ក្រុមការងារត្រួតពិនិត្យយានយន្តកែច្នៃខុសលក្ខណៈបច្ចេកទេស និងត្រួតពិនិត្យ ឯកសារយានយន្តខេត្តក្រចេះ បានដាក់គោលដៅត្រួតពិនិត្យចល័តនៅតាមបណ្តាផ្លូវជាតិ-ខេត្តសំខាន់ៗចំនួន ៣កន្លែង ក្នុងភូមិសាស្ត្រខេត្តក្រចេះ។យោងតាមរបាយការណ៍របស់មន្ទីរសាធារណៈការនិងដឹកជញ្ជូនខេត្តក្រចេះ បានឲ្យដឹងថា គិតត្រឹមខែមេសា ឆ្នាំ២០២៦ ក្រុមការងារត្រួតពិនិត្យយានយន្តកែច្នៃខុស លក្ខណៈបច្ចេកទេស និងត្រួតពិនិត្យឯកសារយានយន្តខេត្ត បានដាក់គោលដៅចំនួន ៣ទីតាំង ស្ថិតក្នុងស្រុកឆ្លូង ស្រុកចិត្របុរី និងស្រុកស្នួល នៃខេត្តក្រចេះ។ដោយត្រួតពិនិត្យរថយន្តសរុបបានចំនួន ៩៩៩គ្រឿង ក្នុងនោះ រថយន្តត្រឹមត្រូវសរុប ចំនួន ៧៧៩គ្រឿង, រថយន្តកែច្នៃខុសលក្ខណៈបច្ចេកទេស (កាត់ទ្រុង), ដោះភ្លើងរថយន្ត បំភ្លឺខុសលក្ខណៈបច្ចេកទេស ១០គ្រឿង, យានយន្តខ្វះឯកសារចំនួន ១០៣គ្រឿង និងប្រើប្រាស់បណ្ណបើកបរខុសប្រភេទយានយន្តសរុបចំនួន ១០៧គ្រឿង។ប្រភពពីមន្ត្រីជំនាញ បានឲ្យដឹងថា រថយន្តខុសលក្ខណៈបច្ចេកទេស ត្រូវបានក្រុមការងារត្រួតពិនិត្យយានយន្តកែច្នៃថ្នាក់ខេត្ត ធ្វើការឃាត់ និងបញ្ជារឲ្យកាត់ទ្រុងនៅនឹងកន្លែង។ ជាមួយគ្នានោះ ដោយមានការណែនាំ និងដាក់ទិសដៅបន្ថែមពីលោក វ៉ា ថន អភិបាលខេត្ត និងជាប្រធានគណៈបញ្ជាការឯកភាពខេត្តក្រចេះ ក្រុមការងារចម្រុះបានដាក់គោលដៅចំនួន ៣ទីតាំង ក្នុងភូមិសាស្ត្រខេត្តក្រចេះ ដើម្បីពង្រឹងប្រសិទ្ធិភាពការងារ។ប្រភពដដែល បានបញ្ជាក់បន្ថែមថា ក្រុមការងារបានណែនាំដល់អ្នកបើកបរ ឬម្ចាសរថយន្ត មិនត្រូវតទ្រុងបន្តទៀត មិនត្រូវផ្ទុកទំនិញសំពីងសំពោង មិនត្រូវបំពាក់ភ្លើងបំភ្លឺខុសបច្ចេកទេស រថយន្តត្រូវភ្ជាប់មកជាមួយនូវឯកសារគ្រប់គ្រាន់។ ក្នុងករណីម្ចាស់រថយន្តមិនអនុវត្តតាមការណែនាំ ក្រុមការងារនឹងអនុវត្តទៅតាមច្បាប់៕