កិច្ចប្រជុំពិនិត្យ និងពិភាក្សាលើផែនការយុទ្ធសាស្ត្រថវិកាឆ្នាំ២០២៧-២០២៩ ផែនការថវិកាប្រចាំឆ្នាំ២០២៧ និងផែនការសមិទ្ធកម្មប្រចាំឆ្នាំ២០២៧ របស់អង្គភាពថវិកាក្រោមឱវាទក្រសួង ទីស្ដីការក្រសួង៖ នៅព្រឹកថ្ងៃទី២២ ខែមិថុនា ឆ្នាំ២០២៦ ឯកឧត្ដម កែន រដ្ឋា អគ្គនាយកនៃអគ្គនាយកដ្ឋានរដ្ឋបាល និងហិរញ្ញវត្ថុ បានអញ្ជើញដឹកនាំកិច្ចប្រជុំពិនិត្យ និងពិភាក្សាលើផែនការយុទ្ធសាស្ត្រថវិកាសម្រាប់ឆ្នាំ២០២៧-២០២៩ ផែនការថវិកាប្រចាំឆ្នាំ២០២៧ និងផែនការសមិទ្ធកម្មប្រចាំឆ្នាំ២០២៧ របស់អង្គភាពថវិកាក្រោមឱវាទក្រសួង ដោយមានការអញ្ជើញចូលរួមពីឯកឧត្ដម លោកជំទាវ លោក លោកស្រី និងតំណាងអង្គភាពថវិកាក្រោមឱវាទក្រសួង។ កិច្ចប្រជុំនេះត្រូវបានរៀបចំឡើង ក្នុងគោលបំណងដើម្បីពិភាក្សា និងពិគ្រោះយោបល់លើការរៀបចំទាំងក្របខណ្ឌផែនការយុទ្ធសាស្ត្រថវិកាឆ្នាំ២០២៧-២០២៩ ផែនការថវិកាប្រចាំឆ្នាំ២០២៧ និងផែនការសមិទ្ធកម្មប្រចាំឆ្នាំ២០២៧ របស់អង្គភាពថវិកាក្រោមឱវាទក្រសួង ស្របតាមសារាចរលេខ ០៦ សរ ចុះថ្ងៃទី១៥ ខែឧសភា ឆ្នាំ២០២៦ ស្ដីពីការរៀបចំផែនការយុទ្ធសាស្ត្រថវិកាឆ្នាំ២០២៧-២០២៩ និងការរៀបចំសេចក្ដីព្រាងច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២៧។ គួរបញ្ជាក់ផងដែរថា ឯកឧត្តមប្រធានអង្គប្រជុំ បានពិនិត្យ និងពិភាក្សាលម្អិតលើគម្រោងចំណាយថវិកាឆ្នាំ២០២៧ ទៅតាមកម្មវិធី អនុកម្មវិធី ជំពូក គណនី អនុគណនី និងបានណែនាំដល់អង្គភាពថវិកាក្រោមឱវាទក្រសួង ឱ្យរៀបចំគម្រោងចំណាយផ្ដោតសំខាន់លើសកម្មភាពអាទិភាពនិងថ្មី ពិដានថវិកានៃសារាចរណែនាំ និងចក្ខុវិស័យវែងឆ្ងាយរបស់ប្រមុខរាជរដ្ឋាភិបាលកម្ពុជា ជាពិសេសស្ថានភាពរបស់ប្រទេសជាតិនាពេលបច្ចុប្បន្ន៕