កំពង់ផែពហុបំណងខេត្តក្រចេះកំពុងដំណើរការសាងសង់ដែលនឹងជំរុញសក្ដានុពលសេដ្ឋកិច្ច ការដឹកជញ្ជូន តាមផ្លូវទឹកនៅក្នុងតំបន់ភាគឦសាននៃប្រទេសកម្ពុជា។ កំពង់ផែនេះត្រូវបានបង្កើតឡើងក្នុងគោលបំណងសម្រួលដល់ការដឹកជញ្ជូនទំនិញផ្លូវទឹក ដោយដើរតួនាទីជាចំណុចតភ្ជាប់ដ៏សំខាន់សម្រាប់ការដឹកជញ្ជូនទំនិញកសិកម្ម និងធនធានផ្សេងៗចេញពីតំបន់ខេត្តក្រចេះ និងខេត្តជុំវិញតាមរយៈផ្លូវទឹក។ កំពង់ផែនេះក៏នឹងចូលរួមកាត់បន្ថយការចំណាយលើការដឹកជញ្ជូន និងបង្កើនប្រសិទ្ធភាពក្នុងការនាំចេញនាំចូលទំនិញ ដោយប្រើប្រាស់សក្តានុពលនៃទន្លេមេគង្គ។ លោក សូម សារិត អភិបាលស្រុកព្រែកប្រសព្វ ខេត្តក្រចេះបានបញ្ជាក់ថា គម្រោងនេះស្ថិតក្នុងដំណាក់កាលអភិវឌ្ឍន៍ និងមានការវិវឌ្ឍជាបន្តបន្ទាប់ស្របតាមផែនការមេរបស់ក្រសួងសាធារណការ និងដឹកជញ្ជូន។ លោកថា តាមរយៈកំពង់ផែនេះអាចជួយសម្រួលដល់ការដឹកជញ្ជូនផលិតផលកសិផលរបស់ប្រជាកសិករបានលឿនរហ័ស និងកាន់តែមានភាពងាយស្រួល។ ក្នុងនោះអ្នកស្រុកព្រែកប្រសព្វអាចទទួលបានផលប្រយោជន៍ពីកំពង់ផែនេះច្រើនជាងគេ។ លោកបន្តថា កំពង់ផែនេះក៏នឹងដើរតួជាទីចំណតទូកដឹកជញ្ជូនធំៗ ចរាចរណ៍ទំនិញ និងបង្កើតបានតំបន់ស្តុកទំនិញបានច្រើនរក្សាបានសង្វាក់ដឹកជញ្ជូនមានប្រសិទ្ធភាពផងដែរ ជាពិសេសរោងចក្រស៊ីម៉ង់តិ៍។ លើសពីនេះទៀត ក៏អាចបង្កើតនូវឱកាសការងារ និងទាក់ទាញវិនិយោគិនមកកាន់ស្រុកព្រែកប្រសព្វ ក៏ដូចជាខេត្តក្រចេះទាំងមូល។ ខណៈដែលស្រុកព្រែកប្រសព្វមានទីតាំងអំណោយផលពីធម្មជាតិ ស្ថិតនៅតាមបណ្តោយទន្លេមេគង្គដែលផ្តល់លក្ខខណ្ឌអំណោយផលក្នុងការតភ្ជាប់ជាមួយផ្លូវគោកនិងផ្លូវទឹក កំពង់ផែពហុបំណងនេះនឹងជួយជម្រុញសេដ្ឋកិច្ចខេត្តឲ្យខ្លាំងក្លាបំផុត ព្រោះអាចកាត់បន្ថយការចំណាយថ្លៃដឹកជញ្ជូនទំនិញពីថ្លៃមកថោក និងរក្សាលំនឹងតម្លៃផលិតផលដែលផលិតបានមិនអាចឱ្យឈ្មួញកណ្តាលកេងចំណេញពីកសិករបានទៀត។ លោក សូម សារិត បន្ថែម។ នៅក្នុងស្រុកព្រែកប្រសព្វមានផ្ទៃដីកសិកម្ម សរុបប្រមាណជាង ៨០ ពាន់ហិកតា ក្នុងនោះស្រែប្រាំងមានប្រមាណជាង ៩ពាន់ហិកតា ស្រែវស្សាជាង ៥ ពាន់ហិកតា និងដំណាំយុទ្ធសាស្រ្តរួមមាន ដំណាំកៅស៊ូចំនួន ៩,៩ពាន់ហិកតា ស្វាយចន្ទីចំនួន ៣៦ ពាន់ហិកតា ស្វាយកែវល្មៀត ៦ ពាន់ហិកតា និងដីល្បាប់សម្រាប់ដំណាំតាមរដូវកាល ២ ពាន់ហិកតា។ ស្រុកមានឃុំចំនួន ៨ឃុំ ភូមិចំនួន ៦១ភូមិ និងមានប្រជាពលរដ្ឋសរុបចំនួន ៧៦ ពាន់នាក់ ស្មើនិង ១៨ពាន់គ្រួសារ៕