ដែនដីភូមិភាគឦសាននៃព្រះរាជាណាចក្រកម្ពុជា បានសម្រេចសមិទ្ធផលប្រវត្តិសាស្ត្រថ្មីមួយទៀតហើយ បន្ទាប់ពីគម្រោងសាងសង់ស្ពានមិត្តភាពកម្ពុជា-ចិន មេគង្គក្រចេះ និងផ្លូវតភ្ជាប់ ត្រូវបានប្រកាសបញ្ចប់ការសាងសង់ ១០០% ជាស្ថាពរ។ នេះបើតាមការបញ្ជាក់ជាផ្លូវការពី លោក ផន រឹម អ្នកនាំពាក្យក្រសួងសាធារណការ និងដឹកជញ្ជូន។ នៅថ្ងៃទី១៦ ខែកក្កដា ឆ្នាំ២០២៦ នេះ ក្រុមការងារបច្ចេកទេសចម្រុះដឹកនាំដោយ លោក លឹម ស៊ីដេនីន រដ្ឋលេខាធិការក្រសួងសាធារណការ និងដឹកជញ្ជូន រួមជាមួយក្រុមហ៊ុនសាងសង់ និងក្រុមហ៊ុនទីប្រឹក្សាបច្ចេកទេស បានចុះពិនិត្យលម្អិត និងផ្ទៀងផ្ទាត់គម្រោងទាំងស្រុង ដើម្បីត្រៀមរៀបចំពិធីប្រគល់-ទទួលជាផ្លូវការ។ ព័ត៌មានលម្អិត និងលក្ខណៈបច្ចេកទេសនៃគម្រោងយុទ្ធសាស្ត្រនេះរួមមាន៖ ទិន្នន័យបច្ចេកទេស៖ ស្ពានឆ្លងកាត់ទន្លេមេគង្គខេត្តក្រចេះនេះ មានប្រវែងសរុប ១ ៧៦១ម៉ែត្រ ដោយតភ្ជាប់រវាងស្រុកចិត្របុរី និងស្រុកព្រែកប្រសព្វ។ ចំណែកឯផ្លូវតភ្ជាប់ និងផ្លូវខ្នែងទៅកាន់ក្រុងក្រចេះ មានប្រវែងសរុបជាង ៣៣គីឡូម៉ែត្រ។ បណ្តាញតភ្ជាប់សេដ្ឋកិច្ច៖ គម្រោងនេះមានចំណុចចាប់ផ្ដើមពីផ្លូវជាតិលេខ៧ (ត្រង់រង្វង់មូលខ្លាស្ទុះ) ឆ្ពោះទៅកាន់ផ្លូវជាតិលេខ៦០B ដែលជាខ្សែផ្លូវយុទ្ធសាស្ត្រតភ្ជាប់ខេត្តក្រចេះ និងខេត្តកំពង់ធំ។ សមិទ្ធផលនេះដើរតួជាបណ្តាញប្រទាក់ក្រឡាដឹកជញ្ជូនដ៏សំខាន់ជាមួយផ្លូវជាតិ និងផ្លូវខេត្តជាច្រើន ដូចជា ផ្លូវជាតិលេខ៦, លេខ៦២, លេខ៧, លេខ៩, លេខ៧១, លេខ៧១C, ផ្លូវខេត្តលេខ៣៧១, លេខ៧៣, លេខ៧៦ និងផ្លូវជាតិលេខ៧៨។ ប្រភពទុន៖ គម្រោងស្ពានឆ្លងទន្លេមេគង្គដ៏មានសារៈសំខាន់នេះ ត្រូវបានសាងសង់ឡើងដោយប្រើប្រាស់ថវិកាឥណទានសម្បទានពីរដ្ឋាភិបាលនៃសាធារណរដ្ឋប្រជាមានិតចិន ដោយបានប្រកាសសម្ពោធបើកការដ្ឋានសាងសង់កាលពីថ្ងៃទី២ ខែមករា ឆ្នាំ២០២៣។ ការបញ្ចប់ការសាងសង់នេះ នឹងជួយសម្រួលដល់ការធ្វើដំណើរ កាត់បន្ថយពេលវេលា និងថ្លៃដើមដឹកជញ្ជូន ព្រមទាំងផ្សារភ្ជាប់ទំនាក់ទំនងសេដ្ឋកិច្ច ពាណិជ្ជកម្ម និងសង្គមរវាងប្រជាពលរដ្ឋនៅត្រើយខាងកើត និងត្រើយខាងលិច ក៏ដូចជាការតភ្ជាប់តំបន់ដាច់ស្រយាលនៅភូមិភាគឦសាន មកកាន់ទីប្រជុំជនផងដែរ។