កិច្ចប្រជុំពិភាក្សាស្វែងរកដំណោះស្រាយក្នុងការអនុវត្តគម្រោងឆ្នាំ២០២៦ ក្នុងបរិបទនៃការកើនឡើងនៃតម្លៃប្រេងឥន្ធនៈ តម្លៃសម្ភារៈសំណង់ និងការផ្គត់ផ្គង់ ទីស្តីការក្រសួង៖ នាថ្ងៃព្រហស្បតិ៍ ទី៩ ខែមេសា ឆ្នាំ២០២៦ លោកជំទាវ កុយ សុដានី រដ្ឋលេខាធិការប្រចាំការ ក្រសួងសាធារណការ និងដឹកជញ្ជូន បានដឹកនាំកិច្ចប្រជុំពិនិត្យលើការអនុវត្តការងារគម្រោងក្នុងឆ្នាំ២០២៦ និងផលប៉ះពាល់នៃការកើនឡើងនៃតម្លៃប្រេងឥន្ធនៈ តម្លៃសម្ភារៈសំណង់ និងការផ្គត់ផ្គង់ ដោយមានការចូលរួមដោយផ្ទាល់ពីសំណាក់ ឯកឧត្តមរដ្ឋលេខាធិការ ឯកឧត្តមអនុរដ្ឋលេខាធិការ ឯកឧត្តមអគ្គនាយក លោកអគ្គនាយករង តំណាងកងវិស្វកម្មនៃក្រសួងការពារជាតិ និងក្រសួងមហាផ្ទៃ និងតាមរយៈប្រព័ន្ធវីដេអូពីចម្ងាយ មានការចូលរួមពីលោកប្រធាននាយកដ្ឋាន មន្ទីរសាធារណការ និងដឹកជញ្ជូន រាជធានី-ខេត្ត និងមន្ត្រីជំនាញពាក់ព័ន្ធផងដែរ។ កិច្ចប្រជុំពិភាក្សាខាងលើមានគោលបំណងពិនិត្យលើបញ្ហាប្រឈម ស្វែងរកដំណោះស្រាយ នីតិវិធី និងលទ្ធភាពក្នុងការអនុវត្តគម្រោងក្នុងបរិបទនៃការកើនឡើងនៃតម្លៃប្រេង តម្លៃសម្ភារៈសំណង់ និងការផ្គត់ផ្គង់ ដោយធ្វើការពិនិត្យវាយតម្លៃកំណត់អាទិភាពគម្រោងឡើងវិញ សម្រាប់បន្ដយកទៅពិភាក្សាជាមួយក្រសួងសេដ្ឋកិច្ច និងហិរញ្ញវត្ថុ៕