ព្រែក​ជីក​ហ្វូណន​តេជោ នឹង​បើកការដ្ឋាន​សាងសង់ដំណាក់កាលទី ២ នៅស្អែកនេះ ក្រោម​អធិបតីភាព​សម្តេ​ចធិបតី ហ៊ុន ម៉ាណែត។ គម្រោងប្រវត្តិសាស្ត្រនេះ នឹង​នាំ​ផលប្រយោជន៍យ៉ាង​ច្រើន​ កាត់បន្ថយថ្លៃដើមដឹកជញ្ជូន និង​ជំរុញ​ដល់ការ​អភិវឌ្ឍ​​សេដ្ឋកិច្ចកម្ពុជា​បន្ថែមទៀត។ នេះជាព័ត៌មានសំខាន់ៗជុំវិញដំណើរការ​សាងសង់​ព្រែកជីកហ្វូណនតេជោ ដែលនឹងបើកការដ្ឋានសាងសង់នៅស្អែកនេះ។ ១. ទិដ្ឋភាពទូទៅនៃគម្រោង គម្រោងគ្រប់គ្រងធនធានទឹកចម្រុះហ្វូណនតេជោ គឺជាគម្រោងប្រវត្តិសាស្ត្រលើកទីមួយក្នុងវិស័យដឹកជញ្ជូនតាមផ្លូវទឹករបស់​​ប្រទេស​កម្ពុជា ដែលតភ្ជាប់ប្រព័ន្ធទន្លេមេគង្គទៅកាន់ផ្លូវសមុទ្រ។ គម្រោងនេះមានប្រវែងសរុប ១៧២,៦ គីឡូម៉ែត្រ និងដើរតួជាច្រករបៀងដ៏សំខាន់ក្នុងការដឹកជញ្ជូនពីរាជធានីភ្នំពេញទៅកាន់តំបន់ឆ្នេរ ជំរុញ​ការអភិវឌ្ឍឧស្សាហកម្ម និងគាំទ្រដល់​ចក្ខុវិស័យយុទ្ធសាស្ត្ររបស់​កម្ពុជាក្នុងការ​ក្លាយជា​ប្រទេសមានចំណូល​ខ្ពស់នៅឆ្នាំ ២០៥០។ ២. ការបែងចែកកំណាត់សាងសង់ គម្រោងប្រវត្តិសាស្ត្រនេះត្រូវបានចែកចេញជា ២ កំណាត់៖ កំណាត់ទី១៖ មាន​ប្រវែង ២១ គីឡូម៉ែត្រ ចាប់ពី​ព្រែកតាកែវ​នៃ​ទន្លេមេគង្គ ដល់​ព្រែកពោធិ៍​នៃ​ទន្លេ​បាសាក់ ដោយ​មានការ​បោះ​បង្គោលនិយាមការ​​ចំនួន ១៥៥ បង្គោល។ ការវាស់វែងព្រំប្រទល់ដី និង​ដោះ​ស្រាយ​ផល​ប៉ះពាល់​សម្រាប់​កំណាត់​នេះ ត្រូវបានបញ្ចប់​រួចរាល់នៅថ្ងៃទី ៨ ខែមេសា ឆ្នាំ ២០២៥។ គម្រោងកំណាត់ទី១ នេះត្រូវបានប្រកាសជាផ្លូវការកាលពីថ្ងៃទី ៥ ខែសីហា ឆ្នាំ ២០២៤ ក្រោម​អធិបតីភាព​សម្ដេច​មហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។ កំណាត់ទី២៖ មាន​ប្រវែង ១៥១,៦ គីឡូម៉ែត្រ និងមានការបោះបង្គោលចំនួន ១៧៦៥ បង្គោល។ កំណាត់​នេះ​នឹង​ត្រូវ​សាងសង់​ដោយ​ក្រុមហ៊ុន China Road and Bridge Corporation ដោយ​មាន​ក្រសួង​សាធារណការ និងដឹកជញ្ជូនជាម្ចាស់គម្រោង។ ពិធីបើកការដ្ឋានសាងសង់កំណាត់ទី២ នេះ នឹង​ប្រព្រឹត្តទៅ​នៅ​ថ្ងៃសៅរ៍ ទី ១១ ខែ​មេសា ឆ្នាំ ២០២៦ ក្រោម​អធិបតីភាព​ដ៏​ខ្ពង់ខ្ពស់​របស់​សម្ដេច​មហាបវរ​ធិបតី ហ៊ុន ម៉ាណែត។ ៣. លក្ខណៈបច្ចេកទេស និងហេដ្ឋារចនាសម្ព័ន្ធ ទំហំប្រឡាយ៖ ផ្លូវ​នាវាចរណ៍មាន​ជម្រៅប្រមាណ ៤,៧ ម៉ែត្រ (ធៀបនឹង​នីវ៉ូទឹកសមុទ្រជាមធ្យម) និង​មាន​ទទឹង​បាតក្រោម​​ប្រឡាយ ៦០ ម៉ែត្រ។ សមត្ថភាព​ផ្ទុក៖ អាចអនុញ្ញាតឲ្យនាវាចំណុះ ៣.