កិច្ចប្រជុំពិនិត្យពិភាក្សា និងផ្តល់ធាតុចូលបច្ចេកទេសលើសេចក្តីព្រាងផែនការយុទ្ធសាស្រ្តបញ្ជ្រាបយេនឌ័រ (GMSP) ២០២៦-២០៣០ ក្រោមជំនួយបច្ចេកទេសពីធនាគារពិភពលោក ទីស្តីការក្រសួង៖ នាថ្ងៃព្រហស្បតិ៍ ទី២៨ ខែឧសភា ឆ្នាំ២០២៦ លោកជំទាវ មឹន មាណវី រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានគណៈកម្មការទទួលបន្ទុកយេនឌ័រ និងយន្តការគាំទ្រក្រសួង និងឯកឧត្តម ផែង សុវិជ្ជានោ រដ្ឋលេខាធិការ ក្រសួងសាធារណការ និងដឹកជញ្ជូន និងជានាយកគម្រោងកែលម្អការតភ្ជាប់ផ្លូវថ្នល់ (RCIP) បានអញ្ជើញដឹកនាំកិច្ចប្រជុំពិនិត្យ ពិភាក្សា និងផ្តល់ធាតុចូលបច្ចេកទេសលើសេចក្តីព្រាងផែនការយុទ្ធសាស្រ្តបញ្ជ្រាបយេនឌ័រ (GMSP) ២០២៦-២០៣០ ក្រោមជំនួយបច្ចេកទេសពីធនាគារពិភពលោក (World Bank) តាមរយៈគម្រោងកែលម្អការតភ្ជាប់ផ្លូវថ្នល់ (RCIP) ដោយមានការចូលរួមពីឯកឧត្តមអនុរដ្ឋលេខាធិការ តំណាងអគ្គនាយកដ្ឋាន នាយកដ្ឋាន ទីប្រឹក្សាជាតិផ្នែកយេនឌ័រ ព្រមទាំងមន្ទីរសាធារណការ និងដឹកជញ្ជូនរាជធានី-ខេត្ត។ កិច្ចប្រជុំនេះត្រូវបានរៀបចំឡើងដើម្បីពិនិត្យ ពិភាក្សា និងផ្តល់ធាតុចូលបច្ចេកទេសលើសេចក្តីព្រាងផែនការយុទ្ធសាស្រ្តបញ្ជ្រាបយេនឌ័រ (GMSP) ២០២៦-២០៣០ ឱ្យបានគ្របដណ្តប់ និងឆ្លុះបញ្ចាំងសមស្របទៅនឹងតួនាទី ភារកិច្ច និងអាទិភាពរបស់នាយកដ្ឋាននានានៃក្រសួងសាធារណការ និងដឹកជញ្ជូន ព្រមទាំងធ្វើសមាហរណកម្មសេចក្តីព្រាងផែនការនេះឱ្យស្របតាមផែនការសកម្មភាពបញ្ជ្រាបយេនឌ័រ (GMAP) ២០២៦-២០២៨៕