិលេខ ៧១c គ្រោងនឹងបើកការដ្ឋានសាងសង់លើកកម្ពស់គុណភាព និងពង្រីកនៅចុង ឆ្នាំ២០១៩ នេះ --- ថ្ងៃព្រហស្បតិ៍ ៩កើត ខែផល្គុន ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៤ ខែមីនា ឆ្នាំ២០១៩ ឯកឧត្ដម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានដឹកនាំគណប្រតិភូចុះពិនិត្យស្ថានភាព និងសិក្សាលទ្ធភាពក្នុងការសាងសង់ពង្រីក និងលើកកម្ពស់គុណភាពផ្លូវជាតិលេខ៧១c ។ ផ្លូវនេះមានប្រវែងសរុបចំនួន ១១៤,៦២គីឡូម៉ែត្រ បែកចេញពីផ្លូវជាតិលេខ ៧១ ត្រង់ចំណុចផ្សារចំការលើ ស្រុកចំការលើ ខេត្តកំពង់ចាម ឆ្លងស្ពានស្ទឹងត្រង់ ទៅកាន់ភូមិសាស្ត្រខេត្តត្បូងឃ្មុំ។ គម្រោងសាងសង់លើកកម្ពស់គុណភាពផ្លូវនេះ ត្រូវបានសិក្សាដោយក្រុមហ៊ុនសៀងហៃ ហើយបច្ចុប្បន្នក្រុមហ៊ុននេះកំពុងសិក្សាបន្ថែមត្រង់ចំណុចដែលទទួលរងដោយគ្រោះទឹកជំនន់ ដើម្បីរកដំណោះស្រាយសមស្រប សំដៅធានាឱ្យបានគុណភាពខ្ពស់។ សូមបញ្ជាក់ថា៖ ផ្លូវនេះគ្រោងនឹងសម្ពោធបើកការដ្ឋានសាងសង់នៅចុងឆ្នាំ២០១៩នេះ បន្ទាប់ពីការសិក្សាលទ្ធភាពចប់សព្វគ្រប់។