ប្រជាពលរដ្ឋនៅក្នុងស្រុកកោះញែកទទួលបានការចុះពិនិត្យ ព្យាបាលជំងឺទូទៅដោយឥតគិតថ្លៃ មណ្ឌលគិរី ៖ ដោយមានការចូលរួមគាំទ្រពីក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី រួមជាមួយរដ្ឋបាលខេត្តមណ្ឌលគិរី និងមន្ទីរសុខាភិបាលនៃរដ្ឋបាលខេត្តមណ្ឌលគិរី បានសហការរៀបចំកម្មវិធីចុះពិនិត្យ និងព្យាបាលជំងឺទូទៅដោយឥតគិតថ្លៃ ជូនប្រជាជន រួមមាន៖ ពិនិត្យសុខភាពមាត់ធ្មេញ ភ្នែក និងពិនិត្យ ព្យាបាលកុមារ និងមនុស្សចាស់ ផ្តល់ថ្នាំបង្ការ និងជំងឺរោគស្ត្រីចុះពិនិត្យ និងព្យាបាលជំងឺទូទៅជូនប្រជាជនរស់នៅស្រុកកោះញែក នាថ្ងៃអាទិត្យ ទី២៩ ខែមីនា ឆ្នាំ២០២៦។ កម្មវិធីនេះ មានការចូលរួមពីក្រុមគ្រូពេទ្យរបស់មន្ទីរសុខាភិបាល នៃរដ្ឋបាលខេត្តមណ្ឌលគិរី សហការជាមួយក្រុមគ្រូពេទ្យកុមារអង្គការចេនឡា ក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី, ក្រុមការងារយុវជនកាកបាទក្រហមកម្ពុជាខេត្តមណ្ឌលគិរី, ក្រុមការងារ ស.ស.យ.ក ខេត្តមណ្ឌលគិរី និងអាជ្ញាធរមូលដ្ឋាន ជាច្រើនរូបផងដែរ នៅបរិវេណសាលាបឋមសិក្សាសុខសាន្ត ភូមិក្លង់ឡែ ឃុំសុខសាន្ត ស្រុកកោះញែក។ ការលើកកម្ពស់សុខុមាលភាពប្រជាពលរដ្ឋជានយោបាយអាទិភាពមួយរបស់រាជរដ្ឋាភិបាល ហើយការចុះធ្វើសកម្មភាពមនុស្សរបស់ក្រុមគ្រូពេទ្យដោយពិនិត្យ និងព្យាបាលជំងឺជូនប្រជាពលរដ្ឋដោយមិនគិតថ្លៃ គឺបានចូលរួមធ្វើឱ្យប្រសើរឡើងនូវសុខភាពរបស់ប្រជាពលរដ្ឋ កាត់បន្ថយការចំណាយរបស់ប្រជាពលរដ្ឋលើជំងឺតម្កាត់ផ្សេងៗ ជាពិសេសជាឱកាសផ្សព្វផ្សាយ និងអប់រំប្រជាពលរដ្ឋឱ្យចេះគិតគូរយកចិត្តទុកដាក់ទៅលើសុខភាពរបស់ពួកគាត់៕