ភ្នំពេញ៖ ២ឆ្នាំចុងក្រោយនេះ ក្រោមការដឹកនាំរបស់លោក ឃួង ស្រេង ជាអភិបាលរាជធានីភ្នំពេញ បានធ្វើអោយរាជធានីភ្នំពេញមានការអភិវឌ្ឍន៍រីកចម្រើនមួយកម្រិតថែមទៀត ពិសេសគឺវិស័យសាធារណការ និងការផ្តល់សេវាឲ្យនៅកៀកកិតជាមួយប្រជាពលរដ្ឋ តាមរយៈការបង្កើតឲ្យមានច្រកចេញចូលតែមួយនៅថ្នាក់រាជធានីមួយទៀត ហើយការងារទាំងនេះ គឺពិតជាទទួលបាននូវការកោតសរសើរ និងគាំទ្រយ៉ាងពេញទំហឹងពីសំណាក់ប្រជាពលរដ្ឋ ។ លោក សាំ ពិសិដ្ឋ ប្រធានមន្ទីរសាធារណការនិងដឹកជញ្ជូនរាជធានីភ្នំពេញ បញ្ជាក់ឲ្យដឹងថា ក្រោមការដឹកនាំរបស់លោក ឃួង ស្រេង ជាអភិបាលរាជធានី ២ឆ្នាំចុងក្រោយនេះ បានកសាងនូវ សមិទ្ធផលធំៗជាច្រើន ក្នុងនោះរួមមាន ការស្ថាបនាមហាវិថីឈ្នះឈ្នះ ចាប់ពីផ្លូវជាតិលេខ៤ ដល់ផ្លូវជាតិលេខ៦ ប្រវែងជាង២៤គីឡូម៉ែត្រ បានបញ្ចប់ ជាមួយនឹងការដាក់បង្គោលភ្លើងបំភ្លឺសាធារណៈ ជូនប្រជាពលរដ្ឋ ដែលធ្វើដំណើរដងមហាវិថីនេះ ។ ការដំណើរការបើកការដ្ឋានសាងសង់ស្ពានបេតុង​ ឆ្លងទន្លេសាប ការស្ថាបនារួចរាល់ស្ពានបាឡេឆ្លងទន្លេសាប ។ ការបើកការដ្ឋានស្ថាបនាស្ពានអាកាស និងផ្លូវក្រោមដីនៅរង្វង់មូលចោមចៅ ។ ស្ថាបនាផ្លូវប្រទះឡាង ខណ្ឌដង្កោ ផ្លូវមេ ពីព្រៃស ទៅទួលពង្រ។ ការកសាងនូវស្ថានីយ៍បូមទឹក ជាច្រើនកន្លែង ដូចជាស្ថានីយ៍បុរី១០០ខ្នង ស្ថានីយ៍លូ៥ ដែលស្ថានីយ៍ទាំង២កន្លែងនេះស្ថាបនា បានប្រមាណ៨០ភាគរយហើយ ។ ការកសាងស្ថានីយ៍បូមទឹកបឹងទំពុន ដែលបានបន្ថែមម៉ូទ័រ២គ្រឿង ស្ថានីយ៍បូមទឹកបឹងត្របែក ស្ថានីយ៍បូមទឹកទួលគោកទី១ ស្ថានីយ៍បូមទឹកទួលគោកទី២ ដែលស្ថានីយទាំងអស់នេះមានសមត្ថភាពបូមទឹកខ្លាំង ជាងមុនច្រើនដង រហូតទៅដល់៥ម៉ែត្រគុប ក្នុងមួយវិនាទីនិងស្មើនឹង២៨៨០០ម៉ែត្រគុប ក្នុង១ម៉ោង។ ការស្ថាបនាផ្លូវខ្សែក្រវ៉ាត់ក្រុងទី២ ដែលបាននឹងកំពុងស្ថាបនាមិនទាន់បញ្ចប់។ ស្ពានអាកាសផ្សារដីហុយដែលបានដាក់ឲ្យ ដំណើរការអោយប្រជពលរដ្ឋបានធ្វើដំណើររាល់ថ្ងៃនេះ ។ ការស្ថាបនាបញ្ចប់ផ្លូវជាតិលេខ១ ខណ្ឌច្បារអំពៅ ។ ការកសាងរង្វង់មូលបីគួរស្រូវ នៅខណ្ឌដង្កោជាប់នឹងខេត្តកណ្តាល។ ការស្ថាបនា ផ្លូវព្រែកថ្លឹង ចាប់ពី៦០ម៉ែត្រទៅផ្លូវជាតិលេខ២ ។ការកសាងប្រឡាយស្ទឹងមានជ័យ ដែលបាននឹងកំពុងស្ថាបនាយ៉ាងមមាញឹក ដោយប្រឡាយនេះមានទំហំ៨ម៉ែត្រ ចិញ្ចើម២ម៉ែត្រ សាងសង់ផ្លូវបេតុងទទឹង៦ម៉ែត្រ លើបណ្តាយប្រឡាយប្រវែង១៣៩៨ម៉ែត្រ ដោយចាក់បេតុងបុកស៊ីផាយ ។គម្រោងនេះ បាន បែងចែកជា៤តំណាក់កាល ។ ក្នុងនោះតំណាក់កាលទី១ មានប្រវែង៣២៦ម៉ែត្រ សងខាងប្រឡាយសរុបប្រវែង៦៥២ម៉ែត្រ ហើយក្នុងជំហានទី១នេះ រដ្ឋបាលរាជធានីបានសម្រេចចាប់ឆ្នោត ប្រគល់ដីជូនប្រជាពលរដ្ឋដែល រស់នៅលើប្រឡាយនេះ១៥២គ្រួសាររួចហើយ កាលពីប៉ុន្មានខែមុននេះ ហើយប្រជាពលរដ្ឋដែលរស់នៅ និងរងផលប៉ះពាល់ប្រឡាយនេះ ទទួលបានដីទំហំ៤គុណនិង៦ម៉ែត្រ ជាកម្មសិទ្ធិស្របច្បាប់នៅហ្នឹងកន្លែងផងដែរ ។ ការស្ថាបនាផ្លូវនិងស្ពានឡុងឈិន ភ្ជាប់ទៅផ្លូវលេខ១៥១ ក្នុងមូលដ្ឋានខណ្ឌព្រែកព្នៅ។ ការពង្រីកផ្លូវសហព័ន្ធរុស្សី ដែលមកដល់ពេលនេះ សម្រេចបាន៩០ភាគរយហើយ។ ការងារដាក់បង្គោលភ្លើងបំភ្លឺសាធារណៈ លើបណ្តោយផ្លូវជាតិលេខ១ ចាប់ពីភូមិក្តីតាកុយរហូតដល់ព្រំប្រទល់ខេត្តកណ្តាល ។ ដាក់បង្គោលភ្លើងបំភ្លឺសាធារណៈ លើបណ្តោយផ្លូវជាតិលេខ៤ ចាប់ពីរង្វង់មូលចោមចៅ រហូតដល់ព្រំប្រទល់ខេត្តកណ្តាល ។ ដាក់បង្គោលភ្លើងបំភ្លឺសាធារណៈលើបណ្តោយផ្លូវជាតិលេខ៣ ចាប់ពីរង្វង់មូលចោមចៅ រហូតដល់ជិតផ្លូវទួលពង្រ ។ រួមជាមួយនិងការដាក់ភ្លើងស្តុបថ្មីចំនួន១១៥ទីតាំង ដែលជាជំនួយរបស់អង្គកាចៃការបស់ប្រទេសជប៉ុន។ ដោយឡែកសម្រាប់ការបំរើសេវាជូនប្រជាពលរដ្ឋវិញ នៅរាជធានីភ្នំពេញ ពិតជាទទួលបានការគាំទ្រពេញចិត្ត ពេញថ្លើមពីសំណាក់ប្រជាពលរដ្ឋយ៉ាងខ្លាំង ដូចជាការផ្តល់ សៀវភៅស្នាក់នៅ អត្តសញ្ញាណប័ណ្ណអត្រានុកូលដ្ឋាន