គណៈប្រតិភូក្រសួងសាធារណការ និងដឹកជញ្ជូន និងមន្ត្រីបច្ចេកទេសចំនួន២៥រូប បានបញ្ចប់វគ្គបណ្តុះបណ្តាលបង្កើនសមត្ថភាពស្ដីពីផ្លូវ និងស្ពាន ដោយជោគជ័យនៅសាកលវិទ្យាល័យ Beijing Jiaotong University ទីក្រុងប៉េកាំង ប្រទេសចិន៖ នារសៀលថ្ងៃពុធ ទី១៧ ខែមិថុនា ឆ្នាំ២០២៦ ប្រតិភូ និងមន្ត្រីបច្ចេកទេសក្រសួងសាធារណការ និងដឹកជញ្ជូន ចំនួន២៥រូប បានបញ្ចប់វគ្គបណ្តុះបណ្តាលបង្កើនសមត្ថភាពស្ដីពីផ្លូវ និងស្ពាន ប្រកបដោយជោគជ័យ និងផ្លែផ្កាខ្ពស់។ ជាកិច្ចចាប់ផ្ដើមក្នុងពិធីបិទវគ្គបណ្ដុះបណ្ដាលនេះ លោកសាស្ត្រាចារ្យព្រឹទ្ធបុរស តំណាងសាកលវិទ្យាធិការសាកលវិទ្យាល័យ បានអបអរសាទរដល់សិក្ខាកាមទាំងអស់ដែលបានបញ្ចប់ដោយជោគជ័យនូវវគ្គបណ្ដុះបណ្ដាលដ៏មានសារៈសំខាន់នេះ។ លោកសាស្ត្រាចារ្យបានផ្ដាំផ្ញើដល់សិក្ខាកាមទាំងអស់ ត្រូវយកបទពិសោធន៍ ចំណេះដឹង និងជំនាញ ដែលបានសិក្សានាពេលនេះ ផ្សារភ្ជាប់និងការអនុវត្តជាក់ស្ដែង ដើម្បីអភិវឌ្ឍផ្លូវ និងស្ពានក្នុងប្រទេសកម្ពុជា ឱ្យកាន់តែមានគុណភាពខ្ពស់ ប្រើប្រាស់បានយូរអង្វែង និងសូមជូនពរក្នុងការធ្វើដំណើរត្រលប់ទៅមាតុប្រទេសវិញប្រកបដោយសុខសុវត្ថិភាព។ តាងនាមឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន តំណាងប្រតិភូ និងមន្ត្រីបច្ចេកទេសក្រសួង បានសម្ដែងនូវអំណរគុណយ៉ាងជ្រាលជ្រៅជូនចំពោះរដ្ឋាភិបាលនៃសាធារណរដ្ឋប្រជាមានិតចិន និងសាកលវិទ្យាល័យ Beijing Jiaotong University ព្រមទាំងគ្រប់ភាគីពាក់ព័ន្ធ ដែលបានសម្របសម្រួលឱ្យវគ្គបណ្ដុះបណ្ដាលនេះប្រកបទៅដោយរលូន និងទទួលបានផ្លែផ្កា គួរជាទីមោទនក្នុងពេលនេះ។ ក្នុងឱកាសនោះ តំណាងប្រតិភូ បានថ្លែងអំណរគុណ ជូនចំពោះសាស្ដ្រាចារ្យគ្រប់រូប ដែលយកអស់កម្លាំងកាយចិត្តបង្ហាត់បង្រៀន ចែករំលែកចំណេះដឹង បទពិសោធន៍ និងជំនាញ សំដៅឱ្យសិក្ខាកាមបានក្រេបជញ្ជក់ចំណេះជំនាញ ដែលបានជួបប្រទះនាកន្លងមក។ តំណាងប្រតិភូ បានផ្ដាំផ្ញើដល់សិក្ខាកាមទាំងអស់ ត្រូវយកការចែករំលែកចំណេះដឹង ជំនាញ និងបទសោធន៍ល្អៗនាពេលនេះ ដើម្បីអភិវឌ្ឍវិស័យផ្លូវ និងស្ពាន ក្នុងប្រទេសកម្ពុជាឱ្យកាន់មានធន់ ប្រើប្រាស់បានយូរ និងជួយធ្វើទំនើបកម្មលើវិស័យផ្លូវ និងស្ពាននេះ ឱ្យកាន់តែរីកចម្រើនទៅមុខជាដរាប៕