[Kley Kley News] - ក្រុមហ៊ុនថៃ១ សន្យាសាងសង់ព្រះពុទ្ធរូបធំជាងគេក្នុងលោក និងរថភ្លើងល្បឿនលឿននៅខេត្តកែប
2019-02-04
ទៅកាន់ទំព័រចុះផ្សាយក្នុង Kley Kley News
ក្រុមហ៊ុនវិនិយោគ១មកពីប្រទេសថៃ បានសន្យាថា នឹងសាងសង់ព្រះពុទ្ធរូបដែលមានកម្ពស់ និងទំហំធំជាងគេលើពិភពលោក និងរថភ្លើងដែលមានល្បឿនលឿនពីខេត្តព្រះសីហនុ ទៅកាន់ខេត្តកែប ដើម្បីទាក់ទាញអ្នកទេសចរ។ ការលើកឡើងនេះ ធ្វើឡើងក្នុងជំនួបរវាងថ្នាក់ដឹកនាំក្រុមហ៊ុនថៃ និងលោក កែន សត្ថា អភិបាលខេត្តកែប នារសៀលថ្ងៃទី៤ ខែកុម្ភៈ ឆ្នាំ២០១៩។
លោកអភិបាលខេត្ត បានរៀបរាប់ពីភូមិសាស្ត្រ ប្រជាសាស្រ្ត សក្តានុពលរបស់ខេត្តកែប ដើម្បីបង្ហាញជូនគណៈប្រតិភូរបស់ក្រុមហ៊ុនវិនិយោគថៃ។ បន្ថែមពីនេះ លោកក៏បញ្ជាក់ពីបញ្ហាប្រឈមផ្សេងៗ ដែលមានសម្រាប់ខេត្តទាំងមូល និងចំពោះអាជីវករដែលកំពុងបម្រើសេវាទេសចរណ៍នៅខេត្តកែប ថាភ្ញៀវដែលទៅលេងខេត្តកែប គឺតាមរដូវកាល មិនមែនទៅលេងកែបគ្រប់រដូវកាលនោះទេ។
បន្ទាប់ពីបានស្តាប់ និងទស្សនាវីដេអូអំពីសក្កានុពលទេសចរណ៍របស់ខេត្តកែប រួចមក គណៈប្រតិភូក្រុមហ៊ុនវិនិយោគរបស់ថៃ ក៏នឹងមានគម្រោងបង្កើតតំបន់ទេសចរណ៍ឱ្យបានទូលាយ និងច្រើនជាងនេះ ដើម្បីទាក់ទាញភ្ញៀវទេសចរបរទេសឱ្យបានច្រើនជាងនេះបន្ថែមទៀតផងដែរ៕
