កាលពីថ្ងៃទី ០៨ ខែកក្កដា ម្សិលមិញនេះ មន្រ្តីបច្ចេកទេសក្រសួងសាធារណការនិងដឹកជញ្ជូន និងមន្រ្តីតំណាងរដ្ឋបាលរាជធានីភ្នំពេញ រួមទាំងក្រុមបច្ចេកទេសអង្គការចៃការបស់ជប៉ុនបានរៀបចំសិក្ខាសាលាផ្សព្វផ្សាយ លើការសិក្សាគម្រោងធ្វើឱ្យប្រសើរឡើងវិញកំណាត់ផ្លូវជាតិលេខ១ និងគម្រោងសាងសង់ស្ពានឆ្លងកាត់ទន្លេមេគង្គ។ គោលបំណងនៃសិក្ខាសាលានេះ គឺដើម្បីលើកពីលទ្ធផលដែលក្រុមការងារបានសិក្សាគម្រោងកន្លងមករួមមាន៖ ១). ការវាយតម្លៃនៃលទ្ធភាពគម្រោង ២). ការរៀបចំរចនាបទបឋម និងការប៉ាន់ស្មានប្រមាណតម្លៃ ៣). ការរៀបចំរបាយការណ៍សិក្សាវាយតម្លៃហេតុប៉ះពាល់បរិស្ថាន (IESIA) ៤). ការសិក្សារៀបចំផែនការសកម្មភាពការតាំងទីលំនៅឡើងវិញ (RAP) នៅក្នុងសិក្ខាសាលាដែលបង្ហាញពីលទ្ធផល ការសិក្សាគម្រោងធ្វើឱ្យប្រសើរឡើងវិញកំណាត់ផ្លូវជាតិលេខ១ និងគម្រោងសាងសង់ស្ពានឆ្លងកាត់ទន្លេមេគង្គ ក៏បានលេចរូបភាពគំរូស្ពានឆ្លងទន្លេមេគង្គ ដែលគ្រោងសាងសង់ក្រោមការគាំទ្រថវិកាពីរដ្ឋាភិបាលប្រទេសជប៉ុន។ នៅក្នុងពិធីបើកការដ្ឋានសាងសង់ចំណតផែកុងតឺន័រទឹកជ្រៅជំហានទី ១ នៅកំពង់ផែស្វយ័តក្រុងព្រះសីហនុ កាលពីថ្ងៃទី ២២ ខែធ្នូ ឆ្នាំ២០២៣ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានស្នើដល់រដ្ឋាភិបាលជប៉ុនពិនិត្យលទ្ធភាពជួយសាងសង់ស្ពានឆ្លងទន្លេមេគង្គពីក្តីតាកុយទៅអរិយក្សត្រ។ តាមរយៈអនុរដ្ឋមន្ត្រីក្រសួងរៀបចំដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន ដែលធ្វើទស្សនកិច្ចនៅប្រទេសកម្ពុជា សម្តេចធិបតី ហ៊ុន ម៉ាណែត បានបញ្ជាក់យ៉ាងដូច្នេះថា ជប៉ុនគឺជាមិត្តដ៏សំខាន់ដែលបានចូលរួមចំណែកក្នុងការអភិវឌ្ឍប្រទេសកម្ពុជា ពីអតីតកាល បច្ចុប្បន្នកាល និងទៅអនាគត។ នៅក្នុងក្របខណ្ឌការអភិវឌ្ឍវិស័យសាធារណការ និងដឹកជញ្ជូន សម្តេចធិបតីបានស្នើដល់រដ្ឋាភិបាលជប៉ុនបន្តជួយគាំទ្រដល់ការអភិវឌ្ឍហេដ្ឋារចនាសម្ព័ន្ធ ផ្លូវស្ពានរបស់ប្រទេសកម្ពុជា ដូចជាគម្រោងពង្រីក និងលើកកម្ពស់កម្រិតគុណភាពផ្លូវជាតិលេខ ១ ទៅដល់ស្ពានអ្នកលឿង និងស្ពានឆ្លងកាត់ទន្លេមេគង្គ ក្តីតាកុយ-ទៅអរិយក្សត្រ៕