សមាគមនារីក្រសួងសាធារណការ និងដឹកជញ្ជូន ប្រជុំត្រៀមរៀបចំពីធីរំព្ញកខួបលើកទី១១៥ ទិវានារីអន្តរជាតិនារី ៨មីនា ឆ្នាំ២០២៦ ទីស្ដីការក្រសួង៖ នារសៀលថ្ងៃពុធ ទី៤ ខែមីនា ឆ្នាំ ២០២៦ លោកជំទាវ មឹន មាណវី រដ្ឋលេខាធិការ និងជាប្រធានសមាគមនារី ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំផ្ទាល់ និងតាមរយៈវីដេអូពីចម្ងាយជាមួយក្រុមការងារនារីដើម្បីត្រៀមរៀបចំពីធីរំព្ញកខួបលើកទី១១៥ ទិវានារីអន្តរជាតិនារី ៨មីនា ឆ្នាំ២០២៦ ដោយមានការចូលរួមពីលោកជំទាវថ្នាក់ដឹកនាំ ក្រុមការងារសមាគមនារីក្រសួង មកពីអគ្គនាយកដ្ឋានអង្គភាពក្រោមឱវាទក្រសួង និងតំណាងនារីជាថ្នាក់ដឹកនាំមកពីកំពង់ផែស្វយ័តភ្នំពេញ កំពង់ផែស្វយ័យក្រុងព្រះសីហនុ និងមន្ទីរក្រសួងសាធារណការ និងដឹកជញ្ជូន ទាំង២៥ ខេត្ត-ក្រុង និងមន្ត្រីពាក់ព័ន្ធជាច្រើនរូបផងដែរ។ កិច្ចប្រជុំនេះ រៀបចំឡើងក្នុងគោលបំណង ដើម្បីសំណេះសំណាលសួរសុខទុក្ខ ក៏ដូចជាលើកឡើងនូវសកម្មភាពការងាររបស់ស្ត្រីនាពេលកន្លងមក និងការផ្ដល់យោបល់ពីការរៀបចំទិវានារីអន្តរជាតិនៅតាមអគ្គនាយកដ្ឋាន និងនៅតាមមន្ទីរសាធារណការ និងដឹកជញ្ជូនរាជធានី ខេត្ត-ក្រុងនីមួយៗ រួមទាំងការចូលរួមកម្មវិធីសង្គមនានារបស់ស្ត្រី ជាពិសេសជួយទៅលើស្ដ្រី និងកុមារភៀសសឹក។ ទន្ទឹមនេះដែរ លោកជំទាវប្រធានសមាគម បានថ្លែងអំណរគុណ និងកោតសរសើរដល់ក្រុមការងារសមាគមនារីក្រសួង ដែលបានខិតខំប្រឹងប្រែងបំពេញការងារប្រកបដោយឆន្ទៈ ក្នុងការអនុវត្តផែនការសកម្មភាពការងារកន្លងមក និងបានណែនាំឱ្យតំណាងជាស្ត្រីគ្រប់អគ្គនាយកដ្ឋាន នាយកដ្ឋាន និងអង្គភាពក្រោមឱវាទក្រសួង ខិតខំប្រឹងប្រែងបន្ថែមទៀត ដើម្បីពង្រឹងសមត្ថភាពរបស់ខ្លួន សំដៅរួមចំណែកក្នុងការអភិវឌ្ឍប្រទេសជាមួយរាជរដ្ឋាភិបាលកាន់តែប្រសើរ។ សូមជម្រាបជូនផងដែរថា ទិវានារីអន្តរជាតិ ៨មីនា ឆ្នាំ២០២៦ ខួបលើកទី១១៥ នេះ នឹងប្រារព្វឡើងក្រោមប្រធានបទ៖សន្តិភាព និងសន្តិសុខសម្រាប់ស្ដ្រី និងគ្រួសារ៕