គណៈប្រតិភូក្រសួងសាធារណការ និងដឹកជញ្ជូន និងមន្ត្រីបច្ចេកទេសចំនួន២៥រូប ចូលរួមវគ្គបណ្តុះបណ្តាលបង្កើនសមត្ថភាពស្ដីពីផ្លូវ និងស្ពាន នៅសាកលវិទ្យាល័យ Beijing Jiaotong University ទីក្រុងប៉េកាំង ប្រទេសចិន ប្រទេសចិន៖ ចាប់ពីថ្ងៃទី៤-១៧ ខែមិថុនា ឆ្នាំ២០២៦ ប្រតិភូ និងមន្ត្រីបច្ចេកទេសក្រសួងសាធារណការ និងដឹកជញ្ជូន ចំនួន២៥រូប ចូលរួមវគ្គបណ្តុះបណ្តាលបង្កើនសមត្ថភាពស្ដីពីផ្លូវ និងស្ពានក្នុងគោលបំណង ចែករំលែកបទពិសោធន៍ជាក់ស្តែងដែលបានជួបប្រទះនាពេលកន្លងមករបស់សាស្ត្រាចារ្យជាច្រើនរូប ជាពិសេសការអនុវត្តន៍បច្ចេកទេសផ្លូវ និងស្ពានរបស់វិស្វករដែលបានទទួលជោគជ័យក្នុងការងារសាងសង់ ថែទាំ និងជួសជុល ប្រកបដោយស្ដង់ដារ និងគុណភាពខ្ពស់។ ជាកិច្ចចាប់ផ្ដើមបើកវគ្គបណ្ដុះបណ្ដាលនេះ លោកសាស្ត្រាចារ្យសាកលវិទ្យាធិការរង Mr. Zhao Peng សាកលវិទ្យាល័យ Beijing Jiaotong University បានមានប្រសាសន៍ថា ផ្លូវ និងស្ពាន មានសារៈសំខាន់ណាស់សម្រាប់ការតភ្ជាប់ដង្ហើមសេដ្ឋកិច្ច និងជាមធ្យោបាយដឹកជញ្ជូនទាំងនៅទីក្រុង និងជនបទ។ លោកសាស្ត្រាចារ្យ បានផ្ដំាផ្ញើឱ្យសិក្ខាកាមទាំងអស់ យកចិត្តទុកដាក់ក្រេបជញ្ជក់ចំណេះដឹង បទពិសោធន៍ល្អៗ របស់សាស្រ្ដាចារ្យ និងវិស្វករ ដែលមានពិសោធន៍ជោគជ័យក្នុងវិស័យផ្លូវ ស្ពាន នេះ។ ថ្លែងក្នុងឱកាសនេះ តំណាងប្រតិភូ និងមន្ត្រីបច្ចេកទេសក្រសួង បានមានមតិស្វាគមន៍ និងថ្លែងអំណរគុណ ដល់លោកសាស្ត្រាចារ្យសាកលវិទ្យាធិការរង និងសាស្ត្រាចារ្យទាំងអស់ ដែលបានចំណាយពេលវេលាដ៏មានតម្លៃ ចែករំលែកបទពិសោធន៍ ចំណេះដឹង និងជំនាញ ទាំងការសាងសង់ ថែទាំ និងជួសជុលផ្លូវ និងស្ពាន នេះ។ លោកសង្ឃឹមយ៉ាងមុតមាំថា សិក្ខាកាមទាំងអស់ នឹងយកចិត្តទុកដាក់ក្រេបជញ្ជក់យកចំណេះដឹង បទពិសោធន៍ល្អៗ ដែលសាស្រាចារ្យបានចែករំលែកនាពេលនេះ និងពេលខាងមុខ៕