និស្សិតជ័យលាភីអាហារូបករណ៍រដ្ឋាភិបាលប្រទេសជប៉ុន(MEXT) ថ្នាក់ស្រាវជ្រាវ ឆ្នាំ២០២៦ ទទួលអនុសាសន៍ផ្តាំផ្ញើល្អៗ មុនចេញដំណើរទៅបន្តការសិក្សា ទីស្តីការក្រសួង៖ នាថ្ងៃសុក្រ ទី២៧ ខែមីនា ឆ្នាំ២០២៦ ឯកឧត្តម ប៉ាល់ ចន្ទតារា រដ្ឋលេខាធិការ ជាតំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជួបសំណេះសំណាលជាមួយក្រុមនិសិ្សតជ័យលាភីអាហារូបករណ៍រដ្ឋាភិបាលប្រទេសជប៉ុន(MEXT) ថ្នាក់ស្រាវជ្រាវសម្រាប់ឆ្នាំ២០២៦ មុនចេញដំណើរទៅសិក្សា ដោយមានការចូលរួមពីសំណាក់ថ្នាក់ដឹកនាំក្រសួង និងមន្ត្រីពាក់ព័ន្ធជាច្រើនរូប។ ជំនួបនេះរៀបចំឡើង ដើម្បីចែករំលែកអំពីបទពិសោធន៍ អនុសាសន៍ និងការណែនាំល្អៗ ដែលជាទស្សនទានដ៏មានតម្លៃបំផុតសម្រាប់និស្សិតយកទៅសិក្សាស្វែងយល់បន្ថែម និងការជួយផ្សព្វផ្សាយពីវប្បធម៌ អរិយធម៌ និងការអភិវឌ្ឍរបស់ជាតិ ក្នុងគោលបំណងឱ្យពិភពលោកបានយល់ដឹងកាន់តែច្បាស់អំពីប្រទេសកម្ពុជាថែមទៀត។ បន្ថែមពីលើនេះឯកឧត្តមក៏បានលើកឡើងអំពីសមិទ្ធផលសំខាន់ៗជាច្រើន និងការងាររបស់ក្រសួងកំពុងអនុវត្ត លើវិស័យសាធារណការ និងដឹកជញ្ជូន នៅកម្ពុជាឱ្យកាន់តែមានការអភិវឌ្ឍកាន់តែប្រសើរឡើង ក្នុងនាមជាសេនាធិការរបស់រាជរដ្ឋាភិបាល។ ថ្លែងក្នុងឱកាសនោះ ឯកឧត្តមរដ្ឋលេខាធិការ បានចូលរួមអបអរសាទរ កោតសរសើរចំពោះនិស្សិតជ័យលាភីទាំងអស់ និងបានពាំនាំនូវការផ្ដាំផ្ញើសាកសួរសុខទុក្ខពីសំណាក់ ឯកឧត្តមរដ្ឋមន្ត្រី ក៏ដូចជាជំរុញលើកទឹកចិត្តឱ្យនិស្សិតទាំងអស់យកចិត្តទុកដាក់ និងខិតខំប្រឹងប្រែងសិក្សារៀនសូត្រ និងស្វែងយល់ពីចំណេះដឹងថ្មីៗសំដៅពង្រឹងសមត្ថភាពរបស់ខ្លួន ដើម្បីទទួលបាននូវលទ្ធផលដ៏ល្អប្រសើរ និងចូលរួមក្នុងការអភិវឌ្ឍកសាងសង្គម-សេដ្ឋកិច្ចកម្ពុជា ស្របតាមយុទ្ធសាស្ត្របញ្ចកោណរបស់រាជរដ្ឋាភិបាលអាណ្តិតទី៧ និងបង្កើនសក្តានុពលជំនាញរៀងៗខ្លួនជាមួយរាជរដ្ឋាភិបាលនៅពេលវិលត្រឡប់មកមាតុប្រទេសវិញ ។ សូមជម្រាបថា៖ និស្សិតអាហារូបករណ៍ដែលនឹងត្រូវបន្ដការសិក្សានៅប្រទេសជប៉ុន(MEXT)ថ្នាក់ស្រាវជ្រាវសម្រាប់ឆ្នាំ២០២៦នេះ មានចំនួនសរុប ១២នាក់ ស្រី៥នាក់ ដែលនឹងត្រូវសិក្សាលើមុខជំនាញ រួមមាន៖ សិក្សាអន្តរជាតិ វិស្វកម្មអគ្គិសនី វិស្វកម្មគីមី ទំនាក់ទំនងអន្តរជាតិ សេដ្ឋកិច្ចវិស្វកម្ម ឱសថសាស្ត្រ សេដ្ឋកិច្ច អភិវឌ្ឍអន្តរជាតិ ច្បាប់ ព័ត៌មានវិទ្យា និងភាសាវិទ្យា៕