កិច្ចប្រជុំពិគ្រោះយោបល់កម្រិតបច្ចេកទេសជាមួយអង្គភាពថវិកាក្រសួង ដើម្បីសម្របសម្រួលប្រមូលធាតុចូលសម្រាប់ការរៀបចំគម្រោងថវិកាឆ្នាំ២០២៧ របស់ក្រសួងសាធារណការ និងដឹកជញ្ជូន ទីស្ដីការក្រសួង៖ នាព្រឹកថ្ងៃពុធ ទី១៨ ខែមីនា ឆ្នាំ២០២៦ ឯកឧត្ដម កែន រដ្ឋា អគ្គនាយកនៃអគ្គនាយកដ្ឋានរដ្ឋបាល និងហិរញ្ញវត្ថុ បានអញ្ជើញដឹកនាំកិច្ចប្រជុំពិគ្រោះយោបល់កម្រិតបច្ចេកទេសជាមួយអង្គភាពថវិកាក្រសួង ដើម្បីសម្របសម្រួលប្រមូលធាតុចូលសម្រាប់ការរៀបចំគម្រោងថវិកាឆ្នាំ២០២៧ របស់ក្រសួងសាធារណការ និងដឹកជញ្ជូន ដោយមានការអញ្ជើញចូលរួមពីឯកឧត្ដមអគ្គនាយកផែនការ និងគោលនយោបាយ ឯកឧត្ដមអគ្គនាយកប្រព័ន្ធចម្រោះទឹកកខ្វក់ ឯកឧត្ដមនាយកវិទ្យាស្ថានតេជោសែនសាធារណការ និងដឹកជញ្ជូន លោក លោកស្រីថ្នាក់ដឹកនាំ និងមន្ត្រីជំនាញនៃអង្គភាពថវិកាក្រោមឱវាទក្រសួង។ កិច្ចប្រជុំនេះត្រូវបានរៀបចំឡើង ក្នុងគោលបំណងដើម្បីពិភាក្សា និងពិគ្រោះយោបល់ក្នុងក្របខ័ណ្ឌជារួម ជាមួយអង្គភាពថវិកាក្រោមឱវាទក្រសួងលើការពិនិត្យតម្រូវការថ្មីៗនៅក្នុងរចនាសម្ព័ន្ធថវិកា និងការផ្ទៀងផ្ទាត់ផែនការសមិទ្ធកម្មប្រចាំឆ្នាំ ព្រមទាំងធ្វើការពិនិត្យអាទិភាពលើគោលនយោបាយថ្មីៗ (New Policy) និងកត្តាជំរុញតម្រូវការ (Demand Drivers) ដើម្បីជាមូលដ្ឋាន និងធាតុចូលក្នុងការស្នើរៀបចំក្របខ័ណ្ឌថវិការយៈពេលមធ្យម និងគម្រោងថវិកាប្រចាំឆ្នាំ២០២៧ ខាងមុខ។ បន្ថែមពីនេះ ឯកឧត្តមប្រធានអង្គប្រជុំ ក៏បានស្នើឱ្យអង្គភាពថវិកាក្រោមឱវាទក្រសួង ត្រូវគិតគូរទៅលើអាទិភាពគោលនយោបាយ និងសកម្មភាពថ្មី ដែលជាតម្រូវការចាំបាច់របស់ខ្លួន ឱ្យបានលម្អិតគ្រប់ជ្រុងជ្រោយ ព្រមទាំងគិតគូរជាបណ្ដើរៗក្នុងការរៀបចំគម្រោងថវិកាលម្អិតប្រចាំឆ្នាំ២០២៧ នៅតាមអង្គភាពថវិកានីមួយៗផងដែរ៕