ភ្នំពេញ ៖ ឯកឧត្ដម ផន រឹម អ្នកនាំពាក្យក្រសួងសាធារណការនិងដឹកជញ្ជូន បានឱ្យដឹងថា ស្ពានឆ្លងកាត់ទន្លេបាសាក់ចាក់អង្រែក្រោម-ព្រែកប្រា សម្រេចការសាងសង់បានជិត៧០%ហើយ ខណៈក្រុមការងារសាងសង់បាននិងកំពុងពន្លឿនការសាងសង់នេះ ដើម្បីឈានឱ្យសម្រេចតាមផែនការដែលបានកំណត់ ដែលសម្រួលដល់ការធ្វើដំណើររបស់ប្រជាពលរដ្ឋ។ ឯកឧត្ដម ផន រឹម អ្នកនាំពាក្យក្រសួងសាធារណការនិងដឹកជញ្ជូន បានឱ្យដឹងថា ស្ពានឆ្លងកាត់ទន្លេបាសាក់ចាក់អង្រែក្រោម-ព្រែកប្រា សម្រេចការសាងសង់បានចំនួន៦៨%ហើយ គិតត្រឹមថ្ងៃទី២០ ខែមេសា ឆ្នាំ២០២៦ ដែលមានន័យថាគម្រោងនេះសម្រេចការងារលឿនជាងផែនការ ៦%។ ឯកឧត្តម បានបន្តថា អ្វីដែលគម្រោង សម្រេចបានរួមមាន ១.ផ្នែកគ្រឹះស្ពាន សម្រេចបាន១០០% , ២.ផ្នែករចនាសម្ព័ន្ធក្រោមស្ពានសម្រេចបាន៨៩%, ៣.រចនាសម្ព័ន្ធលើស្ពានសម្រេចបាន២៨% (ធ្នឹម T ចាក់ ១៨០ ដើម សម្រេចបាន ១៣២ ដើម, ធ្នឹម T ចាក់នៅកន្លែង១៨០ដើម សម្រេចបាន១៥៦ដើម) និង៤.បណ្តាញ ផ្លូវសម្រេចបាន ៤៤.៤%(តភ្ជាប់ សម្រេចបាន៥០% ,ផ្លូវបង្វែរទិស(Ram) សម្រេចបាន ៤២%)។ ឯកឧត្តម បានបញ្ជាក់ថា នៅពេលស្ពាននេះសាងសង់រួច នឹងជួយកាត់បន្ថយការកកស្ទះចរាចរណ៍លើស្ពានព្រះមុនីវង្ស ឆ្លងកាត់ទន្លេបាសាក់ ភ្ជាប់ផ្លូវជាតិលេខ១ នៅខណ្ឌច្បារអំពៅ ជួយពង្រឹងដល់ទំនាក់ទំនងសេដ្ឋកិច្ចសង្គម រវាងរាជធានីភ្នំពេញប៉ែកខាងត្បូង ព្រលានយន្តហោះអន្តរជាតិតេជោក្រុងតាខ្មៅ កាត់បន្ថយការកកស្ទះចរាចរណ៍នៅតាមដងទន្លេបាសាក់ និងជួយពន្លឿនការអភិវឌ្ឍតំបន់នោះ ជាពិសេសធ្វើឱ្យប្រសើរឡើងដល់ប្រសិទ្ធភាពនៃការ ដឹកជញ្ជូន និងភស្តុភារកម្មនៅក្នុងតំបន់រាជធានីភ្នំពេញ។ សូមបញ្ជាក់ថា គម្រោងសាងសង់ស្ពានឆ្លងកាត់ទន្លេបាសាក់ ចាក់អង្រែក្រោម-ព្រែកប្រា នេះមានតម្លៃប្រមាណ៦០លានដុល្លារអាម៉េរិក ត្រូវប្រើរយៈពេលសាងសង់ ៤២ខែ ដោយប្រើឥណទានសម្បទានរបស់ចិន។ ស្ពាននេះមានប្រវែងសរុប ១ ៦៥០ ម៉ែត្រ (ប្រវែងស្ពាន ៨៤៥,៧០ ម៉ែត្រ ទទឹងផ្លូវ ២៧ ម៉ែត្រ ផ្លូវតភ្ជាប់ក្បាលស្ពានប្រវែង ៨០៤,៣០ ម៉ែត្រ ទទឹងផ្លូវ ២៧ ម៉ែត្រ) មាន៤គន្លងរថយន្ត ២គន្លងម៉ូតូ និង ២គន្លងថ្មើរជើង។ គម្រោងស្ពាននេះសាងសង់ដោយក្រុមហ៊ុនសំណង់សៀងហៃ ទីប្រឹក្សាគម្រោងដោយក្រុមហ៊ុនក្វាងចូវវ៉ានអាន៕