និងសំបុត្រកំណើតជាដើម ហើយ អ្វីដែលទទួលបានចំណាប់ អាម្មណ៍ថ្មីមួយទៀតនោះ គឺការបង្កើតអោយមានច្រកចេញតែមួយ ដែលបានបំរើសេវាកម្មនៅកៀកកិត ជាមួយប្រជាពលរដ្ឋតែម្តង ហើយបានទទួលការគាំពីប្រជាពលរដ្ឋយ៉ាងពេញទំហឹង ។ពាក់ព័ន្ធនិងការផ្តល់សេវាដូនប្រជាពលរដ្ឋនេះដែរ អនុវត្តតាមអនុសាសន៍ដ៏ខ្ពង់ខ្ពស់ របស់ម្តេចជោហ៊ុន សែន កាលពីប៉ុន្មានថ្ងៃកន្លងមកនេះ លោកឃួង ស្រេង អភិបាលរាជធានីភ្នំពេញ ក៏បានដឹកនាំអាជ្ញាធរខណ្ឌនិងមន្ត្រីជំនាញ ចុះសំណេះសំណាល និងពិនិត្យមើលស្ថានភាពជាក់ស្តែង ដើម្បីផ្តល់ជូនបងប្អូននូវការប្រើប្រាស់ ភ្លើងអគ្គិសនីក្នុងតំលៃសមរម្យ ខណៈដែលកន្លងមកនេះ បងប្អូនអាជីវករលក់ដូរតាមបណ្តាផ្សារ ក្នុងរាជធានីភ្នំពេញប្រើប្រាស់អគ្គិសនី ពីអ្នកម៉ៅការឯកជន ដែលតូបខ្លះត្រូវបង់ក្នុងតំលៃ ១.២០០៛ ទៅ ១.៥០០៛ ក្នុងមួយគីឡូវ៉ាត់ម៉ោង។ អនុវត្តតាមអនុសាសន៍ណែនាំដ៏ខ្ពង់ខ្ពស់នេះ រដ្ឋបាលរាជធានីភ្នំពេញ សហការជាមួយអគ្គិសនីកម្ពុជា បានរៀបចំការបញ្ចុះតម្លៃប្រើប្រាស់អគ្គិសនី តាមតូបលក់ដូររបស់អាជីវករ ក្នុងផ្សារទាំងអស់នៅរាជធានីភ្នំពេញ មកត្រឹម ៧៤០រៀល ក្នុងមួយគីឡូវ៉ាត់ម៉ោង ដែលជាតម្លៃ ក្នុងប្រភេទពាណិជ្ជកម្មធុនតូច ដោយនឹងចាប់ផ្តើមពីខែមករា ឆ្នាំ២០១៩ នេះតទៅ។ ជាងនេះទៅទៀត នាពេលថ្មីៗកន្លងមកនេះ លោកឃួង ស្រេង អភិបាលរាជធានីក៏បានជំរុញឲ្យអាជ្ញាធរគ្រប់ខណ្ឌ គ្រប់មន្ទីរ ស្ថាប័នមួយចំនួនទៀត ចំណុះអោយរដ្ឋបាលរាជធានីភ្នំពេញ យកចិត្តទុកដាក់និងខិតខំប្រឹងប្រែង លើការងាររបស់ខ្លួនឲ្យ បានខ្លាំងឡើងថែមទៀត ពិសេសលើការរៀបចំតាំងពិព័រណ៌ បង្ហាញសមិទ្ធផលគម្រោងអភិវឌ្ឍន៍សំខាន់ៗ របស់រាជធានីក្នុងពិធីសម្ពោធ វិមានអនុស្សាវរីយ៍នយោបាយឈ្នះឈ្នះ និងការរៀបចំទិវាបុណ្យជាតិ ៧ មករាខួបអនុស្សាវរីយ៍លើកទី ៤០ នៃទិវាជ័យជំនះ ៧ មករាឆ្នាំ ១៩៧៩ ៧ មករា ២០១៩ខាងមុខនេះ ៕