ក្រសួងសាធារណការ ព្រមានចាត់វិធានការតឹងរ៉ឹងលើមន្ត្រីពាក់ព័ន្ធនឹងរថយន្តដឹកលើសទម្ងន់ ភ្នំពេញ៖ អ្នកនាំពាក្យក្រសួងសាធារណការ និងដឹកជញ្ជូន បានបញ្ជាក់ថា ប្រសិនបើរកឃើញមន្ត្រីណាម្នាក់មានការពាក់ព័ន្ធ ឬបើកដៃឱ្យរថយន្តដឹកលើសទម្ងន់កំណត់ធ្វើចរាចរណ៍ ឬជួយសម្រួលឱ្យរថយន្តវៀងគេចពីស្ថានីយជញ្ជីងត្រួតពិនិត្យ ក្រសួងនឹងចាត់វិធានការយ៉ាងម៉ឺងម៉ាត់ចំពោះអ្នកពាក់ព័ន្ធទាំងអស់ រួមទាំងប្រធានស្ថានីយជញ្ជីង និងមន្ត្រីទទួលខុសត្រូវផងដែរ។ ទោះបីមានការបង្ក្រាបជាបន្តបន្ទាប់ក៏ដោយ សកម្មភាពរថយន្តធុនធំដឹកខ្សាច់លើសទម្ងន់កំណត់ នៅតែបន្តកើតមានក្នុងភូមិសាស្ត្រខេត្តក្រចេះ ដោយរថយន្តមួយចំនួនបានព្យាយាមបើកវៀងគេចពីស្ថានីយជញ្ជីងអចល័តកាំពី ដើម្បីគេចផុតពីការត្រួតពិនិត្យរបស់សមត្ថកិច្ច។ កាលពីយប់ថ្ងៃទី១៣ ខែមិថុនា ឆ្នាំ២០២៦ ក្រុមការងារជញ្ជីងចល័តរបស់ក្រសួងសាធារណការ និងដឹកជញ្ជូន សហការជាមួយមន្ទីរសាធារណការ និងដឹកជញ្ជូនខេត្តក្រចេះ បានចុះត្រួតពិនិត្យ និងឃាត់រថយន្តធុនធំចំនួន ៣គ្រឿង នៅចំណុចភ្នំព្រះ ស្ថិតក្នុងភូមិជ្រោយថ្មក្រោម ឃុំឆ្លូង ស្រុកឆ្លូង ខេត្តក្រចេះ។ ក្រោយការថ្លឹងទម្ងន់ និងត្រួតពិនិត្យជាក់ស្តែង មន្ត្រីជំនាញបានរកឃើញថា រថយន្តទាំង ៣គ្រឿងនេះ សុទ្ធតែផ្ទុកទំនិញលើសទម្ងន់កំណត់ ដោយក្នុងមួយគ្រឿងមានទម្ងន់លើសចាប់ពី ២០តោន ដល់ ២៣តោន។ ក្រសួងសាធារណការ និងដឹកជញ្ជូន បានអះអាងថា នឹងបន្តរឹតបន្តឹងការអនុវត្តច្បាប់ និងចុះត្រួតពិនិត្យជាប្រចាំ ដើម្បីទប់ស្កាត់ការដឹកជញ្ជូនលើសទម្ងន់ ដែលបង្កផលប៉ះពាល់ដល់ហេដ្ឋារចនាសម្ព័ន្ធផ្លូវថ្នល់ និងសុវត្ថិភាពចរាចរណ៍សាធារណៈ៕