ភ្នំពេញ ៖ សម្តេចមហាបវរធិបតី ហ៊ុន ម៉ាណែត មានប្រសាសន៍ទៅកាន់នាយករដ្ឋមន្រ្តីវៀតណាមឱ្យមានការពន្លឿនការកំណត់ទីតាំងតភ្ជាប់រវាងគម្រោងផ្លូវល្បឿនលឿនភ្នំពេញ-បាវិត និងគម្រោងផ្លូវល្បឿនលឿនហូជីមិញ-ម៉ុកបៃ ។ ការមានប្រសាសន៍របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាបែបនេះ គឺក្នុងជំនួបពិភាក្សាទ្វេភាគីជាមួយ ឯកឧត្តម Le Minh Hung នាយករដ្ឋមន្ត្រី នៃសាធារណរដ្ឋសង្គមនិយមវៀតណាម នាឱកាសអញ្ជើញចូលរួមកិច្ចប្រជុំកំពូលអាស៊ានលើកទី៤៨ នៅហ្វីលីពីន កាលពីថ្ងៃទី៧ ខែឧសភា ឆ្នាំ២០២៦។ សម្ដេចធិបតីមានប្រសាសន៍សង្កត់ធ្ងន់អំពីសារៈសំខាន់នៃការពន្លឿនការកំណត់ទីតាំងតភ្ជាប់រវាងគម្រោងផ្លូវល្បឿនលឿនភ្នំពេញ-បាវិត និងគម្រោងផ្លូវល្បឿនលឿនហូជីមិញ-ម៉ុកបៃនេះ ដើម្បីជាប្រយោជន៍ដល់សេដ្ឋកិច្ច និងការធ្វើដំណើររបស់ប្រជាជននៃប្រទេសទាំងពីរ។ បន្ថែមលើនេះ សម្ដេចធិបតីបានជំរុញឱ្យមានការសម្រួលនីតិវិធីគយ និងអន្តោប្រវេសន្ត៍ នៅតាមច្រកព្រំដែនឱ្យមានភាពសាមញ្ញ ដើម្បីបង្កលក្ខណៈងាយស្រួលដល់ការធ្វើដំណើរឆ្លងកាត់ព្រំដែន និងការផ្លាស់ប្តូរទំនិញរវាងប្រទេសទាំងពីរ។ ជាមួយគ្នានេះ ប្រមុខរដ្ឋាភិបាលនៃប្រទេសទាំងពីរ ក៏បានពិភាក្សាលើគំនិតផ្ដួចផ្ដើមមួយចំនួន ដើម្បីពង្រឹង និងពង្រីកកិច្ចសហប្រតិបត្តិការក្នុងវិស័យសំខាន់ៗ រួមមាន៖ នយោបាយ, សន្ដិសុខ និងការពារជាតិ, សេដ្ឋកិច្ច ពាណិជ្ជកម្ម ថាមពល, ការតភ្ជាប់ហេដ្ឋារចនាសម្ព័ន្ធ, ទេសចរណ៍ និងការផ្លាស់ប្ដូររវាងប្រជាជន និងប្រជាជន។ សូមបញ្ជាក់ថា គម្រោងផ្លូវល្បឿនលឿនពីកម្ពុជាទៅវៀតណាមអាចនឹងសម្រេចការតភ្ជាប់ នៅត្រឹមឆ្នាំ២០២៧ ។ គម្រោងផ្លូវល្បឿនលឿនតភ្ជាប់រវាងប្រទេសទាំងពីរនេះ មានប្រវែងសរុប ១៨៦គីឡូម៉ែត្រ ជាការរួមបញ្ចូលតភ្ជាប់រវាងផ្លូវពីរខ្សែ នោះគឺ ផ្លូវល្បឿនលឿន ភ្នំពេញ-បាវិត មានប្រវែង ១៣៥គីឡូម៉ែត្រ នៅខាងភាគីកម្ពុជា និងខាងវៀតណាម គឺផ្លូវល្បឿនលឿន ហូជីមិញ-ម៉ុកបៃ មានប្រវែង ៥១គីឡូម៉ែត្រ។ គម្រោងផ្លូវល្បឿនលឿនភ្នំពេញ-បាវិត បានចាប់ផ្ដើមកាលពីខែមិថុនា ឆ្នាំ២០២៣ ។ ត្រូវបានវិនិយោគសាងសង់ ដោយក្រុមហ៊ុនសាជីវកម្មស្ពានថ្នល់ចិន (CRBC) ចំណាយថវិកាប្រមាណ ១,៣៥ពាន់លានដុល្លារ ប្រើពេលវេលាសាងសង់ ៤៨ខែ ។ ដោយឡែក ប្រទេសវៀតណាម នឹងសាងសង់ផ្លូវល្បឿនលឿន ហូជីមិញ-ម៉ុកបៃ ដែលចាប់ផ្ដើមពីទីក្រុងហូជីមិញ រហូតមកដល់ព្រំដែនម៉ុកបៃ ខេត្តតៃនិញ ៕