០០០ តោន ធ្វើនាវាចរណ៍បាននៅរដូវប្រាំង និង​ចំណុះ ៥.០០០ តោន នៅរដូវវស្សា។ ហេដ្ឋារចនាសម្ព័ន្ធអមគម្រោង៖ រួមមានសន្ទះផ្លូវ​នាវាចរណ៍ចំនួន ២ កន្លែង (ស្ថិតនៅខេត្តតាកែវ និង​ខេត្តកែប) ស្ពាន​ចំនួន ៦ កន្លែង ទីតាំង​បោះ​យុថ្កា​ចំនួន ៥ កន្លែង បំពង់​បន្ទេរ (ស៊ីហ្វុង) ចំនួន ២៩ កន្លែង និង​ទ្វារ​ទឹក​ចំនួន ៦៩ កន្លែង។ បច្ចេកវិទ្យា៖ មានការធ្វើនាវាចរណ៍ដោយមិនចាំបាច់ចូលចត និងឆ្លងកាត់ដោយស្វ័យប្រវត្តិ ព្រម​ទាំង​មានការទូទាត់កម្រៃសេវាភ្លាមៗដោយប្រព័ន្ធស្វ័យប្រវត្តិកម្ម។ ៤. កម្លាំងប្រតិបត្តិការ និងការដ្ឋាន ក្រុមហ៊ុននឹងដាក់ពង្រាយគ្រឿងចក្រ និងឧបករណ៍បច្ចេកទេសចំនួន ៣ ២៤០ គ្រឿង។ មាន​បុគ្គលិក និងកម្មករសរុបចំនួន ៧ ៦៨៨ នាក់។ ការដ្ឋានសរុបចំនួន ១១ ត្រូវបានបង្កើតឡើងនៅតាមបណ្ដោយផ្លូវគម្រោងទាំងមូល ដែល​ស្នាក់ការ​នីមួយៗ​អាចផ្ទុកបុគ្គលិកគ្រប់គ្រងបានចំនួន ២៥ នាក់ និងកម្មករចំនួន ៤០០ នាក់។ តើគម្រោងនេះផ្តល់អត្ថប្រយោជន៍សេដ្ឋកិច្ចអ្វីខ្លះដល់កម្ពុជា? គម្រោងគ្រប់គ្រងធនធានទឹកចម្រុះហ្វូណនតេជោ នឹង​ផ្តល់អត្ថប្រយោជន៍សេដ្ឋកិច្ចសំខាន់ៗ​ជាច្រើន​ដល់​កម្ពុជា ដែល​នឹង​បង្កើតជាច្រករបៀងផ្លូវទឹកដ៏សំខាន់ ​ត​ភ្ជាប់​ការដឹកជញ្ជូនពីរាជធានីភ្នំពេញទៅកាន់តំបន់ឆ្នេរសមុទ្រកម្ពុជា ក៏ដូចជាតភ្ជាប់ផ្លូវទឹក​ក្នុងប្រទេស​ទៅនឹងផ្លូវសមុទ្រនៃបណ្តាប្រទេសក្នុងតំបន់ និងសកលលោក។ តាមរយៈការតភ្ជាប់ហេដ្ឋារចនាសម្ព័ន្ធ និងសកម្មភាព​សេដ្ឋកិច្ច​ខាងលើ នឹង​​ជួយជំរុញដល់ការធ្វើឧស្សាហកម្ម និង​ការរីកចម្រើន​នៃហេដ្ឋារចនាសម្ព័ន្ធ ព្រមទាំងជួយតភ្ជាប់បន្ថែមនូវ តំបន់សេដ្ឋកិច្ចច្រក​របៀងត្រី​និងស្រូវ និង ច្រករបៀងឧស្សាហកម្មនិងរ៉ែនៃទន្លេមេគង្គលើ។ គម្រោងប្រវត្តិសាស្ត្រនេះ​មានតួនាទីយ៉ាងសំខាន់​ក្នុងការគាំទ្រដល់​ចក្ខុវិស័យអភិវឌ្ឍន៍​ជាយុទ្ធសាស្ត្ររបស់កម្ពុជា ក្នុងការប្រែ​ក្លាយខ្លួនទៅជា​ប្រទេសដែល​មាន​ចំណូល​ខ្ពស់នៅក្នុងឆ្នាំ ២០៥០៕