អាជ្ញាធរខេត្តមណ្ឌលគិរី បានបើកការដ្ឋានជួសជុលផ្លូវមួយខ្សែពីផ្លូវដីក្រហម ទៅជាផ្លូវបេតុងអាមេ ស្ថិតនៅភូមិពូទ្រូ ឃុំសែនមនោរម្យ ស្រុកអូររាំង មានប្រវែង ៥៨៥ ម៉ែត្រ ទទឹងខ្នងលើ ៦ ម៉ែត្រ និងកម្រាស ០,១៥ ម៉ែត្រ ដោយគ្រោងចំណាយថវិកាសរុបចំនួន ៣៤៧.៤៣៨.០០០ រៀល។ ពិធីបើកការដ្ឋាននេះ បានប្រារព្ធឡើងនៅថ្ងៃទី ០២ ខែកុម្ភៈ ឆ្នាំ ២០២៦ ដោយមានការចូលរួមពីសំណាក់អាជ្ញាធរពាក់ព័ន្ធ និងប្រជាពលរដ្ឋមូលដ្ឋានជាច្រើនរូប។លោក សៀក មុន្នី អភិបាលស្រុកអូររាំង បានប្រាប់កម្ពុជាថ្មីឲ្យដឹងថា កន្លងមកផ្លូវមួយខ្សែនេះមានស្ថានភាពលំបាកខ្លាំង មានជង្ហុកច្រើន ជាពិសេសនៅរដូវវស្សា ដែលបណ្តាលឲ្យមានភក់ល្បាប់ រអិល និងពិបាកធ្វើដំណើរ ទៅកាន់ទីប្រជុំជន មណ្ឌលសុខភាព ឬពេលប្រជាពលរដ្ឋត្រូវឆ្លងទន្លេទៅពិនិត្យផ្ទៃពោះជាដើម។លោករំពឹងថា ការជួសជុលផ្លូវមួយខ្សែនេះ នឹងជួយសម្រួលដល់ការធ្វើដំណើររបស់បងប្អូនប្រជាពលរដ្ឋឲ្យមានភាពងាយស្រួល និងសុវត្ថិភាពជាងមុន ជាពិសេសការធ្វើដំណើរទៅមណ្ឌលសុខភាព សាលារៀន និងការដឹកជញ្ជូនកសិផលទៅកាន់ទីផ្សារ ដែលអាចជួយលើកកម្ពស់ជីវភាព និងសេដ្ឋកិច្ចរបស់ប្រជាពលរដ្ឋក្នុងមូលដ្ឋានបានមួយកម្រិតទៀតផងដែរ៕