កិច្ចប្រជុំជាមួយគណៈប្រតិភូនៃអាជ្ញាធរសវនកម្មជាតិ ស្ដីពីការចាប់ផ្តើមការងារសវនកម្មលើរបាយការណ៍ហិរញ្ញវត្ថុរដ្ឋបាលកណ្ដាល របស់ក្រសួងសាធារណការ និងដឹកជញ្ជូន សម្រាប់ការិយបរិច្ឆេទ២០២៥ ទីស្តីការក្រសួង៖ នាថ្ងៃព្រហស្បតិ៍ ទី៥ ខែមីនា ឆ្នាំ២០២៦ ឯកឧត្ដម មួន វាសនា រដ្ឋលេខាធិការ ក្រសួងសាធារណការ និងដឹកជញ្ជូន បានជួបពិភាក្សាការងារជាមួយគណៈប្រតិភូនៃអាជ្ញាធរសវនកម្មជាតិ ដឹកនាំដោយ ឯកឧត្តម ឡុង អាទិច្ចបូរា អគ្គលេខាធិការ នៃអាជ្ញាធរសវនកម្មជាតិ លើការចាប់ផ្តើមធ្វើសវនកម្មលើរបាយការណ៍ហិរញ្ញវត្ថុរដ្ឋបាលកណ្ដាល របស់ក្រសួងសាធារណការ និងដឹកជញ្ជូន សម្រាប់ការិយបរិច្ឆេទ២០២៥ ដោយមានការចូលរួមពីថ្នាក់ដឹកនាំក្រសួង តំណាងអគ្គនាយកដ្ឋានក្រោមឱវាទក្រសួង ក្រុមប្រតិភូសវនកម្ម នៃអាជ្ញាធរសវនកម្មជាតិ និងមន្ត្រីជំនាញពាក់ព័ន្ធជាច្រើនរូបផងដែរ។ កិច្ចប្រជុំនេះបានឆ្លុះបង្ហាញពីគោលបំណងសវនកម្ម ការតាមដានអនុសាសន៍សវនកម្ម តម្រូវការឯកសារសវនកម្ម និងតារាងពេលវេលាសវនកម្ម សំដៅពន្លឿនពេលវេលាសវនកម្ម និងការពិភាក្សាគ្នាលើបញ្ហានានា ដើម្បីបំពេញចំណុចខ្វះចន្លោះ ដែលក្រសួងអាចជួបប្រទះក្នុងការអនុវត្តតាមនីតិវិធីហិរញ្ញវត្ថុជាធរមាន ធ្វើយ៉ាងណាឱ្យប្រព័ន្ធត្រួតពិនិត្យផ្ទៃក្នុងមានភាពល្អប្រសើរ ដើម្បីរួមចំណែកក្នុងការអនុវត្តកម្មវិធីកែទម្រង់ហិរញ្ញវត្ថុសាធារណៈ ប្រកបដោយប្រសិទ្ធភាព ប្រសិទ្ធផល និងការសន្សំសំចៃថែមទៀត៕