ថ្នាក់ដឹកនាំក្រសួងចុះពិនិត្យស្ថានភាពការថែទាំខួប និងថែទាំប្រចាំលើផ្លូវជាតិមួយចំនួនតាមបណ្តាខេត្ត នាថ្ងៃទី១១-១២ ខែមីនា ឆ្នាំ២០២៦ ឯកឧត្តម យិត បុណ្ណា រដ្ឋលេខាធិការ ក្រសួងសាធារណការ និងដឹកជញ្ជូន អមដំណើរដោយ ឯកឧត្តមអនុរដ្ឋលេខាធិការ ឯកឧត្តមទីប្រឹក្សា ឯកឧត្តមអគ្គនាយកបច្ចេកទេស លោកប្រធាននាយកដ្ឋានផ្លូវថ្នល់ លោកប្រធាន-អនុប្រធានមន្ទីរសាធារណការ និងដឹកជញ្ជូនខេត្តកំពង់ចាម ត្បូងឃ្មុំ ក្រចេះ ស្ទឹងត្រែង រតនគិរី មណ្ឌលគិរី និងខេត្តព្រៃវែង និងក្រុមការងារបច្ចេកទេសពាក់ព័ន្ធ បានចុះពិនិត្យស្ថានភាពការថែទាំខួប និងថែទាំប្រចាំលើផ្លូវជាតិលេខ៧ ផ្លូវជាតិលេខ៨ ផ្លូវជាតិលេខ៧២ ផ្លូវជាតិលេខ៧៣ ផ្លូវជាតិលេខ៧៦ ផ្លូវជាតិលេខ៧៨ និងផ្លូវជាតិលេខ៧៨-៥។ គោលបំណងនៃដំណើរបេសកកម្មនេះ គឺដើម្បីពិនិត្យវាយតម្លៃស្ថានភាពខ្សែផ្លូវដែលកំពុងជួសជុល និងថែទាំ ដោយមន្ទីរសាធារណការ និងដឹកជញ្ជូនទាំង៧ខេត្តខាងលើ ក្នុងការធានាបាននូវគុណភាព និងប្រសិទ្ធភាពស្របតាមបទដ្ឋានបច្ចេកទេសរបស់ក្រសួង។ ជាមួយគ្នានេះដែរក្រុមការងារបច្ចេកទេសក៏បានពិនិត្យលើទីតាំងពិសោធន៍បឋមរបស់មន្ទីរខាងលើ ដោយឯកឧត្តមរដ្ឋលេខាធិការ បានជំរុញឱ្យមន្ទីរសាធារណការ និងដឹកជញ្ជូន រៀបចំដំឡើងនូវឧបករណ៍ពិសោធន៍ ដែលក្រសួងផ្តល់ជូននាពេលកន្លងមក ដើម្បីប្រើប្រាស់ពិសោធន៍បឋមលើសម្ភារដែលត្រូវយកមកសាងសង់ ជួសជុល និងថែទាំហេដ្ឋារចនាសម្ព័ន្ធផ្លូវថ្នល់៕