ផ្លូវក្រវាត់ក្រុងទី៣ ប្រវែង ៥២ ៩៨៣ គីឡូម៉ែត្រ ដែលឆ្លងកាត់រាជធានីភ្នំពេញ និង ខេត្តកណ្តាល បានបើកការដ្ឋានសាងសង់ហើយ នាព្រឹកថ្ងៃទី ១៤ ខែមករា ឆ្នាំ ២០១៩នេះ ក្រោមអធិបតីភាព សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និង លោក វ៉ាង វិនធៀន (Wang Wentian) ឯកអគ្គរដ្ឋទូតចិន ប្រចាំនៅកម្ពុជា ។តាមគម្រោងនៃការសាងសង់ផ្លូវក្រវាត់ក្រុងទី៣នេះនឹងត្រូវចំណាយថវិកាប្រមាណជា ២៧៣លានដុល្លារ ដែលជាហិរញ្ញប្បទានសម្បទានពីរដ្ឋាភិបាលចិន និង ថវិកាបដិភាគរបស់រាជរដ្ឋាភិបាលកម្ពុជាផងដែរ ។ ផ្លូវនេះឆ្លងកាត់រាជធានីភ្នំពេញជាង ១៥គីឡូម៉ែត្រ និង ឆ្លងកាត់ភូមិសាស្ត្រខេត្តកណ្តាល ប្រវែងជិត ៣៨គីឡូម៉ែត្រ ដែលមានចំណុចចាប់ផ្តើមពីគីឡូម៉ែត្រ ១៤+១០៥ នៃផ្លូវជាតិលេខ៤ និង ចំណុចចុងបញ្ចប់នៅគីឡូម៉ែត្រ ២៤+៨៤០ នៃផ្លូវជាតិលេខ១។ ទំហំទទឹងផ្លូវរហូតដល់ទៅ ២៧ម៉ែត្រ សម្រាប់ទីប្រជុំជន និង សម្រាប់ក្រៅទីប្រជុំជនវិញមានទំហំទទឹងផ្លូវ ២៥ម៉ែត្រ ដោយមានដាក់អំពូលបំភ្លឺផ្លូវសម្រាប់កំណាត់ផ្លូវក្នុងក្រុង និង ដើមឈើលម្អសម្រាប់កំណាត់ផ្លូវក្រៅក្រុង។ ផ្លូវក្រវាត់ក្រុងខ្សែទី៣ គឺជាផ្លូវដ៏សំខាន់ក្នុងការជួយកាត់បន្ថយការកកស្ទះ និង ជួយសម្រួលចរាចរណ៍ក្នុងរាជធានីភ្នំពេញ។ ម្យ៉ាងទៀត គឺជាការតភ្ជាប់ផ្ទៃក្នុង និង សមាហរណកម្មតំបន់ ពិសេសតភ្ជាប់ផ្លូវអាស៊ានហាយវ៉េ និង ផ្លូវរបៀងសេដ្ឋកិច្ចសំខាន់ៗរបស់មហាអនុតំបន់មេគង្គ រួមចំណែកក្នុងការសម្រួលការដឹកជញ្ជូនឆ្លងកាត់ព្រំដែន ជំរុញពាណិជ្ជកម្មអន្តរជាតិ និង ប្រែក្លាយទឹកដីដែលនៅសងខាងផ្លូវខ្សែក្រវាត់ក្រុងនេះ ទៅជាតំបន់អភិវឌ្ឍន៍ថែមទៀតផង។សម្តេចតេជោនាយករដ្ឋមន្ត្រី បានមានប្រសាសន៍នៅក្នុងឱកាសនោះថា ការកសាង និងអភិវឌ្ឍន៍ប្រទេសកម្ពុជា គឺបានចាប់ផ្តើមពីការអនុវត្តនូវយុទ្ធសាស្ត្រចតុកោណតាំងពី ៣២ឆ្នាំមុន ដែលបានផ្តោតទៅលើ ផ្លូវ, ទឹក, ភ្លើង និង មនុស្ស ប៉ុន្តែចាប់ពីឆ្នាំ២០១៣ មក យើងបានប្តូរមកយក មនុស្ស, ផ្លូវ, ទឹក, និង ភ្លើងវិញ ដោយយើងបានប្តូរយកធនធានមនុស្សជាវិស័យអាទិភាពមុខគេ ។ បច្ចុប្បន្ន កម្ពុជាមានផ្លូវធ្វើដំណើរច្រើន រួមទាំងស្ពានឆ្លងកាត់ទន្លេ និងស្ពានអាកាសចំនួន៥ នៅក្នុងទីក្រុងភ្នំពេញដែលបានធ្វើឱ្យប្រជាពលរដ្ឋរស់នៅនិងធ្វើដំណើរកាន់តែងាយស្រួល។ ហើយកម្ពុជាធ្វើសេដ្ឋកិច្ចមិនពឹងផ្អែកតែលើវិស័យតែមួយមុខនោះទេ គឺកម្ពុជាធ្វើសេដ្ឋកិច្ច ពឹងផ្អែកលើវិស័យជាច្រើនដូចជា វិស័យកសិកម្ម កសិឧស្សាហកម្ម ឧស្សាហកម្ម សេវាកម្ម និង សំណង់ជាដើម។ កម្ពុជាមិនអាចស្លាប់នោះទេ ប្រសិនបើបរទេសណាបិទវិស័យណាមួយនោះ ព្រោះកម្ពុជានៅតែមានវិស័យផ្សេងៗទៀតដើម្បីទ្រទ្រង់សេដ្ឋកិច្ចជាតិ ៕