(តាកែវ)៖ លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) និងជាអនុប្រធានប្រចាំការនៃគណៈកម្មាធិការពិសេសដើម្បីជំរុញការរៀបចំ និងការអនុវត្តគម្រោងព្រែកជីកហ្វូណនតេជោ បានបញ្ជាក់ឱ្យដឹងថា បន្ទាប់ពីបានបើកការរដ្ឋានសាងសង់គម្រោងព្រែកជីកហ្វូណនតេជោ កំណាត់ទី២ នៅក្នុងភូមិត្រើយឃ្លោក ឃុំដូងខ្ពស់ ក្នុងខេត្តតាកែវនេះ គឺគម្រោងនៅតែមានសកម្មភាពជីកជាបន្តបន្ទាប់ មិនមានការបញ្ឈប់សកម្មភាពជីកនោះឡើយ។ លោក ស៊ុន ចាន់ថុល បានបញ្ជាក់ដូចនេះនាព្រឹកថ្ងៃទី១៦ ខែឧសភា ឆ្នាំ២០២៦នេះ នាឱកាសដឹកនាំគណៈប្រតិភូអន្តរក្រសួងចុះពិនិត្យវឌ្ឍនភាពការអនុវត្តការងារសាងសង់គម្រោងគ្រប់គ្រងធនធានទឹកចម្រុះហ្វូណនតេជោ នៅត្រង់ទីតាំងដែលស្ថិតនៅក្នុងភូមិត្រើយឃ្លោក ឃុំដូងខ្ពស់ ស្រុកបូរីជលសារ ខេត្តតាកែវ ដោយមានការចូលរួមពីលោក ប៉េង ពោធិ៍នា មន្ត្រីក្រសួងសាធារណការ និងដឹកជញ្ជូន សមាជិកគណៈកម្មាធិការពិសេស និងជាប្រធានលេខាធិការដ្ឋាន, លោកអភិបាលខេត្តតាកែវ, តំណាងក្រសួង-ស្ថាប័នពាក់ព័ន្ធ ជាសមាជិកចំណុះគណៈកម្មាធិការពិសេស, និងមន្ត្រីពាក់ព័ន្ធជាច្រើនរូប។ ឆ្លើយតបនឹងការលើកឡើងថាគម្រោងព្រែកជីកកំណាត់ទី២នេះ បើកការរដ្ឋានហើយបែរមិនមានសកម្មភាព,លោកឧបនាយករដ្ឋមន្ត្រី ស៊ុន ចាន់ថុល បានបញ្ជាក់ថា «យើងទើបបើកការដ្ឋានកាលពីថ្ងៃទី១១ ខែមេសា ទើបបានជាងមួយខែទេ ហើយយើងឃើញសកម្មភាពកំពុងតែដំណើរការ [..] អញ្ចឹងមិនមានការបញ្ឈប់ការងារទេ ព្រោះមានអ្នកខ្លះថា បានតែបើកការដ្ឋាន ប៉ុន្តែមិនមានសកម្មភាពទេ សូមជម្រាបថា សកម្មភាពនៅមានរហូត» ។ ឧបនាយករដ្ឋមន្ត្រី ស៊ុន ចាន់ថុល បានបន្ថែមថា បើទោះបីជារដូវវស្សាចូលមកដល់ធ្វើឱ្យការរដ្ឋានពិបាកជីកក៏ដោយ ក៏សកម្មភាពការងារនៅតែបន្ត ហើយពេលរដូវប្រាំងមកដល់ចាប់ពីខែវិច្ឆិកា ក្រុមហ៊ុនមានផែនការនឹងដាក់ការដ្ឋានជីកចំនួន ១១កន្លែង ធ្វើព្រមៗគ្នាទាំង ១១ការដ្ឋានតែម្តង ដើម្បីធ្វើឱ្យការងារសាងសង់នេះ បានបញ្ចប់តាមផែនការដែលបានគ្រោងទុក, ខណៈដែលជិតរដូវវស្សាមកដល់នេះគឺក្រុមហ៊ុន ដាក់តែមួយការដ្ឋានសិនប៉ុណ្ណោះ។ ជាមួយគ្នានោះ ពាក់ព័ន្ធនឹងការដោះស្រាយផលសំណងជូនពលរដ្ឋដែលរងផលប៉ះពាល់ដោយគម្រោងព្រែកជីក នៅក្នុងខេត្តតាកែវ, លោកឧបនាយករដ្ឋមន្ត្រី ស៊ុន ចាន់ថុល បានបញ្ជាក់ថា នៅក្នុងខេត្តតាកែវ គឺបានដោះស្រាយផលប៉ះពាល់ជូនពលរដ្ឋបានចំនួន ២២គីឡូម៉ែត្ររួចហើយ ក្នុងនោះក្រសួងសេដ្ឋកិច្ច នឹងនៅតែបន្តដោះស្រាយជូនប្រជាពលរដ្ឋ រហូតដល់រួចរាល់តែម្តង ដូចនេះចំពោះរឿងផលប៉ះពាល់ជាមួយប្រជាពលរដ្ឋ គឺមិនមានបញ្ហានោះទេ៕