រដ្ឋាភិបាល​បានសម្រេច​បង្កើតកំពង់ផែពហុបំណង​ និង​មណ្ឌល​ភស្តុភា​កម្ម​កំពង់ឆ្នាំង​ ដែលជាការបោះជំហានទៅមុខមួយកម្រិតទៀតលើការពង្រឹង និងបង្កើនសមត្ថភាពលើប្រព័ន្ធដឹកជញ្ជូនទំនិញតាមផ្លូវទឹកនៅកម្ពុជា។កំពង់ផែពហុបំណង​ និង​មណ្ឌល​ភស្តុភា​កម្ម​​ មាន​ទីតាំង​ស្ថិតនៅ​ភូមិ​ចំបក់ខ្ពស់​ ឃុំ​ស្វាយ​រំពារ ​ស្រុកកំពង់លែង ​ខេត្តកំពង់ឆ្នាំង ​​ជា​គម្រោងវិនិយោគរបស់ក្រុមហ៊ុន ខេអិលភី.ធី ត្រេនស្ព័រ​ថេ​សិន​ ដែលមានសមត្ថភាពផ្ដល់​សេវា​កម្ម​សម្រាប់​ទំនិញ​ឆ្លងកាត់​ប្រមាណ​ ២ លានតោន ក្នុងមួយឆ្នាំ។​ ​អនុក្រឹត្យចុះហត្ថលេខា​ដោយ​សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា​ នៅថ្ងៃទី ១៣ ខែមីនា ឆ្នាំ ២០២៦ បញ្ជាក់ថា កំពង់ផែ​ពហុបំណង​ និង​មណ្ឌលភស្តុភាកម្ម​កំពង់ឆ្នាំង​ ត្រូវបាន​បង្កើត​ឡើង ដើម្បីបម្រើនាវាដែលធ្វើនាវាចរជាលក្ខណៈអន្តរជាតិ ចេញ-ចូល ផ្ទេរផ្ទុក និងលើក​ដាក់​ទំនិញ​ទូទៅ​ រួមទាំងកុងតឺន័រ និង​ទំនិញ​ចាក់ធារ។​​អនុក្រឹត្យ​ដដែល ​បង្ហាញថា ​ដែនទឹក​នៃ​កំពង់ផែនេះ​មាន​ពីរ​ផ្នែក ជាទ្រព្យសម្បត្តិសាធារណៈរបស់រដ្ឋ ក្នុងនោះផ្នែកទី១ មានទំហំ ៩០ ៤៧១,៨៦ ម៉ែត្រការ៉េ ស្ថិតនៅតាមច្រាំងទន្លេដែលជ្រុងសងខាងនីមួយៗមានប្រវែង ១០០ ម៉ែត្រ ស្របតាមបណ្ដោយទន្លេ និងផ្នែកទី២មានទំហំ ១៣២ ០០០,៧៧ ម៉ែត្រការ៉េ ស្ថិតនៅជាប់កោះឫស្សីដែលជ្រុង​សងខាង​នីមួយៗ​ មានប្រវែង ១២០ ម៉ែត្រ និងមានប្រវែង ១១០០ ម៉ែត្រ ស្របតាមបណ្ដោយកោះឫស្សី។ ​ដីគោក​នៃកំពង់ផែនេះ ​មានពីរផ្នែកផ្នែកទី១ ​ជា​កម្មសិទ្ធឯកជន​របស់ក្រុមហ៊ុន ​ខេអិលភី.ធី ត្រេនស្ព័រ​ថេ​សិន មានទំហំ ២២០ ៧២៣,៣០ ម៉ែត្រការ៉េ និងផ្នែកទី២ ជាទ្រព្យសម្បត្តិសាធារណៈ​របស់រដ្ឋស្ថិត​នៅ​លើដីកោះឫស្សីក្នុងទន្លេសាបមានទំហំ ១៣៨ ០១៣,៨៦ ម៉ែត្រការ៉េ។ ហេដ្ឋារចនាសម្ព័ន្ធកំពង់ផែនរួមមាន ឃ្លាំងស្តុកទំនិញ ចំណតនាវា ​អាគាររដ្ឋបាល អាគារត្រួត​ពិនិត្យទំនិញ ​ជញ្ជីងថ្លឹងរថយន្ត៕