កិច្ចប្រជុំពិភាក្សាបច្ចេកទេសរវាងក្រសួងសាធារណការ និងដឹកជញ្ជូន ជាមួយនឹងសហព័ន្ធស្រូវអង្ករកម្ពុជា ទីស្ដីការក្រសួង៖ នាថ្ងៃចន្ទ ទី៦ ខែមេសា ឆ្នាំ២០២៦ ឯកឧត្តម យិត បុណ្ណា រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំពិភាក្សាបច្ចេកទេសជាមួយសហព័ន្ធស្រូវអង្ករកម្ពុជា (Cambodia Rice Federation - CRF) ដោយមានការចូលរួមពីក្រុមការងារបច្ចេកទេសក្រសួងរួមមាន ឯកឧត្តមអនុរដ្ឋលេខាធិការ ឯកឧត្តមទីប្រឹក្សា លោកអគ្គនាយកបច្ចេកទេសស្ដីទី លោកប្រធានលេខាធិការដ្ឋាន នៃគណៈកម្មាធិការសម្របសម្រួលអចិន្ត្រៃយ៍ (គ.ស.អ) និងមន្ត្រីជំនាញបច្ចេកទេសពាក់ព័ន្ធ និងសហព័ន្ធស្រូវអង្ករកម្ពុជា ដឹកនាំដោយ ឧកញ៉ា ចាន់ សុឃាំង ប្រធានក្រុមប្រឹក្សាភិបាលសហព័ន្ធស្រូវអង្ករកម្ពុជា និង ឧកញ៉ា ឡាយ ឈុនហួ ប្រធានសហព័ន្ធស្រូវអង្ករកម្ពុជា ដោយមានការចូលរួមពីថ្នាក់ដឹកនាំ និងក្រុមការងារនៃសហព័ន្ធស្រូវអង្ករកម្ពុជា ព្រមទាំងប្រតិបត្តិករដឹកជញ្ជូនផងដែរ។ កិច្ចប្រជុំនេះរៀបចំឡើងក្នុងគោលបំណងពិនិត្យ និងពិភាក្សា លើការដឹកជញ្ជូនកសិផលស្រូវដែលនឹងត្រូវប្រមូលផលក្នុងរយៈពេលដ៏ខ្លីខាងមុខ ដើម្បីធានាបាននូវការប្រមូលផលប្រព្រឹត្តទៅបានទាន់ពេលវេលា និងជួយកាត់បន្ថយចំណាយថ្លៃដើមផលិតកម្មស្រូវ។ កិច្ចប្រជុំនេះ ក៏បានពិភាក្សាទៅលើការពិនិត្យទិដ្ឋភាពច្បាប់ បច្ចេកទេសផ្លូវថ្នល់ និងកម្រិតទម្ងន់ផ្ទុកអតិបរមា ព្រមទាំងការប្រើប្រាស់យានយន្តដែលមានបច្ចេកទេសត្រឹមត្រូវ (ចំនួនភ្លៅ និងកង់) និងការកំណត់ខ្សែផ្លូវក្នុងការដឹកជញ្ជូនឱ្យបានសមស្របទៅនឹងបទដ្ឋាន និងលក្ខណៈបច្ចេកទេសដែលកំណត់ដោយក្រសួងសាធារណការ និងដឹកជញ្ជូន៕