គម្រោងគ្រប់គ្រងធនធានទឹកចម្រុះព្រែកជីកហ្វូណន នឹងត្រូវការបើកដ្ឋានសាងសង់កំណាត់ទី២ ក្រោមវត្តមានសម្តេចនាយករដ្ឋមន្ត្រី ហ៊ុន ម៉ាណែត នាថ្ងៃទី១១ ខែមេសា។ នេះបើតាមលោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា(CDC)។លោក ស៊ុន ចាន់ថុល បានដឹកនាំក្រុមការងារជំនាញចុះពិនិត្យទីតាំងរៀបចំពិធីបើកការដ្ឋានសាងសង់គម្រោងគ្រប់គ្រងធនធានទឹកចម្រុះហ្វូណនតេជោ កំណាត់ទី២ នាថ្ងៃទី២ ខែមេសា។ កំណាត់ទី២នៃគម្រោងនេះ គិតចាប់ពីព្រែកពោធិ៍ ខេត្តកណ្តាល ដល់សមុទ្រខេត្តកែប ដែលត្រៀមបើកការដ្ឋានសាងសង់ នៅថ្ងៃទី១១ ខែមេសា។ លោក ស៊ុន ចាន់ថុល ដែលជាអនុប្រធានប្រចាំការនៃគណៈកម្មាធិការពិសេសដើម្បីជំរុញការរៀបចំ និងការអនុវត្តគម្រោងព្រែកជីកហ្វូណនបានបញ្ជាក់នៅលើបណ្តាញទំនាក់ទំនងសង្គមថា ៖ « ពិធីបើកការដ្ឋានសាងសង់កំណាត់ទី២នៃគម្រោងព្រែកជីកហ្វូណន នឹងធ្វើឡើងក្រោមអធិបតីភាពសម្តេច ហ៊ុន ម៉ាណែត។»។ ពិធីនេះ នឹងត្រូវធ្វើឡើងនៅក្នុងភូមិសាស្រ្តស្រុកបូរីជលសារ ខេត្តតាកែវ។ ការដ្ឋានកំណាត់ទី២ ធ្វើឡើងបន្ទាប់ពីក្រសួងជំនាញ បានប្រមូលទិន្នន័យ ផ្ទៀងផ្ទាត់និយាមកា និងបោះបង្គោលព្រំដី តាមបណ្តោយគម្រោងព្រែកជីកហ្វូណនតេជោនៃកំណាត់ទី១រួចរាល់ កាលពីខែកក្កដា ឆ្នាំ២០២៥។ កំណាត់ទី១មានប្រវែងជាង២១គីឡូម៉ែត្រ ពីចំណុចដើមទី នៃតំបន់ព្រែកតាកែវ(ទន្លេមេគង្គ)-ព្រែកពោធិ៍(ទន្លេបាសាក់) ក្នុងភូមិស្រ្តាខេត្តកណ្តាល ចំនួន ១៥៥បង្គោល។ ត្រូវបានសម្រេចរួចរាល់ទាំងស្រុងត្រឹមថ្ងៃនេះ ដោយបានអនុវត្ត ក្នុងខេត្តកណ្តាល តាកែវ ខេត្តកំពត និងខេត្តកែប ជាភូមិសាស្រ្តបញ្ចប់ចុងក្រោយគេ។ បង្គោលព្រំដី ដែលបានបោះរួចសរុបទាំងអស់មានចំនួន ១ ៩២០ បង្គោល។គម្រោងព្រែកជីហ្វូណនតេជោតម្លៃ១៧០០លានដុល្លារអាម៉េរិក ត្រូវបានបើកការដ្ឋានដំណាក់កាលទី១ កាលពីថ្ងៃទី៥ ខែសីហា ឆ្នាំ២០២៤។ ក្នុងកំណាត់ទី១នេះ មានប្រវែង២៦គីឡូម៉ែត្រ ដែលបញ្ចប់ការប្រមូលទិន្នន័យ ផ្ទៀងផ្ទាត់និយាមកា និងបោះបង្គោលព្រំដី កាលខែកក្កដា ឆ្នាំ២០២៥។ ចំពោះកំណាត់ទី ២ គឺមានចម្ងាយ ១៥៩ គីឡូម៉ែត្រ (ពីទន្លេបាសាក់ខេត្តតាកែវ រហូតដល់ខេត្តកែប) នឹងត្រូវវិនិយោគរួមគ្នា រវាងសហគ្រាសសាធារណៈ ក្រុមហ៊ុនក្នុងស្រុក និងក្រុមហ៊ុនសារជីវកម្មស្ពាន និងថ្នល់ (CRBC)។ បើតាមផែនគម្រោងអភិវឌ្ឍន៍ព្រែកជីកហ្វូណននេះ នឹងត្រូវបញ្ចប់នៅឆ្នាំ២០២៨។ តាមរយៈការសិក្សារបស់ក្រុមការងារបច្ចេកទេស បានបង្ហាញថា តម្រាយផ្លូវទឹក ដែលតភ្ជាប់ទៅពីទន្លេ ទៅសមុទ្រ ស្រដៀងគ្នានេះ ក៏ធ្លាប់បានជីកតាំងពីអាណាចក្រហ្វូណនមកម្ល៉េះ ហើយផ្លូវទឹកនេះ នឹងត្រូវកសាងលើតម្រាយខ្សែផ្លូវទឹកបុរាណ ដែលបានបន្សល់ទុកស្រាប់។ គម្រោងនេះ ត្រូវបានសិក្សាយ៉ាងល្អិតល្អន់ជាទីបំផុត ទាំងលើបច្ចេក ទិដ្ឋភាពច្បាប់ ផលប៉ះពាល់ និងផលប្រយោជន៍ផ្នែកសេដ្ឋកិច្ច។ សម្រាប់ការរចនាប្លង់វិស្វកម្ម និងស្ថាបត្យកម្មលើហេដ្ឋារចនាសម្ព័ន្ធផ្លូវទឹក សំណង់ផ្លូវទឹក និងសន្ទះផ្លូវនាវាចរណ៍វិញ គឺមានការស្ថាបនាច្រាំងនៃផ្លូវនាវាចរណ៍នេះ ដោយនឹងប្រើប្រាស់វិធីសាស្ត្រចំនួនពីរប្រភេទ ដែលសមស្រប គឺការដាំស្មៅនៅក្នុងប្រឡាយនាវាចរណ៍ និងការរៀបចំច្រាំងទន្លេបាសាក់ចំណុចព្រែកតាឯក រហូតដល់ព្រែកតាហ៊ីង ដោយប្រើប្រាស់ Geotextile និងបាវខ្សាច់ Geobag សម្រាប់ការពារការបាក់ច្រាំង។ សម្រាប់ទំហំចរាចរណ៍វិញ មានទទឹងខាងលើ ១០០ម៉ែត្រ ទទឹងខាងក្រោម ៨០ម៉ែត្រ និងជម្រៅ ៥,៤ម៉ែត្រ (បញ្ជាក់៖ ជម្រៅនាវា ៤,៧ ម៉ែត្រ) សម្រាប់នាវាឆ្លងកាត់។ គម្រោងនេះ នឹងសាងសង់សន្ទះផ្លូវនាវាចរណ៍ចំនួន៣កន្លែង ដែលស្ថិតនៅខេត្តកណ្តាល ខេត្តតាកែវ និងខេត្តកែប រួមទាំងសាងសង់ស្ពានចំនួន ១១កន្លែង។ គម្រោងនេះ នឹងផ្ដល់អត្ថប្រយោជន៍ជាច្រើនផ្សេងទៀត ដូចជា ការបង្កើតតំបន់ពាណិជ្ជកម្ម និងមជ្ឈមណ្ឌលភស្ដុភារកម្ម, ការអភិវឌ្ឍផែរណបថ្មីៗជាច្រើន ,ការពង្រីកតំបន់អភិវឌ្ឍន៍កសិកម្ម ធារាសាស្ត្រ វារីវប្បកម្ម និងចិញ្ចឹមសត្វ ,ការជួយគាំទ្រដល់ការអភិវឌ្ឍប៉ូលសេដ្ឋកិច្ចទី៤ របស់កម្ពុជា, ការបង្កើតការងារបន្ថែមនៅកំពង់ផែស្វយ័តក្រុងព្រះសីហនុ កំពង់ផែស្វយ័តក្រុងភ្នំពេញ និងកំពង់ផែផ្សេងទៀត, ការជំរុញការអភិវឌ្ឍទីក្រុង និងនគរូបនីយកម្ម និងការជំរុញការរីកចម្រើនផ្នែកអចលនទ្រព្យ ៕